ಅಡಕೆ ಬೆಳೆ ಹಾನಿ; ವಿಶೇಷ ಪ್ಯಾಕೇಜ್‌ ಬಿಡುಗಡೆಗೆ ಒತ್ತಾಯ

Team Udayavani, Aug 21, 2019, 5:39 PM IST

ಸಾಗರ: ಅಡಕೆ ಬೆಳೆ ಹಾನಿ ಸಂಬಂಧ ವಿಶೇಷ ಪ್ಯಾಕೇಜ್‌ ಕೊಡಬೇಕು ಎಂದು ರಾಜ್ಯ ಸರ್ಕಾರಕ್ಕೆ ತಹಶೀಲ್ದಾರ್‌ ಮೂಲಕ ತೋಟಗಾರ್ ಸಂಸ್ಥೆ ಮನವಿ ಸಲ್ಲಿಸಿತು.

ಸಾಗರ: ಸಾಗರ, ಸೊರಬ ಮತ್ತು ಹೊಸನಗರ ತಾಲೂಕಿನ ಅಡಕೆ ಬೆಳೆಗಾರರಿಗೆ ಅತಿವೃಷ್ಟಿಯಿಂದ ಅಡಕೆ ಮರ ನಾಶ, ಕೊಳೆರೋಗ ಹಾಗೂ ವಿಪರೀತ ತಾಪಮಾನದ ಕಾರಣ ಬೆಳೆ ನಷ್ಟ ಆಗಿರುವ ಹಿನ್ನೆಲೆಯಲ್ಲಿ ವಿಶೇಷ ಪ್ಯಾಕೇಜ್‌ ಘೋಷಿಸಬೇಕು ಎಂದು ರಾಜ್ಯ ಸರ್ಕಾರವನ್ನು ನಗರದ ಪ್ರತಿಷ್ಠಿತ ತೋಟಗಾರ್ ಸಂಸ್ಥೆ ಒತ್ತಾಯಿಸಿದೆ.

ಈ ಸಂಬಂಧ ಮಂಗಳವಾರ ತಹಶೀಲ್ದಾರ್‌ ಚಂದ್ರಶೇಖರ ನಾಯ್ಕ ಅವರ ಮೂಲಕ ಮನವಿ ಸಲ್ಲಿಸಿರುವ ಸಂಸ್ಥೆ, ಮೂರು ತಾಲೂಕಿನ ಅಡಕೆ ಬೆಳೆಗಾರರು ಪಾರಂಪರಿಕ ಅಡಕೆ ಬೆಳೆಗಾರರಾಗಿದ್ದು ಕಡಿಮೆ ಹಿಡುವಳಿಯಿಂದ ಕೂಡಿದ ಬೆಳೆಗಾರರಾಗಿದ್ದಾರೆ. ಕಳೆದ ಬೇಸಿಗೆಯಲ್ಲಿ ಉರಿಬಿಸಿಲಿನ ಕಾರಣ ವಿಪರೀತ ತಾಪಮಾನದಿಂದ ಅಡಕೆ ಸಿಂಗಾರಗಳು ಸುಟ್ಟು ಹೋಗಿ, ಅಡಕೆ ಬೆಳೆ ಕನಿಷ್ಟಮಟ್ಟಕ್ಕೆ ಕುಸಿಯುವಂತಾಗಿತ್ತು. ಮೊನ್ನೆಯ ಆಶ್ಲೇಷ ಮಳೆ ಹಾಗೂ ಬಿರುಗಾಳಿ ಸಹಿತ ಆದ ಅತಿವೃಷ್ಟಿಯ ಪರಿಣಾಮದಿಂದ ಅಡಕೆ ಮರಗಳು ಮುರಿದು ಬಿದ್ದು ಉಳಿದಿರುವ ಫಸಲು ಕೂಡ ನಷ್ಟವಾಗಿದೆ ಎಂದು ತಿಳಿಸಲಾಗಿದೆ.

ಮರಗಳು ನಾಶವಾದ ಜಾಗದಲ್ಲಿ ಪುನ: ಅಡಕೆ ಮರ ಬೆಳೆಸಲು ಹತ್ತಾರು ವರ್ಷಗಳೇ ಬೇಕು. ತೋಟದಲ್ಲಿ ಅಳಿದುಳಿದ ಅಡಕೆ ಮರಗಳಲ್ಲಿನ ಫಸಲು ಕೊಳೆರೋಗದಿಂದ ನಾಶವಾಗುತ್ತಿದ್ದು, ಬೆಳೆಗಾರರು ತೀವ್ರವಾದ ಆರ್ಥಿಕ ಸಂಕಷ್ಟಕ್ಕೆ ಗುರಿಯಾಗಿದ್ದಾರೆ. ಈ ರೀತಿಯ ನಷ್ಟದಿಂದ ಬಳಲಿರುವ ಮೂರು ತಾಲೂಕಿನ ಅಡಕೆ ಬೆಳೆಗಾರರಿಗಾಗಿ ಸಂದರ್ಭವನ್ನು ವಿಶೇಷ ಪ್ರಾಕೃತಿಕ ವಿಕೋಪವೆಂದು ಪರಿಗಣಿಸಿ ಬದುಕು ಕಟ್ಟಿಕೊಳ್ಳಲು ವಿಶೇಷ ಪ್ಯಾಕೇಜ್‌ ಘೋಷಿಸಬೇಕು ಎಂದು ಆಗ್ರಹಿಸಲಾಗಿದೆ.

ತಹಶೀಲ್ದಾರರಿಗೆ ತೋಟಗಾರ್ ಅಧ್ಯಕ್ಷ ಕೆ.ಸಿ. ದೇವಪ್ಪ ಆವಿನಹಳ್ಳಿ ಮನವಿ ಸಲ್ಲಿಸಿದರು. ಸಂಸ್ಥೆಯ ಉಪಾಧ್ಯಕ್ಷ ಹು.ಭಾ. ಅಶೋಕ್‌, ಎ.ಆರ್‌. ಮಹಾಬಲೇಶ್ವರ, ಎಚ್.ಟಿ. ಜಯಶೀಲಪ್ಪ, ಕೆ.ಆರ್‌. ಗಣಪತಿ ಭಟ್, ಎಂ. ಸುಬ್ರಾಯ, ವಿಶಾಲಾಕ್ಷಿ ಎಸ್‌. ರಾವ್‌, ಕೆ.ಎಂ. ಸಾವಿತ್ರಿ ಮತ್ತಿತರರು ಇದ್ದರು.