ನವರಾತ್ರಿ ಉತ್ಸವ: ಈ ಬಾರಿ ಮೂರು ಲಕ್ಷ ಭಕ್ತರು ವೈಷ್ಣೋದೇವಿ ಮಂದಿರಕ್ಕೆ ಭೇಟಿ

Team Udayavani, Oct 8, 2019, 3:01 PM IST

ಜಮ್ಮು:ನವರಾತ್ರಿ ಉತ್ಸವದ ಹಿನ್ನೆಲೆಯಲ್ಲಿ ಸೆಪ್ಟಂಬರ್ 29ರಿಂದ ಅಕ್ಟೋಬರ್ 7ರವರೆಗೆ ಜಮ್ಮು-ಕಾಶ್ಮೀರದ ರೆಯಾಸಿ ಜಿಲ್ಲೆಯ ಕಾತ್ರಾ ನಗರದ ತ್ರಿಕುಟ ಪರ್ವದಲ್ಲಿರುವ ಮಾತಾ ವೈಷ್ಣೋದೇವಿ ಮಂದಿರಕ್ಕೆ 3ಲಕ್ಷಕ್ಕೂ ಅಧಿಕ ಭಕ್ತರು ಭೇಟಿ ನೀಡಿರುವುದಾಗಿ ವರದಿ ತಿಳಿಸಿದೆ.

ಮಾತಾ ವೈಷ್ಣೋದೇವಿ ಮಂದಿರ್ ಮಂಡಳಿಯ ಸಿಇಒ ಸಿಮ್ರಾನ್ ದೀಪ್ ಸಿಂಗ್ ಈ ಬಗ್ಗೆ ಮಾಹಿತಿ ನೀಡಿದ್ದು, ಈ ವರ್ಷ ಒಂಬತ್ತು ದಿನಗಳ ಕಾಲ ನಡೆದ ಹಬ್ಬದಲ್ಲಿ ವೈಷ್ಣೋದೇವಿ ಮಂದರಿಕ್ಕೆ 3,64,643 ಭಕ್ತರು ಭೇಟಿ ನೀಡಿರುವುದು ದಾಖಲೆ ಪ್ರಮಾಣದ್ದಾಗಿದೆ ಎಂದು ವಿವರಿಸಿದ್ದಾರೆ.

2018ರಲ್ಲಿ ಪ್ರಸಿದ್ಧ ವೈಷ್ಣೋದೇವಿ ಮಂದರಿಕ್ಕೆ ಭೇಟಿ ನೀಡಿದ ಭಕ್ತರ ಸಂಖ್ಯೆ 3.18ಲಕ್ಷ, 2017ರಲ್ಲಿ 3.03ಲಕ್ಷ, 2016ರಲ್ಲಿ 3.50 ಲಕ್ಷ, 2015ರಲ್ಲಿ 2.76 ಲಕ್ಷ, 2014ರಲ್ಲಿ 2 ಲಕ್ಷ ಎಂದು ವರದಿ ತಿಳಿಸಿದೆ.

ನವರಾತ್ರಿ ಸಂದರ್ಭದಲ್ಲಿ 51,225 ಮಂದಿ ಭಕ್ತರಿಗೆ ಊಟದ ಸೇವೆ ದೊರಕಿತ್ತು. 55, 447 ಭಕ್ತರು ಸಣ್ಣ ಕುದುರೆ, ಪಲ್ಲಕ್ಕಿ ಮೂಲಕ ಗುಹೆಗೆ ಭೇಟಿ ನೀಡಿದ್ದರು. 71000 ಭಕ್ತರು ಕೇಬಲ್ ಕಾರ್ ವ್ಯವಸ್ಥೆ ಪಡೆದಿದ್ದರು ಎಂದು ವರದಿ ವಿವರಿಸಿದೆ.