ಶ್ರದ್ಧೆ, ಭಕ್ತಿಯ ಶ್ರೀ ಕೃಷ್ಣ ಜನ್ಮಾಷ್ಟಮಿ

Team Udayavani, Aug 25, 2019, 3:00 AM IST

ಹುಣಸೂರು: ನಗರ ಹಾಗೂ ತಾಲೂಕಿನ ವಿವಿಧ ಶಾಲೆ, ದೇವಸ್ಥಾನಗಳಲ್ಲಿ ಶ್ರೀ ಕೃಷ್ಣ ಜನ್ಮಾಷ್ಟಮಿಯನ್ನು ಸಡಗರ ಸಂಭ್ರಮದಿಂದ ಆಚರಿಸಿದರು.

ಶ್ರೀ ಸಾಯಿಬಾಬಾ ದೇವಸ್ಥಾನ: ಮೈಸೂರು ರಸ್ತೆಯ ಶ್ರೀ ಶಿರಡಿ ಸಾಯಿಬಾಬಾ ದೇವಸ್ಥಾನದಿಂದ ಆಯೋಜಿಸಿದ್ದ ಕಾರ್ಯಕ್ರಮದಲ್ಲಿ ಕೃಷ್ಣ ಜನ್ಮಾಷ್ಟಮಿ ಅಂಗವಾಗಿ ಸುತ್ತಮುತ್ತಲಿನ ಬಡಾವಣೆಯ ನೂರಕ್ಕೂ ಹೆಚ್ಚು ಪುಟಾಣಿಗಳು ಕೃಷ್ಣ-ರಾಧೆಯರ ವೇಷದಲ್ಲಿ ಕಂಗೊಳಿಸಿದರು. ದೇವಸ್ಥಾನ ಸಮಿತಿಯ ಸದಸ್ಯೆ, ರಾಜ್ಯ ಮಹಿಳಾ ಕಾಂಗ್ರೆಸ್‌ ಅಧ್ಯಕ್ಷರಾದ ಡಾ.ಪುಷ್ಪಅಮರ್‌ನಾಥ್‌, ವ್ಯವಸ್ಥಾಪಕ ಸುಧನ್ವ ಸೇರಿದಂತೆ ಪೋಷಕರು ಹಾಜರಿದ್ದರು. ಮಕ್ಕಳಿಗೆ ಸಿಹಿ ವಿತರಿಸಿದರು.

ಮಾಧವ ಶಾಲೆ: ನಗರದ ರತ್ನಪುರಿ ರಸ್ತೆಯ ಸೇವಾ ಭಾರತಿ ಟ್ರಸ್ಟ್‌ನ ಮಾಧವ ಶಾಲೆಯಲ್ಲಿ ಮಕ್ಕಳು ಕೃಷ್ಣ-ರಾಧೆಯ ವೇಷ ಧರಿಸಿ ಕೃಷ್ಣನ ವಿವಿಧ ಹಾಡುಗಳಿಗೆ ನ‌ೃತ್ಯ ಮಾಡಿದರೆ, ಹಲವು ಮಕ್ಕಳು ಕೃಷ್ಣನ ವಿವಿಧ ಭಂಗಿಯ ಚಿತ್ರಗಳನ್ನು ರಚಿಸಿದರು. ಕೃಷ್ಣನ ನೂರಾರು ನಾಮಗಳನ್ನು ಬರೆದು ಬಹುಮಾನಗಳನ್ನು ಗಿಟ್ಟಿಸಿಕೊಂಡರು. ಈ ವೇಳೆ ಟ್ರಸ್ಟ್‌ನ ಕಾರ್ಯದರ್ಶಿ ಮಹದೇವ್‌ರಾವ್‌ ಬಾಗಲ್‌, ವ್ಯವಸ್ಥಾಪಕ ರಘುವೀರ್‌, ನಿರ್ದೇಶಕ ಗೋಪಾಲ್‌ಜೀ, ಮುಖ್ಯ ಶಿಕ್ಷಕರಾದ ರಂಗಸ್ವಾಮಿ ಹಾಗೂ ಮನೋಹರ್‌, ಸಹ ಶಿಕ್ಷಕರಾದ ವಿಮಲಾಕ್ಷಿ, ಪಲ್ಲವಿ, ವೆಂಕಟೇಶ್‌, ಮಂಜುಳಾ, ಹೇಮಾ ಹಾಗೂ ಪೋಷಕರು ಉಪಸ್ಥಿತರಿದರು.

ಎಂ.ಆರ್‌.ಎನ್‌.ವಿ.ಶಾಲೆ: ಸೇತುವೆಯ ಎಂ.ಆರ್‌.ಎನ್‌.ವಿ.ಶಾಲೆಯಲ್ಲಿ ಕೃಷ್ಣ-ರಾಧೆಯರ ವೇಷ ಭೂಷಣದಲ್ಲಿ ಪುಟಾಣಿಗಳು ಕಂಗೊಳಿಸಿದರು. ಸಂಸ್ಥೆಯ ಕಾರ್ಯದರ್ಶಿ ಹರೀಶ್‌ ಬಾಬು, ಉಪಾಧ್ಯಕ್ಷ ನಾಗರಾಜ್‌, ಮುಖ್ಯ ಶಿಕ್ಷಕಿ ಶ್ಯಾಮಲಾ ಭಟ್‌ ಸೇರಿದಂತೆ ವಿದ್ಯಾರ್ಥಿಗಳು ಭಾಗವಹಿಸಿದ್ದರು.

ಶಾಸ್ತ್ರೀ ವಿದ್ಯಾ ಸಂಸ್ಥೆ: ನಗರದ ಬೈ ಪಾಸ್‌ ರಸ್ತೆಯ ಶಾಸ್ತ್ರೀ ವಿದ್ಯಾ ಸಂಸ್ಥೆಯ ಪುಟಾಣಿಗಳು ಕೃಷ್ಣಜನ್ಮಾಷ್ಟಮಿ ಅಂಗವಾಗಿ ಕೃಷ್ಣ-ರಾಧೆಯರ ವೇಷಭೂಷಣ ತೊಟ್ಟು ಬಂದಿದ್ದಲ್ಲದೆ, ಮಕ್ಕಳಿಗೆ ಮಡಿಕೆ ಒಡೆಯುವ, ಕೊಳಲು ನುಡಿಸುವ ಸ್ಪರ್ಧೆ ಆಯೋಜಿಸಿ, ಬಹುಮಾನ ವಿತರಿಸಲಾಯಿತು. ಈ ವೇಳೆ ಸಂಸ್ಥೆಯ ಕಾರ್ಯದರ್ಶಿ ರಾಧಾಕೃಷ್ಣ, ಪ್ರಾಚಾರ್ಯ ರವಿಶಂಕರ್‌, ಮುಖ್ಯಶಿಕ್ಷಕಿ ಸತ್ಯವತಿ, ತಂಗಮ್ಮ, ಶಿಕ್ಷಕವ‌ೃಂದ, ವಿದ್ಯಾರ್ಥಿಗಳು ಹಾಗೂ ಪೋಷಕರು ಭಾಗವಹಿಸಿದ್ದರು.