ತೆಲುಗು “ಶ್ರೀಮನ್ನಾರಾಯಣ’ನಿಗೆ ರಾಮ ಜೋಗಯ್ಯ ಸಾಥ್‌

Team Udayavani, Sep 28, 2019, 4:02 AM IST

ರಕ್ಷಿತ್‌ ಶೆಟ್ಟಿ ಅಭಿನಯದ “ಅವನೇ ಶ್ರೀಮನ್ನಾರಾಯಣ’ ಚಿತ್ರ ಇನ್ನೇನು ಬಿಡುಗಡೆಗೆ ಸಜ್ಜಾಗುತ್ತಿದೆ ಎಂಬ ವಿಷಯ ಎಲ್ಲರಿಗೂ ಗೊತ್ತೇ ಇದೆ. ಎಲ್ಲವೂ ಅಂದುಕೊಂಡಂತೆ ನಡೆದರೆ, ನವೆಂಬರ್‌ ಅಥವಾ ಡಿಸೆಂಬರ್‌ನಲ್ಲಿ “ಅವನೇ ಶ್ರೀಮನ್ನಾರಾಯಣ ‘ ಚಿತ್ರ ಬಿಡುಗಡೆಯಾಗಲಿದೆ. ಈಗ ಈ ಚಿತ್ರದ ಹೊಸ ಸುದ್ದಿಯೆಂದರೆ ಚಿತ್ರದ ತೆಲುಗಿನ ಅವತರಣಿಕೆಗೆ ರಾಮ ಜೋಗಯ್ಯ ಶಾಸ್ತ್ರಿ ಅವರು ಹಾಡುಗಳನ್ನು ಬರೆಯುತ್ತಿದ್ದಾರೆ. ಹೌದು, ತೆಲುಗು ಚಿತ್ರರಂಗದಲ್ಲಿ ರಾಮ ಜೋಗಯ್ಯ ಶಾಸ್ತ್ರಿ ಅವರು ಯಶಸ್ವಿ ಗೀತರಚನೆಕಾರರಾಗಿದ್ದಾರೆ.

ಅಲ್ಲಿನ ಸೂಪರ್‌ ಸ್ಟಾರ್‌ ಚಿತ್ರಗಳಿಗೆ ಇವರ ಹಾಡುಗಳು ಇರಲೇಬೇಕು. ಸೂಪರ್‌ ಹಿಟ್‌ ಸಾಂಗ್ಸ್‌ ಬರೆದಿರುವ ರಾಮ ಜೋಗಯ್ಯ ಶಾಸ್ತ್ರಿ ಈಗಾಗಲೇ ಕನ್ನಡದ “ಕೆಜಿಎಫ್’ ಹಾಗು “ಪೈಲ್ವಾನ್‌’ ಚಿತ್ರಗಳಿಗೆ ತೆಲುಗಿನಲ್ಲಿ ಗೀತೆಗಳನ್ನು ಬರೆದಿದ್ದಾರೆ. ಈಗ “ಅವನೇ ಶ್ರೀಮನ್ನಾರಾಯಣ’ ಸಿನಿಮಾಗೂ ಗೀತೆ ಬರೆಯುತ್ತಿದ್ದಾರೆ. ಹೀಗಂತ ಅವರೇ ತಮ್ಮ ಟ್ವಿಟ್ಟರ್‌ ಖಾತೆಯಲ್ಲಿ ಈ ವಿಷಯ ಹಂಚಿಕೊಂಡಿದ್ದಾರೆ. ತೆಲುಗಿನಲ್ಲಿ ಈಗಾಗಲೇ ಬಂದ “ಕೆಜಿಎಫ್’ ಹಾಗು “ಪೈಲ್ವಾನ್‌’ ಚಿತ್ರದ ಹಾಡುಗಳು ಜನಮೆಚ್ಚುಗೆ ಪಡೆದಿವೆ.

ಈಗ “ಅವನೇ ಶ್ರೀಮನ್ನಾರಾಯಣ’ ಚಿತ್ರದ ಕಥೆ ಕೇಳಿದ್ದಲ್ಲದೆ, ಚಿತ್ರದ ಮೇಕಿಂಗ್‌ ನೋಡಿ ತಂಬಾನೇ ಖುಷಿಯಿಂದ ಎಲ್ಲಾ ಹಾಡು ಬರೆದುಕೊಡಲು ಮುಂದಾಗಿದ್ದಾರಂತೆ. ಅಂದಹಾಗೆ, ಈ ಚಿತ್ರಕ್ಕೆ ಅಜನೀಶ್‌ ಲೋಕನಾಥ್‌ ಹಾಗೂ ಚರಣ್‌ರಾಜ್‌ ಅವರು ಸಂಗೀತ ನೀಡುತ್ತಿದ್ದಾರೆ. ಪುಷ್ಕರ್‌ ಮಲ್ಲಿಕಾರ್ಜುನಯ್ಯ ನಿರ್ಮಾಣ ಮಾಡಿದ್ದು, ಸಚಿನ್‌ ರವಿ ನಿರ್ದೇಶನ ಮಾಡಿದ್ದಾರೆ. ಚಿತ್ರದಲ್ಲಿ ರಕ್ಷಿತ್‌ ಶೆಟ್ಟಿ ಅವರಿಗೆ ಸಾನ್ವಿ ಶ್ರೀವಾಸ್ತವ್‌, ಅಚ್ಯುತ ಕುಮಾರ್‌ , ಪ್ರಮೋದ್‌ ಶೆಟ್ಟಿ, ಬಾಲಾಜಿ ಮೋಹನ್‌ ಸೇರಿದಂತೆ ಹಲವು ನಟರು ಅಭಿನಯಿಸಿದ್ದಾರೆ.