ಲಿಂಗ ಪರಿವರ್ತನೆ ನಿಷೇಧ

Team Udayavani, Aug 30, 2019, 5:18 AM IST

ಚೆನ್ನೈ: ಶಿಶು ಮತ್ತು ಮಕ್ಕಳ ಲಿಂಗ ಪರಿವರ್ತನೆ ಶಸ್ತ್ರಚಿಕಿತ್ಸೆಯನ್ನು ನಿಷೇಧಿಸಿ ತಮಿಳುನಾಡು ಸರ್ಕಾರ ಸರ್ಕಾರ ಆದೇಶ ಹೊರಡಿಸಿದೆ. ಕಳೆದ ಏಪ್ರಿಲ್ನಲ್ಲಿ ಮದ್ರಾಸ್‌ ಹೈಕೋರ್ಟ್‌ ಆದೇಶಕ್ಕೆ ಅನುಗುಣವಾಗಿ ರಾಜ್ಯ ಸರ್ಕಾರ ಈ ಪ್ರಕಟಣೆ ಹೊರಡಿಸಿದೆ. ಆದರೆ ಜೀವಕ್ಕೆ ಅಪಾಯವಿರುವಂಥ ಸಂದರ್ಭಗಳಲ್ಲಿ ಈ ಶಸ್ತ್ರ ಚಿಕಿತ್ಸೆ ನಡೆಸಲು ಅನುಮತಿ ನೀಡಲಾಗುತ್ತದೆ ಎಂದು ಆದೇಶದಲ್ಲಿ ಸೂಚಿಸಲಾಗಿದೆ. ಇಂಥ ಆದೇಶ ಹೊರಡಿಸಿದ ಮೊದಲ ರಾಜ್ಯ ತಮಿಳುನಾಡು ಆಗಿದೆ.

ಇದಕ್ಕೆ ಸಮಿತಿಯೊಂದು ಅನುಮತಿ ನೀಡಲಿದ್ದು, ಇದರಲ್ಲಿ ಮಕ್ಕಳ ತಜ್ಞರು, ಎಂಡೋಕ್ರಿನಾಲಜಿಸ್ಟ ಹಗೂ ಸಾಮಾಜಿಕ ಕಾರ್ಯಕರ್ತರು ಮತ್ತು ಸರ್ಕಾರಿ ಪ್ರತಿನಿಧಿಗಳು ಇರಲಿದ್ದಾರೆ. ವೈದ್ಯಕೀಯ ಶಿಕ್ಷಣ ನಿರ್ದೇಶಕರು ಈ ಸಮಿತಿಯನ್ನು ರಚಿಸುತ್ತಾರೆ. ಕಳೆದ ಏಪ್ರಿಲ್ನಲ್ಲಿ ಈ ಸಂಬಂಧ ದಂಪತಿ ಮದ್ರಾಸ್‌ ಕೋರ್ಟ್‌ ಮೊರೆ ಹೋಗಿದ್ದರು. ಈ ವೇಳೆ ವಿಶ್ವ ಆರೋಗ್ಯ ಸಂಸ್ಥೆ ಕೂಡ ಶಿಶುಗಳ ಲಿಂಗ ಪರಿವರ್ತನೆ ಮಾಡಬಾರದು ಎಂದು ಅಭಿಪ್ರಾಯ ವ್ಯಕ್ತಪಡಿಸಿದೆ. ಹೀಗಾಗಿ ಇದನ್ನು ನಿಷೇಧಿಸಬೇಕು ಎಂದು ಕೋರ್ಟ್‌ ಅಭಿಪ್ರಾಯಪಟ್ಟಿತ್ತು.

40 ಕ್ಕೂ ಹೆಚ್ಚು ವಿಧದ ಭಿನ್ನ ಲಿಂಗೀಯರಿದ್ದಾರೆ. ಭಿನ್ನ ಲಿಂಗ ವರ್ತನೆಯು ಹುಟ್ಟುತ್ತಲೇ ಬರುವುದಿಲ್ಲ. ವ್ಯಕ್ತಿಯ ವಿಕಾಸದ ಯಾವುದೇ ಹಂತದಲ್ಲಿ ಇದು ಕಾಣಿಸಿಕೊಳ್ಳಬಹುದು. ಅಲ್ಲದೆ, ಒಮ್ಮೆ ಲಿಂಗ ಪರಿವರ್ತನೆ ಮಾಡಿದರೆ ಮತ್ತೆ ಮರಳಿಸಲಾಗುವುದಿಲ್ಲ ಎಂದೂ ಕೋರ್ಟ್‌ ಅಭಿಪ್ರಾಯಪಟ್ಟಿದೆ.