ವೈದ್ಯರ ಮೇಲೆ ಹಲ್ಲೆಗೆ 10 ವರ್ಷ ಜೈಲು?

Team Udayavani, Sep 4, 2019, 5:21 AM IST

ಹೊಸದಿಲ್ಲಿ: ಕರ್ತವ್ಯದಲ್ಲಿರುವ ವೈದ್ಯರ ಮೇಲೆ ಹಲ್ಲೆ ನಡೆಸಿದರೆ ಹತ್ತು ಲಕ್ಷ ರೂ. ದಂಡ ಮತ್ತು ಹತ್ತು ವರ್ಷಗಳ ವರೆಗೆ ಜೈಲು ಶಿಕ್ಷೆ!

ಕೇಂದ್ರ ಸರಕಾರ ಜಾರಿಗೊಳಿಸಲು ಉದ್ದೇಶಿಸಿರುವ ಆರೋಗ್ಯ ಸೇವೆಗಳ ಸಿಬಂದಿ ಮತ್ತು ಕ್ಲಿನಿಕಲ್‌ ಸಂಸ್ಥೆಗಳ (ಆಸ್ತಿ ನಷ್ಟ ಮತ್ತು ಹಿಂಸಾಚಾರ ನಿಷೇಧ) ಮಸೂದೆ 2019ರ ಪ್ರಧಾನ ಅಂಶ ಇದಾಗಿದೆ. ಅಸ್ಸಾಂನಲ್ಲಿ 73 ವರ್ಷದ ವೈದ್ಯರೊಬ್ಬರನ್ನು ಥಳಿಸಿ ಕೊಂದ ಘಟನೆಯ ಬೆನ್ನಲ್ಲೇ ಈ ಮಸೂದೆ ಬಗ್ಗೆ ಸಾರ್ವಜನಿಕರಿಂದ ಅಭಿಪ್ರಾಯ ಪಡೆದುಕೊಳ್ಳಲು ಅದನ್ನು ಕೇಂದ್ರ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸಚಿವಾಲಯ ಬಿಡುಗಡೆ ಮಾಡಿದೆ.

ವೈದ್ಯರ ಮೇಲೆ ಹೆಚ್ಚುತ್ತಿರುವ ಹಲ್ಲೆ ತಡೆ ಯುವ ನಿಟ್ಟಿನಲ್ಲಿ ಈ ಮಸೂದೆ ಸಿದ್ಧಪಡಿಸಲಾ ಗಿದೆ. ಅದರ ಬಗ್ಗೆ ಸಾರ್ವಜನಿಕರು ಅಭಿಪ್ರಾಯ ತಿಳಿಸುವ ನಿಟ್ಟಿಲ್ಲಿ ಕರಡು ಪ್ರತಿಯನ್ನು ಬಿಡುಗಡೆ ಮಾಡಿದ್ದೇವೆ ಎಂದು ಹಿರಿಯ ಅಧಿಕಾರಿ ತಿಳಿಸಿ ದ್ದಾರೆ. ವೈದ್ಯರ ಮೇಲೆ ಹಲ್ಲೆ, ಅವರ ಕ್ಲಿನಿಕ್‌, ಆಸ್ಪತ್ರೆಗೆ ಹಾನಿ ನಡೆಸಿದರೆ, ಆ ಪ್ರಕರಣ ಜಾಮೀನು ರಹಿತ ಅಪರಾಧ ಎಂದು ಮಸೂದೆ ಯಲ್ಲಿ ಸೂಚಿಸಲಾಗಿದೆ. ಗಾಯಗೊಂಡ ಆರೋಗ್ಯ ಸೇವೆಗಳ ಸಿಬಂದಿಗೆ ಸೂಕ್ತ ಪರಿಹಾರ ನೀಡುವ ಬಗ್ಗೆಯೂ ಅದರಲ್ಲಿ ಸಲಹೆ ಮಾಡಲಾಗಿದೆ.

ವೈದ್ಯರ ಮುಷ್ಕರ: ಈ ನಡುವೆ ಅಸ್ಸಾಂನಲ್ಲಿ ಹಿರಿಯ ವೈದ್ಯನನ್ನು ಕೊಂದಿರುವ ಘಟನೆ ಖಂಡಿಸಿ ರಾಜ್ಯಾದ್ಯಂತ ವೈದ್ಯರು ಮಂಗಳವಾರ ಕರ್ತವ್ಯಕ್ಕೆ ಹಾಜರಾಗದೇ ಮುಷ್ಕರ ನಡೆಸಿದ್ದಾರೆ.