ಹಿಂದೂ ಧರ್ಮ ಸರ್ವಶ್ರೇಷ್ಠ: ಡಾ| ಕಲ್ಲಡ್ಕ ಪ್ರಭಾಕರ ಭಟ್‌

Team Udayavani, Sep 29, 2019, 9:36 PM IST

ಕಾರ್ಕಳ: ಹಿಂದೂ ಧರ್ಮ, ಸಂಸ್ಕೃತಿ, ಜೀವನ ಮೌಲ್ಯ ಅತ್ಯಂತ ಶ್ರೇಷ್ಠ ವಾದುದು. ಇದಕ್ಕೆ ಸಮಾನಾದ ಧರ್ಮ ಮತ್ತೂಂದಿಲ್ಲ. ಹಿಂದೂ ಧರ್ಮೀಯರು ಇತರ ಧರ್ಮದವರಿಗೆ ತೊಂದರೆಯನ್ನುಂಟು ಮಾಡಲು ಬಯಸುವುದಿಲ್ಲ. ಇತರ ಧರ್ಮದಿಂದ ಅನ್ಯಾಯವಾದರೆ ಇಡೀ ಸಮಾಜ ಎದ್ದು ನಿಂತು ಉತ್ತರಿಸಲಿದೆ ಎಂದು ಹಿಂದೂ ಮುಖಂಡ ಡಾ| ಕಲ್ಲಡ್ಕ ಪ್ರಭಾಕರ್‌ ಭಟ್‌ ಎಚ್ಚರಿಸಿದರು. ಅವರು ಸೆ. 29ರಂದು ವಿಶ್ವ ಹಿಂದೂ ಪರಿಷತ್‌ ಹಾಗೂ ಬಜರಂಗ ದಳದ ವತಿಯಿಂದ ಬೆಳ್ಮಣ್‌ನಲ್ಲಿ ನಡೆದ ಬೆಳ್ಮಣ್‌ ಚಲೋ ಸಮಾರಂಭದಲ್ಲಿ ದಿಕ್ಸೂಚಿ ಭಾಷಣ ಮಾಡಿದರು.

ಹಿಂದೂ ಸಮಾಜವನ್ನು ಕೆದಕಬೇಡಿ, ಬೆಳ್ಮಣ್‌ ಪರಿಸರ ಅತ್ಯಂತ ಶಾಂತವಾಗಿತ್ತು. ಮತಾಂತರ ಮಾಡುವ ಮೂಲಕ ಹಾಲಿಗೆ ವಿಷ ಬೆರೆಸುವ  ಕಾರ್ಯವಾಗಿದೆ. ಇದನ್ನು ಇಲ್ಲಿಗೆ ನಿಲ್ಲಿಸಿ. ಮುಂದುವರಿದಲ್ಲಿ ಸುಮ್ಮನಿರಲು ಸಾಧ್ಯವಿಲ್ಲ ಎಂದರು.

ಧರ್ಮದ ಚಿಂತನೆ ನಡೆಯಲಿ
ಭಗವದ್ಗೀತೆ, ರಾಮಾಯಣ, ಮಹಾಭಾರತದ ಕುರಿತು ಮಕ್ಕಳಿಗೆ ತಿಳಿಸಿಕೊಡುವ ಅಗತ್ಯವಿದೆ. ಧರ್ಮದ ಚಿಂತನೆ ಮನೆ-ಮನಗಳಲ್ಲಿ ನೆಲೆಸಬೇಕು. ಪಾಶ್ಚಾತ್ಯ ಸಂಸ್ಕೃತಿ ಅನುಕರಣೆ ಮಾಡದೇ ನಮ್ಮತನವನ್ನು ಉಳಿಸಿ, ಬೆಳೆಸಿಕೊಂಡು ಹೋಗಬೇಕು. ಇದರಿಂದ ಧರ್ಮ ಮತ್ತಷ್ಟು ಸಮೃದ್ಧವಾಗುವುದು ಎಂದರು.

ಅಲ್ಪಸಂಖ್ಯಾಕರೆಂದು ಮೀಸಲಾತಿ ಒದಗಿಸಿ, ಬಹುಸಂಖ್ಯಾತರು ಹಾಗೂ ಅಲ್ಪಸಂಖ್ಯಾಕರ ನಡುವೆ ಕಂದಕ ಸೃಷ್ಟಿಸಲಾಗುತ್ತಿದೆ. ನಾವೆಲ್ಲರೂ ಭಾರತೀಯರೆಂಬ ನೆಲೆಯಲ್ಲಿ ಒಂದೇ ರೀತಿಯ ನಿಯಮ ಜಾರಿಯಾಗಬೇಕು. ಕೇಂದ್ರ ಸರಕಾರ ಈ ನಿಟ್ಟಿನಲ್ಲಿ ದೃಢ ನಿರ್ಧಾರ ಕ್ರಮ ಕೈಗೊಳ್ಳುವ ವಿಶ್ವಾಸವಿದೆ ಎಂದು ಪ್ರಭಾಕರ್‌ ಭಟ್‌ ಅಭಿಪ್ರಾಯಪಟ್ಟರು.

ನಂದಳಿಕೆ ಶ್ರೀ ಮಹಾಲಿಂಗೇಶ್ವರ ದೇಗುಲದ ಮೊಕ್ತೇಸರ ಸುಹಾಸ್‌ ಹೆಗ್ಡೆ ಅಧ್ಯಕ್ಷತೆ ವಹಿಸಿದ್ದರು. ಮಂಗಳೂರು ವಿಭಾಗದ ಧರ್ಮ ಜಾಗರಣ ವೇದಿಕೆ ಸಹ ಸಂಯೋಜಕ ಪ್ರಸಾದ್‌ ಕುತ್ಯಾರು, ಬಜರಂಗ ದಳ ರಾಜ್ಯ ಸಂಚಾಲಕ ಸುನಿಲ್‌ ಕೆ.ಆರ್‌., ಜಿಲ್ಲಾ ಹಿಂದೂ ಜಾಗರಣ ವೇದಿಕೆಯ ಪ್ರಧಾನ ಕಾಯದರ್ಶಿ ಪ್ರಕಾಶ್‌ ಕುಕ್ಕೆಹಳ್ಳಿ, ಬೆಳ್ಮಣ್‌ ವಲಯ ವಿಹಿಂಪ ಅಧ್ಯಕ್ಷ ಪ್ರಸಾದ್‌ ಶೆಟ್ಟಿ, ವಿಹಿಂಪ ಜಿಲ್ಲಾ ಗೋರಕ್ಷಾ ಪ್ರಮುಖ್‌ ಉಮೇಶ್‌ ನಾಯಕ್‌ ಸೂಡ, ಬಜರಂಗದಳ ಜಿಲ್ಲಾ ಗೋರಕ್ಷಾ ಪ್ರಮುಖ್‌ ದಿನೇಶ್‌ ಶೆಟ್ಟಿ ಹೆಬ್ರಿ, ಬಜರಂಗ ದಳ ತಾಲೂಕು ಸಂಚಾಲಕ ಗುರುಪ್ರಸಾದ್‌ ನಾರಾವಿ ಉಪಸ್ಥಿತರಿದ್ದರು.

ಉಡುಪಿ ಎ.ಎಸ್‌.ಪಿ. ಕುಮಾರಚಂದ್ರ ಅವರಿಗೆ ಬಜರಂಗ ದಳ ಹಾಗೂ ವಿಹಿಂಪದಿಂದ ಮತಾಂತರ ತಡೆಗಟ್ಟುವಂತೆ ಮನವಿ ನೀಡಲಾಯಿತು. ಸುಮಾರು 150ಕ್ಕಿಂತ ಹೆಚ್ಚು ಪೊಲೀಸರು ಬಂದೋಬಸ್ತ್ ಒದಗಿಸಿದ್ದರು. ಬಜರಂಗ ದಳ ಜಿಲ್ಲಾ ಸುರಕ್ಷಾ ಪ್ರಮುಖ್‌ ಮಹೇಶ್‌ ಬೈಲೂರು ಸ್ವಾಗತಿಸಿ, ಅಶೋಕ್‌ ನಾರಾವಿ ನಿರೂಪಿಸಿ, ಜಯಪ್ರಕಾಶ್‌ ಪ್ರಭು ವಂದಿಸಿದರು.