ಕರಾವಳಿ, ಹೊರದೇಶದಲ್ಲಿಯೂ “ಗಿರಿಗಿಟ್‌’ ಯಶಸ್ವಿ ಪ್ರದರ್ಶನ

Team Udayavani, Aug 27, 2019, 5:04 AM IST

ಮಂಗಳೂರು: ಕಾಮಿಡಿ ಹಾಗೂ ನವಿರಾದ ಕಥೆಯೊಂದಿಗೆ ಮೂಡಿಬಂದಿರುವ “ಗಿರಿಗಿಟ್‌’ ತುಳು ಸಿನೆಮಾ ಸದ್ಯ ಕೋಸ್ಟಲ್‌ವುಡ್‌ನ‌ ಬಹುತೇಕ ಥಿಯೇಟರ್‌ಗಳಲ್ಲಿ ಪ್ರೇಕ್ಷಕರಿಂದ ಉತ್ತಮ ಸ್ಪಂದನೆ ಪಡೆಯುವಲ್ಲಿ ಯಶಸ್ವಿಯಾಗಿದೆ.

ಸಿನೆಮಾ ಶುಕ್ರವಾರ ಬಿಡುಗಡೆಯಾಗಿದ್ದು, ಅಲ್ಲಿಂದ ಸೋಮವಾರದ ವರೆಗೆ ಎರಡೂ ಜಿಲ್ಲೆಗಳ ಬಹುತೇಕ ಚಿತ್ರಮಂದಿರಗಳಲ್ಲಿ ಹೌಸ್‌ಫುಲ್‌ ಪ್ರದರ್ಶನ ಕಾಣುತ್ತಿದೆ. ಆರ್‌ಎಸ್‌ ಸಿನೆಮಾಸ್‌ ಬ್ಯಾನರ್‌ನಲ್ಲಿ ರೂಪೇಶ್‌ ಶೆಟ್ಟಿ ಮತ್ತು ರಾಕೇಶ್‌ ಕದ್ರಿ ನಿರ್ದೇಶನದ “ಗಿರಿಗಿಟ್‌’ ಕೋಸ್ಟಲ್‌ವುಡ್‌ನ‌ಲ್ಲಿ ಹೊಸ ಭರವಸೆ ಮೂಡಿಸಿದೆ ಎಂಬ ಅಭಿಪ್ರಾಯ ವ್ಯಕ್ತವಾಗಿದೆ. ಕರಾವಳಿ ಮಾತ್ರ ವಲ್ಲದೆ, ಯುಎಇ, ಕತಾರ್‌, ಒಮನ್‌ನಲ್ಲಿಯೂ ಏಕಕಾಲದಲ್ಲಿ ಬಿಡುಗಡೆಯಾಗಿದೆ.

ರೂಪೇಶ್‌ ಶೆಟ್ಟಿ, ಶಿಲ್ಪಾ ಶೆಟ್ಟಿ, ನವೀನ್‌ ಡಿ. ಪಡೀಲ್‌, ಅರವಿಂದ ಬೋಳಾರ್‌, ಭೋಜರಾಜ್‌ ವಾಮಂಜೂರು, ಉಮೇಶ್‌ ಮಿಜಾರು, ಪ್ರಸನ್ನ ಶೆಟ್ಟಿ ಬೈಲೂರು, ಸಂದೀಪ್‌ ಶೆಟ್ಟಿ ಮಾಣಿಬೆಟ್ಟು, ರೋಶನ್‌ ಶೆಟ್ಟಿ ಮುಂತಾದ ಕಲಾವಿದರು ಸಿನೆಮಾದಲ್ಲಿ ವಿಭಿನ್ನವಾಗಿ ಅಭಿನಯಿಸಿದ್ದಾರೆ.

ಮಂಜುನಾಥ ಅತ್ತಾವರ ಮತ್ತು ಶೂಲಿನ್‌ ಫಿಲಂಸ್‌ ಚಿತ್ರಕ್ಕೆ ಬಂಡವಾಳ ಹೂಡಿದ್ದಾರೆ. ಖಳಡೇರಲ್‌ ಮಸ್ಕರೇ ನ್ಹಸ್‌ ಹಾಗೂ ಜೋಯೆಲ್‌ ರೆಬೆಲ್ಲೋ ಸಂಗೀತ, ಪ್ರಸನ್ನ ಶೆಟ್ಟಿ ಬೈಲೂರು ಸಂಭಾಷಣೆ, ನೃತ್ಯ ನಿರ್ದೇಶನ ನವೀನ್‌ ಶೆಟ್ಟಿ, ಸಂಕಲನ ರಾಹುಲ್‌ ವಸಿಷ್ಠ, ಸಹ ನಿರ್ದೇಶನ ಸುಮನ್‌ ಸುವರ್ಣ ಅವರದ್ದು. ರೂಪೇಶ್‌ ಹಾಗೂ ವಿನೀತ್‌ ಕುಮಾರ್‌ ರೈ ಚಿತ್ರಕಥೆ ಬರೆದಿದ್ದಾರೆ.

ಸಿನೆಮಾ ಬಿಡುಗಡೆ
ಭಾರತ್‌ ಮಾಲ್‌ನ ಬಿಗ್‌ ಸಿನೆಮಾಸ್‌ ನಲ್ಲಿ ಶುಕ್ರವಾರ ನಡೆದ ಚಿತ್ರದ ಉದ್ಘಾಟನ ಸಮಾರಂಭದಲ್ಲಿ ನಿರ್ದೇಶಕ, ನಟ ದೇವದಾಸ್‌ ಕಾಪಿ ಕಾಡ್‌ ಮಾತನಾಡಿ, “ಗಿರಿಗಿಟ್‌’ ತುಳು ಚಲನಚಿತ್ರ ಉತ್ತಮವಾಗಿ ಮೂಡಿ ಬಂದಿದೆ. ತುಳು ಪ್ರೇಕ್ಷಕರು ಚಿತ್ರವನ್ನು ಗೆಲ್ಲಿಸಬೇಕು ಎಂದರು. ನಟ ರೂಪೇಶ್‌ ಶೆಟ್ಟಿ, ನಟಿ ಶಿಲ್ಪಾ ಶೆಟ್ಟಿ, ಭೋಜರಾಜ ವಾಮಂಜೂರು, ರೋಶನ್‌ ಶೆಟ್ಟಿ, ಪ್ರಸನ್ನ ಶೆಟ್ಟಿ ಬೈಲೂರು, ತಾರಾನಾಥ ಶೆಟ್ಟಿ ಬೋಳಾರ, ಧನರಾಜ್‌, ಮಂಜುನಾಥ ಅತ್ತಾವರ, ಪ್ರೇಮ್‌ ಶೆಟ್ಟಿ ದುಬಾೖ, ರಾಕೇಶ್‌ ಕದ್ರಿ, ನಾರಾಯಣ ಪೂಜಾರಿ, ರವೀಂದ್ರ ಶೆಟ್ಟಿ, ಜಗನ್ನಾಥ ಶೆಟ್ಟಿ ಬಾಳ ಉಪಸ್ಥಿತರಿದ್ದರು.