ಶೇಣಿ ಶಾಲೆಯಲ್ಲಿ ಮಕ್ಕಳಿಗೆ ಕೃಷಿ ಪಾಠ

Team Udayavani, Oct 18, 2019, 5:59 AM IST

ಪೆರ್ಲ: ಹಿಂದೆಲ್ಲ ನಮ್ಮ ಶಾಲಾ ಪಾಠ ಪುಸ್ತಕಗಳಲ್ಲೆಲ್ಲಾ “ಕೃಷಿತೋ ನಾಸ್ತಿ ದುರ್ಭಿಕ್ಷಂ’ ಅಂತ ಒಂದು ಉಲ್ಲೇಖವಿತ್ತು. ಆದರೆ ಈಗಿನ ಜನ ಕೃಷಿಯಿಂದ ವಿಮು ಖರಾಗುತ್ತಿದ್ದಾರೆ ಅನ್ನುವುದು ಆಧುನಿಕ ವಾದ. ಇದಕ್ಕೆ ಅಪವಾದ ಎನ್ನುವಂತೆ ಶಾಲೆಗಳಲ್ಲಿ ಮಕ್ಕಳಲ್ಲಿಯೇ ಕೈತೋಟ ಕೃಷಿ ಮಾಡಿಸಿಕೊಂಡು ಅದರ ಪಾಲನೆ, ಪೋಷಣೆಯ ಬಾಲಪಾಠವನ್ನು ಹೇಳಿ ಕೊಡುವಲ್ಲಿ ಇಲ್ಲೊಂದು ಶಾಲೆ ಗಮನ ಸೆಳೆಯುತ್ತದೆ.

ಎಣ್ಮಕಜೆ ಗ್ರಾಮ ಪಂಚಾಯತ್‌ ವ್ಯಾಪ್ತಿಯ ಶೇಣಿ ಶ್ರೀಶಾರದಾಂಬ ಎಯುಪಿ ಶಾಲೆಯಲ್ಲಾಗಿದೆ ಈ ರೀತಿಯ ಕೃಷಿ ಪಾಠ ಕಳೆದ ಹಲವಾರು ವರ್ಷಗಳಿಂದ ಒಂದು ಪರಿಪಾಠದಂತೆ ನಡೆದುಕೊಂಡು ಬಂದಿರುವುದು.

ಕೇರಳ ರಾಜ್ಯ ಸರಕಾರವು ಕೃಷಿ ಭವನದ ಮೂಲಕ ವಿತರಿಸುವ ತರಕಾರಿ ಬೀಜಗಳನ್ನು ಕಳೆದ ಹಲವಾರು ವರ್ಷಗಳಿಂದ ತಂದು ತಮ್ಮ ಶಾಲಾ ಅಸುಪಾಸಿನಲ್ಲಿ ಮಣ್ಣು ಅಗೆದು ಶಿಕ್ಷಕರು ಮತ್ತು ಮಕ್ಕಳು ಸೇರಿ ನೆಟ್ಟು ಬೆಳೆಸುವ ತರಕಾರಿ ಕೃಷಿ ಹುಲುಸಾಗಿ ಫಲ ನೀಡುವುದರ ಜತೆಗೆ ಮಕ್ಕಳ ಮಧ್ಯಾಹ್ನದ ಬಿಸಿ ಊಟದ ಸಂಬಾರಿಗೂ ಇದು ಸದುಪಯೋಗವಾಗಿದೆ.

ಅಕ್ಷರದ ಅಂಗಳದಲ್ಲಿ
ಕೃಷಿಯ ಬಾಲ ಪಾಠ
ಇಲ್ಲಿನ ಶಾಲಾ ಶಿಕ್ಷಕರು ವರ್ಷಂಪ್ರತಿ ಮುತುವರ್ಜಿ ವಹಿಸಿ ತರಕಾರಿ ಬೀಜ ಗಳನ್ನು ತಂದು ಹದಗೊಳಿಸಿದ ಜಾಗದಲ್ಲಿ ಮಕ್ಕಳ ಪುಟ್ಟ ಕೈಯಿಂದ ನೆಡಿಸಿ ಆಯಾಯ ಸಮಯಕ್ಕನುಗುಣವಾಗಿ ಹಾಕಬೇಕಾದ ನೀರಿನ ಪ್ರಮಾಣ, ಗೊಬ್ಬರ ಇನ್ನಿತರ ಕೃಷಿ ಪೋಷಣೆಯ ಕ್ರಮವನ್ನು ಸ್ವತ: ಪ್ರಾತ್ಯಕ್ಷಿಕೆಯಂತೆ ಬೋಧಿಸುವುದರ ಜತೆಗೆ ಮಕ್ಕಳಿಗೆ ಅನುಭವಯುಕ್ತವಾಗಿಸಲು ಇದೊಂದು ಸುಂದರ ಮಾರ್ಗವಾಗಿದೆ. ವರ್ಷಂಪ್ರತಿ ಇಲ್ಲಿ ಬೆಂಡೆ, ತೊಂಡೆ, ಅಲಸಂಡೆ, ಹಾಗಲ ಕಾಯಿ, ಟೊಮ್ಯಾಟೊ, ಸೌತೆ, ಹಸಿ ಮೆಣಸು, ಬಾಳೆ ಇನ್ನಿತರ ತರಕಾರಿಗಳನ್ನು ಬೆಳೆಸಲಾಗುತ್ತದೆ. ಇದು ಸಂಪದ್ಭರಿತವಾಗಿ ಫಲ ನೀಡಿದಾಗ ಮಕ್ಕಳ ಭೋಜನಕ್ಕೊಂದು ಪೋಷಕಯಕ್ತ ತರಕಾರಿ ಆಗಿ ಉಪಯೋಗವೂ ಆಗು ತ್ತದೆ. ಜತೆಗೆ ಮಕ್ಕಳಿಗೆ ಚಿಕ್ಕಂದಿನಿಂದಲೇ ಕೃಷಿ ಕಾರ್ಯದ ಬಗ್ಗೆ ಒಲವು ಬೆಳೆಸಿ ಕೊಳ್ಳಲೊಂದು ಪ್ರೇರಣೆಯ ಹಾದಿಯೂ ಆಗಿರುವುದರಿಂದ ಇಂತಹ ಆದರ್ಶ ಕೃಷಿ ಕಾಯಕಗಳು ಅಲ್ಪ ಸ್ವಲ್ಪವಾದರೂ ಅಲ್ಲಲ್ಲಿ ಗೋಚರಿಸಬೇಕು. ಹಾಗಾದರೆ ಮಾತ್ರ “ಕೈ ಕೆಸರಾದರೂ ಬಾಯಿ ಮೊಸರು’ ಎಂಬ ಗಾದೆ ಮಾತಿಗೆ ಮಹತ್ವ ಬಂದು ಮುಂದಿನ ತಲೆಮಾರು ಕೃಷಿಯೆಡೆಗೆ ಆಸಕ್ತಿ ಬೆಳೆಸುವುದರೊಂದಿಗೆ ದೇಶ ವನ್ನು ಸುಭಿಕ್ಷೆಯತ್ತ ಕೊಂಡೊಯ್ಯಲು ಪ್ರರಣೆ ಸಿಗಲಿ.

ಪುಟ್ಟ ಪ್ರಯೋಗ
ಕಳೆದ ಕೆಲವು ವರ್ಷಗಳಿಂದ ಶೇಣಿ ಶಾಲೆಯಲ್ಲಿ ನಡೆಸುತ್ತಾ ಬಂದಿರುವ ಈ ಪುಟ್ಟ ಕೃಷಿ ಪ್ರಯೋಗ ಬಹುಮಟ್ಟಿನಲ್ಲಿ ಪ್ರಗತಿ ಕಂಡಿದೆ. ಇದರಿಂದಾಗಿ ಮಕ್ಕಳಿಗೂ, ಶಾಲೆಗೂ ಫಲಪ್ರದವಾಗಿದೆ. ಶಾಲೆಯ ಪಾಠದ ಜತೆಗೆ ವಿರಾಮದ ಅಥವಾ ಆಟದ ಸಮಯದಲ್ಲಿ ಇಂತಹ ಚಟುವಟಿಕೆಗೆ ಮಹತ್ವ ನೀಡಲಾಗುತ್ತದೆ.
– ಶ್ರೀಧರ ಮಾಸ್ತರ್‌ ಕುಕ್ಕಿಲ,
ಶಿಕ್ಷಕರು, ಪ್ರಗತಿಪರ ಕೃಷಿಕರು