ಕಾಶ್ಮೀರ ದಾಳಿಗೆ ಪಾಕ್ ಹೊಸ ಸಂಚು; ಅಫ್ಘಾನ್ ಉಗ್ರರ ನೆರವು ಪಡೆದಿದ್ಯಾಕೆ?

Team Udayavani, Sep 26, 2019, 8:16 AM IST

ಹೊಸದಿಲ್ಲಿ: ಭಾರತದ ವಿರುದ್ದ ದಾಳಿಗೆ ಸದಾ ಕಾಯುತ್ತಿರುವ ಪಾಕಿಸ್ಥಾನ ಈಗ ಹೊಸ ಸಂಚು ರೂಪಿಸಿದೆ. ಜಮ್ಮು ಮತ್ತು ಕಾಶ್ಮೀರದಲ್ಲಿ ದಾಳಿ ನಡೆಸಲು ತರಬೇತಿ ಪಡೆದ 60 ಅಫ್ಘಾನ್ ಹೋರಾಟಗಾರರನ್ನು ಪಾಕ್ ಸೈನ್ಯ ಆಯ್ಕೆ ಮಾಡಿದೆ ಎಂದು ಗುಪ್ತಚರ ದಳ ವರದಿ ಮಾಡಿದೆ.

ವರದಿಯ ಪ್ರಕಾರ ಈ ಗುಂಪಿನ ಪ್ರಮುಖ ಗುರಿ ಭಾರತೀಯ ಸೇನೆ. ಮುಂದಿನ ಕೆಲ ದಿನಗಳಲ್ಲಿ ಜಮ್ಮು ಕಾಶ್ಮೀರದಲ್ಲಿನ ಭಾರತೀಯ ಸೇನೆಯ ಮೇಲೆ ದಾಳಿ ನಡೆಯಬಹುದು ಎಂದು ಗುಪ್ತಚರ ದಳ ವರದಿ ಮಾಡಿದೆ.

ಬೇರೆ ಬೇರೆ ಉಗ್ರ ಸಂಘಟನೆಗಳಿಗೆ ಸೇರಿದ 40ರಿಂದ 60 ಅಫ್ಘಾನ್ ಉಗ್ರರು ಸುಧಾರಿತ ಶಸ್ತ್ರಾಸ್ತ್ರಗಳೊಂದಿಗೆ ಪಾಕ್ ಸೈನ್ಯದ ಜೊತೆ ಸೇರಿದ್ದಾರೆ ಎಂದು ವರದಿಯಾಗಿದೆ. ಆತ್ಮಾಹುತಿ ಬಾಂಬರ್ ಗಳನ್ನು ಬಳಸಿಕೊಂಡು ದಾಳಿ ನಡೆಸಲು ಪಾಕ್ ಯೋಜನೆ ರೂಪಿಸಿದೆ.

ಅಫ್ಘಾನ್ ನಿಂದ ಯುದ್ಧ ತರಬೇತಿ ಪಡೆದ ಉಗ್ರರು ಖೈಬರ್ ಪ್ರಾಂತ್ಯದಲ್ಲಿ ಪಾಕ್ ಸೈನ್ಯವನ್ನು ಸೇರಿದ್ದಾರೆ. ಲಾಂಚ್ ಪ್ಯಾಡ್ ಗಳ ಜೊತೆಗೆ ಅವರು ಭಾರತದ ಗಡಿಯಲ್ಲಿ ಒಳನುಸಳಲಿದ್ದಾರೆ ಎಂದು ವರದಿಯಾಗಿದೆ.