ಪಟ್ಟಿ ಪ್ರಕಟ ವಿಳಂಬ; ಬಂಡಾಯ ಹತ್ತಿಕ್ಕಲು ಪಕ್ಷಗಳ ತಂತ್ರ !

Team Udayavani, Oct 30, 2019, 4:33 AM IST

ಮಹಾನಗರ: ಮಹಾನಗರ ಪಾಲಿಕೆಗೆ ನಡೆಯುವ ಮಹತ್ವದ ಚುನಾವಣೆ ಸಂಬಂಧ ನಾಮಪತ್ರ ಸಲ್ಲಿಕೆಗೆ ಅ. 31 ಕೊನೆಯ ದಿನವಾದರೂ ಬಿಜೆಪಿ, ಕಾಂಗ್ರೆಸ್‌, ಜೆಡಿಎಸ್‌ ಸಹಿತ ರಾಜಕೀಯ ಪಕ್ಷಗಳಲ್ಲಿ ಅಭ್ಯರ್ಥಿಗಳ ಅಂತಿಮ ಪಟ್ಟಿ ಇನ್ನೂ ಕಗ್ಗಂಟಾಗಿದೆ.

ಒಂದೆಡೆ ಅಭ್ಯರ್ಥಿಗಳ ಆಯ್ಕೆ ಸಮಸ್ಯೆ ಆಗುತ್ತಿರುವುದರಿಂದ ಅದನ್ನು ಸಮರ್ಥವಾಗಿ ಎದುರಿಸುವುದು, ಕೈ ತಪ್ಪಿದ ಅಭ್ಯರ್ಥಿ-ಬೆಂಬಲಿಗರನ್ನು ಸಮಾಧಾನಿಸಲು ಪಕ್ಷಗಳು ಗಮನ ನೀಡುತ್ತಿದೆ. ಹೀಗಾಗಿ ಇಂದು-ನಾಳೆ ಮಂಗಳೂರಿನ ರಾಜಕೀಯ ಪಕ್ಷಗಳ ಕಚೇರಿಗಳಲ್ಲಿ ಮಹತ್ವದ ಬೆಳವಣಿಗೆಗಳು ನಡೆಯುವ ಸಾಧ್ಯತೆಯಿದೆ.

ಕಾಂಗ್ರೆಸ್‌, ಬಿಜೆಪಿ, ಜೆಡಿಎಸ್‌ ಪಕ್ಷಗಳು ಕೊನೆಯ ಕ್ಷಣದಲ್ಲಿ ಅಭ್ಯರ್ಥಿ ಹೆಸರು ಆಯ್ಕೆ ಗೊಳಿಸುತ್ತಿರುವ ಹಿನ್ನೆಲೆಯಲ್ಲಿ ಎರಡು ದಿನ ನಾಮಪತ್ರ ಸಲ್ಲಿಕೆಯ ಸಂಖ್ಯೆಯೂ ದುಪ್ಪಟ್ಟಾಗಲಿದೆ. ಬಿಜೆಪಿ 35 ಅಭ್ಯರ್ಥಿಗಳ ಪಟ್ಟಿ ಬಿಡುಗಡೆ ಮಾಡಿದ್ದರಲ್ಲಿಯೇ ಹಲವು ವಾರ್ಡ್‌ನಲ್ಲಿ ಭಿನ್ನ ಸ್ವರ ಕೇಳಿಬಂದಿದ್ದು, ಇನ್ನುಳಿದ ವಾರ್ಡ್‌ಗಳ ಅಭ್ಯರ್ಥಿ ಆಯ್ಕೆಯನ್ನು ಮತ್ತಷ್ಟು ಕಗ್ಗಂಟಾಗಿಸಿದೆ. ಆಕಾಂಕ್ಷಿಗಳ ಸಂಖ್ಯೆ ಹೆಚ್ಚಾದ ಕಾರಣದಿಂದ ಕಾಂಗ್ರೆಸ್‌ ಹಾಗೂ ಜೆಡಿಎಸ್‌ ನಾಮಪತ್ರ ಸಲ್ಲಿಕೆಯ ಕೊನೆಯ ದಿನಕ್ಕಿಂತ ಮುನ್ನಾ ದಿನ ಪಟ್ಟಿ ಬಿಡುಗಡೆ ಮಾಡಲಿದೆ.

ಪಾಲಿಕೆ ಚುನಾವಣೆಗೆ ದಿನಾಂಕ ಘೋಷಣೆಯಾಗಿ ಸುಮಾರು 10 ದಿನಗಳು ಕಳೆಯುತ್ತಾ ಬಂದಿದ್ದರೂ ನಾಮ ಪತ್ರ ಸಲ್ಲಿಕೆಗೆ ಬಾಕಿ ಇರುವ ಒಂದೆರಡು ದಿನದಲ್ಲಿ ಅಭ್ಯರ್ಥಿ ಘೋಷಣೆಗೆ ರಾಜಕೀಯ ಪಕ್ಷಗಳು ಮನಸ್ಸು ಮಾಡಿ ರುವುದು ಅಸಮಾಧಾನದ ಸುಳಿವನ್ನು ಜಗಜ್ಜಾಹಿರು ಮಾಡಿದಂತಾಗಿದೆ. ಮೀಸಲಾತಿಯಿಂದ ಸ್ಥಾನ ಕೈತಪ್ಪಿದ ವರು ಪರ್ಯಾಯ ವಾರ್ಡ್‌ ನೆಚ್ಚಿಕೊಂಡಿರುವ ಹಿನ್ನೆಲೆಯಲ್ಲಿಯೇ ಹೆಚ್ಚು ಪೈಪೋಟಿಗೆ ಕಾರಣ ಎನ್ನಲಾಗುತ್ತಿದೆ.

ಬಿಜೆಪಿಯು 35 ಅಭ್ಯರ್ಥಿಗಳ ಮೊದಲ ಪಟ್ಟಿಯನ್ನು ಸೋಮವಾರ ಸಂಜೆ ಪ್ರಕಟಿಸಿ, ಸಾಧ್ಯಾಸಾಧ್ಯತೆಗಳ ಬಗ್ಗೆ ಕಣ್ಣಿ ಡುವ ತಂತ್ರ ರೂಪಿಸಿತ್ತು. 60 ವಾರ್ಡ್‌ಗಳಿಗೂ ಅಭ್ಯರ್ಥಿ ಆಯ್ಕೆ ಮಾಡಲಾ ಗಿತ್ತಾ ದರೂ ಒಮ್ಮೆಲೇ ಎಲ್ಲ ವಾರ್ಡ್‌ನ ಅಭ್ಯರ್ಥಿ ಆಯ್ಕೆ ಘೋಷಿಸಿದರೆ ಅಸಮಾ ಧಾನ ತಾರ ಕಕ್ಕೇ ರುವ ಸಾಧ್ಯತೆ ಮನಗಂಡ ಬಿಜೆಪಿ ಕಾದುನೋಡುವ ಸೂತ್ರಕ್ಕೆ ಮುಂದಾ ಗಿತ್ತು. ಹೀಗಾಗಿ ತೀವ್ರ ಪೈಪೋಟಿ ಇಲ್ಲದ 35 ವಾರ್ಡ್‌ನ ಅಭ್ಯರ್ಥಿಗಳ ಪಟ್ಟಿ ಯನ್ನು ಪ್ರಕಟಿ ಸಲಾಗಿದೆ. ಉಳಿದ ಅಭ್ಯರ್ಥಿ ಗಳ ಹೆಸರು ಘೋಷಣೆ ಇದೀಗ ಪಕ್ಷಕ್ಕೆ ಬಹ ಳಷ್ಟು ಜಟಿಲವಾಗಿದೆ. ಸುಮಾರು 10ರಷ್ಟು ವಾರ್ಡ್‌ಗಳಲ್ಲಿ ಅಭ್ಯರ್ಥಿಗಳ ಸಂಖ್ಯೆ ತಲಾ ಮೂರಕ್ಕಿಂತ ಅಧಿಕವಿರುವ ಕಾರಣದಿಂದ ಅಂತಿಮ ಆಯ್ಕೆಯೇ ಕಠಿಣವಾಗಿತ್ತು.

“ಸಮಾಧಾನ ಮೀಟಿಂಗ್‌’!
ಬಿಜೆಪಿಯ ಮೊದಲ ಪಟ್ಟಿ ಬಿಡುಗಡೆ ಗೊಳ್ಳುತ್ತಿದ್ದಂತೆ 5-6 ವಾರ್ಡ್‌ಗಳ ಆಕಾಂಕ್ಷಿ ಗಳಿಂದ, ಬೆಂಬಲಿಗರಿಂದ ಅಸಮಾಧಾನದ ಮಾತು ಕೇಳಿಬಂದಿವೆ. ವಾರ್ಡ್‌ ಬಿಜೆಪಿ ಸಮಿತಿ ಸಭೆಯಲ್ಲಿ ಆಯ್ಕೆಗೊಂಡ ಹೆಸರು ಪಟ್ಟಿಯಲ್ಲಿ ಬಿಡುಗಡೆಯಾಗದ ಬಗ್ಗೆ ಕೆಲವು ಅಭ್ಯರ್ಥಿಗಳು ಪಕ್ಷದ ಪ್ರಮುಖರಲ್ಲಿ ಅಸಮಾಧಾನ ಹೊರಹಾಕಿದ್ದಾರೆ. ಹೀಗಾಗಿ ಅವರನ್ನು ಸಮಾಧಾನಿಸುವ ಕೆಲಸ ಪಕ್ಷದ ಕಚೇರಿಯಲ್ಲಿ ಮಂಗಳವಾರ ಬಿರು ಸಿನಿಂದ ನಡೆದಿದೆ. ಅದರಲ್ಲಿಯೂ ಬಿಜೆಪಿ ರಾಜ್ಯಾಧ್ಯಕ್ಷ ನಳಿನ್‌ ಕುಮಾರ್‌ ಕಟೀಲು ಅವರು ಬಿಜೆಪಿ ಕಚೇರಿಯಲ್ಲಿ ಮಂಗಳ ವಾರ ಇದ್ದ ಹಿನ್ನೆಲೆಯಲ್ಲಿ ಅಸಮಾಧಾನ ತಿಳಿಮಾಡುವ ಕೆಲಸ ನಡೆದಿದೆ. ಈ ಮಧ್ಯೆ ಜೆಡಿಎಸ್‌ ಕೂಡ ಅಭ್ಯರ್ಥಿ ಆಯ್ಕೆಯ ಪಟ್ಟಿಯನ್ನು ಬುಧವಾರ ಪ್ರಕಟಿಸಲು ನಿರ್ಧರಿಸಿದೆ. ಜೆಡಿಎಸ್‌ ರಾಜ್ಯ ಸಮಿತಿ ಪ್ರಮುಖರು ಪಟ್ಟಿ ಪ್ರಕಟನೆ ಹಿನ್ನೆಲೆಯಲ್ಲಿ ಬುಧವಾರ ಮಂಗಳೂರಿಗೆ ಆಗಮಿಸಲಿದ್ದಾರೆ.

ಕಾಂಗ್ರೆಸ್‌-ಜೆಡಿಎಸ್‌; ಇಂದು ಸಂಜೆ ಅಭ್ಯರ್ಥಿಗಳ ಪಟ್ಟಿ
ಜಿಲ್ಲಾ ಕಾಂಗ್ರೆಸ್‌ ಈಗಾಗಲೇ ಅಭ್ಯರ್ಥಿಗಳ ಪಟ್ಟಿಯನ್ನು ಸಿದ್ಧಪಡಿಸಿದ್ದು, ಬಂಡಾಯ ಸಾಧ್ಯತೆಗಳನ್ನು ಮಟ್ಟಹಾಕುವ ಕಾರ್ಯತಂತ್ರ ಅನುಸರಿಸುತ್ತಿದೆ. ಇದಕ್ಕಾಗಿ ಪಟ್ಟಿಯನ್ನು ನಾಮಪತ್ರ ಸಲ್ಲಿಸಲು ಒಂದು ದಿನ ಬಾಕಿ ಇರುವಾಗ ಪ್ರಕಟಿಸಲು ನಿರ್ಧರಿಸಿದೆ. ಬುಧವಾರ ಸಂಜೆ ಕಾಂಗ್ರೆಸ್‌ ಪಕ್ಷದ ವೀಕ್ಷಕರಾದ ವಿ.ಆರ್‌. ಸುದರ್ಶನ್‌, ಯು.ಬಿ. ವೆಂಕಟೇಶ್‌ ಆಗಮಿಸಿ ಪಟ್ಟಿ ಪ್ರಕಟಿಸಲಿದ್ದಾರೆ. ಅಭ್ಯರ್ಥಿಗಳ ನಾಮಪತ್ರ ಸಲ್ಲಿಸಲು (ಇಂದು ಹೊರತುಪಡಿಸಿ) ಒಂದು ದಿನ ಮಾತ್ರ ಬಾಕಿ ಇದೆ. ಈ ವೇಳೆ ಅವಕಾಶ ವಂಚಿತರಾಗುವ ಅಭ್ಯರ್ಥಿಗಳು ಬಂಡಾಯ ಎದ್ದರೂ ಅವರಿಗೆ ನಾಮಪತ್ರ ಸಲ್ಲಿಸಲು ಅವಕಾಶವಾಗದಂತೆ ಎಚ್ಚರಿಕೆ ವಹಿಸುವ ನಿಟ್ಟಿನಲ್ಲಿ ಕಾರ್ಯತಂತ್ರ ರೂಪಿಸಿದೆ. ಕಾಂಗ್ರೆಸ್‌ ಸಿದ್ಧಪಡಿಸಿದ ಪಟ್ಟಿಯ ಸುಳಿವು ಕೆಲವರಿಗೆ ದೊರೆತಿದ್ದು, ಪರಿಣಾಮವಾಗಿ ಅಸಮಾಧಾನ ಈಗಾಗಲೇ ಹೊಗೆಯಾಡಲಾರಂಭಿಸಿದೆ.

-  ದಿನೇಶ್‌ ಇರಾ