ಕನ್ನಡಕ್ಕೆ 12 ರಾಷ್ಟ್ರಪ್ರಶಸ್ತಿಗಳ ಗರಿ!

ನವದೆಹಲಿ: ಸ್ಯಾಂಡಲ್‌ವುಡ್‌ ಇತಿಹಾಸದಲ್ಲೇ ಇದೇ ಮೊದಲ ಬಾರಿಗೆ ಕನ್ನಡ ಸಿನಿಮಾಗಳು 12 ರಾಷ್ಟ್ರೀಯ ಪ್ರಶಸ್ತಿ ಪಡೆದು ದಾಖಲೆ ನಿರ್ಮಿಸಿವೆ.

ದೆಹಲಿಯಲ್ಲಿ 2018ನೇ ಸಾಲಿನ 66ನೇ ರಾಷ್ಟ್ರೀಯ ಚಲನಚಿತ್ರ ಪ್ರಶಸ್ತಿಯನ್ನು ಪ್ರಕಟಿಸಲಾಗಿದ್ದು, ಪ್ರಾದೇಶಿಕ ವಿಭಾಗದಲ್ಲಿ ನಾತಿಚರಾಮಿ ಸಿನಿಮಾ ಅತ್ಯುತ್ತಮ ಪ್ರಶಸ್ತಿ ಪಡೆದಿದೆ. ಉತ್ತಮ ಆ್ಯಕ್ಷನ್‌ ಸಿನಿಮಾ ಎಂಬ ಹೆಗ್ಗಳಿಕೆಗೆ ಕೆಜಿಎಫ್ ಪಾತ್ರವಾಗಿದೆ. ನಾತಿಚರಾಮಿ ಸಿನಿಮಾ ಹಲವು ವಿಭಾಗಗಳಲ್ಲಿ ಪುರಸ್ಕಾರ ಪಡೆದಿದ್ದು, ಇಡೀ ಪ್ರಶಸ್ತಿ ಪಟ್ಟಿಯಲ್ಲೇ ಗಮನ ಸೆಳೆದಿದೆ.

ನಾತಿಚರಾಮಿ ಸಿನಿಮಾದ ‘ಮಾಯಾವಿ ಮನವೆ’ ಹಾಡಿನ ರಚನೆಗೆ ಸಿನಿಮಾ ನಿರ್ದೇಶಕರೂ ಆಗಿರುವ ಮಂಸೋರೆ ಹಾಗೂ ಇದೇ ಹಾಡಿನ ಗಾಯನಕ್ಕೆ ಬಿಂದುಮಾಲಿನಿ ಪ್ರಶಸ್ತಿ ಗಳಿಸಿದ್ದಾರೆ. ನಾತಿಚರಾಮಿ ಸಿನಿಮಾದ ಸಂಕಲನ ವಿಭಾಗದ ಜೊತೆಗೆ ನಾಯಕಿ ನಟಿ ಶ್ರುತಿ ಹರಿಹರನ್‌ಗೆ ಜ್ಯೂರಿ ಕಮಿಟಿಯ ವಿಶೇಷ ಉಲ್ಲೇಖಾರ್ಹ ಪ್ರಶಸ್ತಿ ಲಭಿಸಿದೆ. ನಾತಿಚರಾಮಿ ಸಿನಿಮಾ ಒಂದೇ ಐದು ಪುರಸ್ಕಾರಗಳನ್ನು ಬಾಚಿಕೊಂಡಿದೆ.

ಉಳಿದಂತೆ ‘ಸರ್ಕಾರಿ ಹಿರಿಯ ಪ್ರಾಥಮಿಕ ಶಾಲೆ ಕಾಸರಗೋಡು’ಗೆ ಉತ್ತಮ ಮಕ್ಕಳ ಚಿತ್ರ ಪ್ರಶಸ್ತಿ ಲಭಿಸಿದೆ. ಕೆಜಿಎಫ್ ಸಿನಿಮಾ ಎರಡು ವಿಭಾಗದಲ್ಲಿ ಪ್ರಶಸ್ತಿ ಗಳಿಸಿದೆ. ಆಕ್ಷನ್‌ ಸಿನಿಮಾ ವಿಭಾಗದಲ್ಲಿ ಪುರಸ್ಕರಿಸಲ್ಪಟ್ಟಿರುವುದರ ಜೊತೆಗೆ, ಸ್ಪೆಷಲ್ ಎಫೆಕ್ಟ್ಗಾಗಿ ತೆಲುಗಿನ ಅವೆ ಚಿತ್ರದ ಜೊತೆಗೆ ಪ್ರಶಸ್ತಿ ಹಂಚಿಕೊಂಡಿದೆ. ಉತ್ತಮ ಶೈಕ್ಷಣಿಕ ಚಿತ್ರವಾಗಿ ಸರಳ ವಿರಳ ಪ್ರಶಸ್ತಿ ಪಡೆದಿದೆ.