ವಿಶ್ವ ಕುಸ್ತಿ: ದೀಪಕ್‌ ಪೂನಿಯಾ ನಂ.1

Team Udayavani, Sep 28, 2019, 9:51 AM IST

ಹೊಸದಿಲ್ಲಿ: ವಿಶ್ವ ಚಾಂಪಿಯನ್‌ಶಿಪ್‌ನಲ್ಲಿ ಬೆಳ್ಳಿ ಪದಕ ಗೆದ್ದ ದೀಪಕ್‌ ಪೂನಿಯಾ ನೂತನ ವಿಶ್ವ ಕುಸ್ತಿ ರ್‍ಯಾಂಕಿಂಗ್‌ನಲ್ಲಿ ಅಗ್ರಸ್ಥಾನದ ಗೌರವ ಪಡೆದಿದ್ದಾರೆ. ಅವರು 86 ಕೆಜಿ ವಿಭಾಗದಲ್ಲಿ ವಿಶ್ವದ ನಂಬರ್‌ ವನ್‌ ಕುಸ್ತಿಪಟು ಎನಿಸಿದ್ದಾರೆ.

ಆದರೆ 65 ಕೆಜಿ ವಿಭಾಗದಲ್ಲಿ ಅಗ್ರ ರ್‍ಯಾಂಕಿಂಗ್‌ ಹೊಂದಿದ್ದ ಭಜರಂಗ್‌ ಪೂನಿಯಾ ಈ ಸ್ಥಾನ ಕಳೆದುಕೊಂಡಿದ್ದಾರೆ. ವನಿತಾ ವಿಭಾಗದಲ್ಲಿ ವಿನೇಶ್‌ ಪೋಗಟ್‌ ನಂ.2 ಆಗಿದ್ದಾರೆ.

20ರ ಹರೆಯದ, ಇದೇ ಮೊದಲ ಸಲ ವಿಶ್ವ ಕುಸ್ತಿ ಸ್ಪರ್ಧೆಯಲ್ಲಿ ಅಖಾಡಕ್ಕಿಳಿದಿದ್ದ ದೀಪಕ್‌ ಪೂನಿಯಾ ಕಾಲಿನ ನೋವಿನಿಂದಾಗಿ ಫೈನಲ್‌ ಪಂದ್ಯದಿಂದ ಹೊರಗುಳಿದಿದ್ದರು. ಹೀಗಾಗಿ ಇರಾನಿನ ಹಸನ್‌ ಯದಾನಿ ಚಾಂಪಿಯನ್‌ ಆಗಿ ಮೂಡಿಬಂದರು. ಆದರೆ ಈ ಚಾಂಪಿಯನ್‌ ಕುಸ್ತಿಪಟುವಿಗಿಂತ ದೀಪಕ್‌ ಪೂನಿಯಾ 4 ಹೆಚ್ಚು ಅಂಕಗಳನ್ನು ಹೊಂದಿದ್ದಾರೆ (82).

ಈ ವರ್ಷ ಸ್ಥಿರ ಪ್ರದರ್ಶನ ಕಾಯ್ದುಕೊಂಡು ಬಂದದ್ದು ದೀಪಕ್‌ ಪೂನಿಯಾ ಅವರ ರ್‍ಯಾಂಕಿಂಗ್‌ ಪ್ರಗತಿಯಲ್ಲಿ ನಿರ್ಣಾಯಕ ಪಾತ್ರ ವಹಿಸಿತು. ಯಾಸರ್‌ ಡೊಗು ಕೂಟದಲ್ಲಿ ಬೆಳ್ಳಿ, ಏಶ್ಯನ್‌ ಚಾಂಪಿಯನ್‌ಶಿಪ್‌ ಮತ್ತು ಸಸಾರಿ ಟೂರ್ನಮೆಂಟ್‌ನಲ್ಲಿ ಅವರು ಕಂಚಿನ ಪದಕ ಜಯಿಸಿದ್ದರು.

2ನೇ ಸ್ಥಾನಕ್ಕೆ ಇಳಿದ ಭಜರಂಗ್‌
ಭಜರಂಗ್‌ ಪೂನಿಯಾ ನಂಬರ್‌ ವನ್‌ ಎಂಬ ಹಿರಿಮೆಯೊಂದಿಗೆ ವಿಶ್ವ ಚಾಂಪಿಯನ್‌ಶಿಪ್‌ ಸ್ಪರ್ಧೆಗೆ ಇಳಿದಿದ್ದರು. ಆದರೆ 65 ಕೆಜಿ ವಿಭಾಗದಲ್ಲಿ ಕಂಚಿಗೆ ತೃಪ್ತರಾದ ಅವರೀಗ ದ್ವಿತೀಯ ಸ್ಥಾನಕ್ಕೆ ಇಳಿದಿದ್ದಾರೆ (63 ಅಂಕ). ಚಿನ್ನ ಗೆದ್ದ ರಶ್ಯದ ಗಾಜಿಮುರಾದ್‌ ರಶಿದೋವ್‌ ನೂತನ ನಂ.1 ಕುಸ್ತಿಪಟು ಎನಿಸಿದ್ದಾರೆ.
57 ಕೆಜಿ ವಿಭಾಗದಲ್ಲಿ ಕಂಚು ಗೆದ್ದ ರವಿ ದಹಿಯಾ ಮೊದಲ ಸಲ ಟಾಪ್‌-5 ಯಾದಿಯಲ್ಲಿ ಕಾಣಿಸಿಕೊಂಡಿದ್ದಾರೆ. ಅವರದು 5ನೇ ರ್‍ಯಾಂಕಿಂಗ್‌. ರಾಹುಲ್‌ ಅವಾರೆ ನಂ.2 ಆಗಿದ್ದಾರೆ.

ವಿನೇಶ್‌ 4 ಸ್ಥಾನ ಜಿಗಿತ
ವಿಶ್ವ ಕೂಟದಲ್ಲಿ ಕಂಚು ಗೆದ್ದು ಟೋಕಿಯೊ ಒಲಿಂಪಿಕ್‌ ಅರ್ಹತೆ ಸಂಪಾದಿಸುವಲ್ಲಿ ಯಶಸ್ವಿಯಾದ ವಿನೇಶ್‌ ಪೋಗಟ್‌ ಅವರದು 4 ಸ್ಥಾನಗಳ ನೆಗೆತ. 53 ಕೆಜಿ ವಿಭಾಗದಲ್ಲಿ ಅವರೀಗ ವಿಶ್ವದ ನಂ.2 ಕುಸ್ತಿಪಟು.