ಯುಎಸ್‌ ಓಪನ್‌: ಮೆಡ್ವಡೇವ್‌-ನಡಾಲ್‌@ಫೈನಲ್‌

Team Udayavani, Sep 8, 2019, 6:00 AM IST

ನ್ಯೂಯಾರ್ಕ್‌: ಸ್ಪೇನಿನ ಅನುಭವಿ ಟೆನಿಸಿಗ ರಫೆಲ್‌ ನಡಾಲ್‌ ಮತ್ತು ರಶ್ಯದ ಯುವ ಆಟಗಾರ ಡ್ಯಾನಿಲ್‌ ಮೆಡ್ವಡೇವ್‌ ಯುಎಸ್‌ ಓಪನ್‌ ಪುರುಷರ ಸಿಂಗಲ್ಸ್‌ನಲ್ಲಿ ಪ್ರಶಸ್ತಿಗಾಗಿ ಸೆಣಸಲಿದ್ದಾರೆ. ನಡಾಲ್‌ಗೆ ಇದು 27ನೇ ಗ್ರ್ಯಾನ್‌ಸ್ಲಾಮ್‌ ಸಿಂಗಲ್ಸ್‌ ಫೈನಲ್‌ ಆಗಿದ್ದು, 18 ಪ್ರಶಸ್ತಿಗಳ ದೊರೆ ಎನಿಸಿಕೊಂಡಿದ್ದಾರೆ. ಆದರೆ ಮೆಡ್ವಡೇವ್‌ಗೆ ಇದೇ ಮೊದಲ ಗ್ರ್ಯಾನ್‌ಸ್ಲಾಮ್‌ ಫೈನಲ್‌ ಅನುಭವ.

ಸೆಮಿಫೈನಲ್‌ ಮುಖಾ ಮುಖೀಯಲ್ಲಿ ರಫೆಲ್‌ ನಡಾಲ್‌ ಇಟಲಿಯ ಮ್ಯಾಟಿಯೊ ಬೆರೆಟಿನಿ ಅವರನ್ನು 7-6 (8-6), 6-4, 6-1 ಅಂತರದಿಂದ ಪರಾಭವಗೊಳಿಸಿದರೆ, ಡ್ಯಾನಿಲ್‌ ಮೆಡ್ವಡೇವ್‌ ಬಲ್ಗೇರಿಯಾದ ಗ್ರಿಗರ್‌ ಡಿಮಿಟ್ರೋವ್‌ ಅವರಿಗೆ 7-6 (7-5), 6-4, 6-3ರಿಂದ ಆಘಾತವಿಕ್ಕಿದರು.

2ನೇ ಶ್ರೇಯಾಂಕದ ರಫೆಲ್‌ ನಡಾಲ್‌ ಯುಎಸ್‌ ಓಪನ್‌ನಲ್ಲಿ ಆಡಲಿರುವ 5ನೇ ಫೈನಲ್‌ ಇದಾಗಿದೆ. 2010, 2013 ಮತ್ತು 2017ರಲ್ಲಿ ಅವರು ಕಿರೀಟ ಧರಿಸಿಕೊಂಡಿದ್ದರು. 2011ರಲ್ಲಿ ಜೊಕೋವಿಕ್‌ಗೆ ಶರಣಾಗಿ ರನ್ನರ್‌ ಅಪ್‌ ಆಗಿದ್ದರು.

6 ತಿಂಗಳ ಅಮೋಘ ಫಾರ್ಮ್
23ರ ಹರೆಯದ, 5ನೇ ಶ್ರೇಯಾಂಕದ ಡ್ಯಾನಿಲ್‌ ಮೆಡ್ವಡೇವ್‌ ಕೇವಲ ಫೈನಲ್‌ ಮಾತ್ರವಲ್ಲ, ಗ್ರ್ಯಾನ್‌ಸ್ಲಾಮ್‌ ನಾಕೌಟ್‌ ತಲುಪಿದ್ದೇ ಇದು ಮೊದಲು. ಆದರೆ ಕಳೆದ 6 ತಿಂಗಳಲ್ಲಿ ಈ ರಶ್ಯನ್‌ ಟೆನಿಸಿಗನ ಫಾರ್ಮ್ ಅಮೋಘ ಮಟ್ಟದಲ್ಲಿರುವುದು ಗಮನಾ ರ್ಹ. ಆಡಿದ 24 ಪಂದ್ಯಗಳಲ್ಲಿ 22 ಗೆಲುವು ಸಾಧಿಸಿದ್ದಾರೆ. ಸಿನ್ಸಿನಾಟಿಯಲ್ಲಿ ಚಾಂಪಿ ಯನ್‌ ಆಗಿ ಮೂಡಿ ಬಂದಿದ್ದಾರೆ. ಎಡವಿದ್ದು ವಾಷಿಂಗ್ಟನ್‌ ಮತ್ತು ಕೆನಡಾ ಕೂಟಗಳ ಫೈನಲ್‌ಗ‌ಳಲ್ಲಿ ಮಾತ್ರ.

ಮೆಡ್ವಡೇವ್‌ ಈ ಫೈನಲ್‌ಗ‌ಳಲ್ಲಿ ಒಂದು ಸೋಲನ್ನು ರಫೆಲ್‌ ನಡಾಲ್‌ ವಿರುದ್ಧವೇ ಅನುಭವಿಸಿದ್ದರು. ಇದು ಕಳೆದ ಮಾಂಟ್ರಿಯಲ್‌ ಟೂರ್ನಿಯ ಪ್ರಶಸ್ತಿ ಕಾದಾಟದಲ್ಲಿ ಎದುರಾಗಿತ್ತು. ಮುಂದಿನ ವಾರವೇ ಮೆಡ್ವಡೇವ್‌ ಸಿನ್ಸಿನಾಟಿಯಲ್ಲಿ ಚಾಂಪಿಯನ್‌ ಆದರು. ಆದರೆ ಈ ಕೂಟದಲ್ಲಿ ನಡಾಲ್‌ ಆಡಿರಲಿಲ್ಲ.

ಅಸಾಮಾನ್ಯ ಆಟ ಅನಿವಾರ್ಯ
“ಮೆಡ್ವಡೇವ್‌ ಅತ್ಯಂತ ಬಲಿಷ್ಠ ಯುವ ಆಟಗಾರನಾಗಿದ್ದಾರೆ. ಈ ಋತುವಿನಲ್ಲಂತೂ ಅತ್ಯುತ್ತಮ ಫಾರ್ಮ್ನಲ್ಲಿದ್ದಾರೆ. ಅವರೆದುರು ನಾನು ಅಸಾಮಾನ್ಯ ಆಟವನ್ನೇ ಆಡಬೇಕಾಗುತ್ತದೆ’ ಎಂದು ರಫೆಲ್‌ ನಡಾಲ್‌ ಫೈನಲ್‌ ಬಗ್ಗೆ ಪ್ರತಿಕ್ರಿಯಿಸಿದ್ದಾರೆ.

ನಡಾಲ್‌ಗೆ ಸಾಟಿಯೇ?
ಯುಎಸ್‌ ಓಪನ್‌ ಪಂದ್ಯಾವಳಿಯ ಫೈನಲ್‌ಗೆ ಲಗ್ಗೆ ಇಡುವ ಮೂಲಕ ಡ್ಯಾನಿಲ್‌ ಮೆಡ್ವಡೇವ್‌ ಮೈಲುಗಲ್ಲೊಂದನ್ನು ನೆಟ್ಟಿದ್ದಾರೆ. ಅವರು ಒಂದೇ ಋತುವಿನಲ್ಲಿ ವಾಷಿಂಗ್ಟನ್‌, ಕೆನಡಾ, ಸಿನ್ಸಿನಾಟಿ ಮತ್ತು ನ್ಯೂಯಾರ್ಕ್‌ ಕೂಟಗಳ ಫೈನಲ್‌ ತಲುಪಿ ಆ್ಯಂಡ್ರೆ ಅಗಾಸಿ, ಇವಾನ್‌ ಲೆಂಡ್ಲ್ ಸಾಲಿನಲ್ಲಿ ಕಾಣಿಸಿಕೊಂಡರು. ಆದರೆ ಅಂದಿನ ನ್ಯೂಯಾರ್ಕ್‌ ಫೈನಲ್‌ನಲ್ಲಿ ಅಗಾಸ್ಸಿ, ಲೆಂಡ್ಲ್ ಇಬ್ಬರೂ ಸೋಲನು ಭವಿಸಿದ್ದರು. ಹೀಗಾಗಿ ಫೈನಲ್‌ನಲ್ಲಿ ಮೆಡ್ವಡೇವ್‌ ಗೆದ್ದರೆ ಹೊಸ ಇತಿಹಾಸ ಬರೆಯ ಲಿದ್ದಾರೆ.

ಮೆಡ್ವಡೇವ್‌ 2005ರ ಬಳಿಕ ಗ್ರ್ಯಾನ್‌ಸ್ಲಾಮ್‌ ಫೈನಲ್‌ಗೆ ಏರಿದ ರಶ್ಯದ ಮೊದಲ ಟೆನಿಸಿಗನೂ ಹೌದು. ಫೈನಲ್‌ನಲ್ಲಿ ಅವರು ನಡಾಲ್‌ಗೆ ಸಾಟಿಯಾಗುವರೇ ಎಂಬುದು ಎಲ್ಲರ ಕುತೂಹಲ.