ನವಜಾತ ಶಿಶುವನ್ನು ಸುಡಲು ಯತ್ನಿಸಿದವರು ಪೊಲೀಸ್ ವಶಕ್ಕೆ

Team Udayavani, Oct 31, 2019, 7:56 PM IST

ಹೈದ್ರಾಬಾದ್: ನವಜಾತ ಶಿಶುವೊಂದನ್ನು ಬಯಲಿನಲ್ಲಿ ಸುಡಲು ಯತ್ನಿಸುತ್ತಿದ್ದ ಇಬ್ಬರನ್ನು ಪೊಲೀಸರು ಬಂಧಿಸಿರುವ ಘಟನೆ ಹೈದ್ರಾಬಾದ್ ನಿಂದ ವರದಿಯಾಗಿದೆ. ನಗರದ ಜುಬ್ಲೀ ಬಸ್ ನಿಲ್ದಾಣದ ಸಮೀಪ ಈ ಘಟನೆ ನಡೆದಿದೆ.

ಇಬ್ಬರು ವ್ಯಕ್ತಿಗಳು ಬ್ಯಾಗ್ ಒಂದನ್ನು ಹಿಡಿದುಕೊಂಡು ಅನುಮಾನಾಸ್ಪದವಾಗಿ ತಿರುಗಾಡುತ್ತಿದ್ದುದನ್ನು ಗಮನಿಸಿದ ಆಟೋ ರಿಕ್ಷಾ ಚಾಲಕರೊಬ್ಬರು ಇವರಿಬ್ಬರ ವರ್ತನೆಯಿಂದ ಅನುಮಾನಗೊಂಡು ತಕ್ಷಣವೇ ಪೊಲೀಸರಿಗೆ ಮಾಹಿತಿ ನೀಡುತ್ತಾರೆ.

ಪೊಲೀಸರು ಸ್ಥಳಕ್ಕೆ ಆಗಮಿಸಿದ ಸಂದರ್ಭದಲ್ಲಿ ಹೊಂಡ ತೆಗೆಯುತ್ತಿದ್ದ ಈ ವ್ಯಕ್ತಿಗಳಿಬ್ಬರುನ್ನು ವಿಚಾರಿಸಿದಾಗ ಮೃತಪಟ್ಟಿರುವ ತಮ್ಮ ಮೊಮ್ಮಗುವನ್ನು ಹೂಳಲು ಹೊಂಡ ತೆಗೆಯುತ್ತಿರುವುದಾಗಿ ಮಾಹಿತಿ ನೀಡುತ್ತಾರೆ.

ಆದರೆ ಪೊಲೀಸರಿಗೆ ಅನುಮಾನ ಬಲವಾಗಿ ಅವರಲ್ಲಿದ್ದ ಬ್ಯಾಗನ್ನು ಪರೀಕ್ಷಿಸಿದಾಗ ಅದರಲ್ಲಿ ಜೀವಂತವಾಗಿದ್ದ ನವಜಾತ ಮಗು ಇರುವುದು ಗೊತ್ತಾಗುತ್ತದೆ. ತಕ್ಷಣವೇ ಪೊಲೀಸರು ಆ ಇಬ್ಬರು ವ್ಯಕ್ತಿಗಳನ್ನು ವಶಕ್ಕೆ ಪಡೆದುಕೊಂಡು ಮಗುವನ್ನು ಸಮೀಪದ ಆಸ್ಪತ್ರೆಗೆ ದಾಖಲಿಸುತ್ತಾರೆ.

ಮೆಲ್ನೋಟಕ್ಕೆ ಇದೊಂದು ಹೆಣ್ಣು ಶಿಶುವಿನ ಹತ್ಯಾ ಯತ್ನ ಪ್ರಕರಣದಂತೆ ಗೋಚರವಾಗುತ್ತಿದೆ ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ. ವಶಕ್ಕೆ ಪಡೆದುಕೊಂಡಿರುವ ವ್ಯಕ್ತಿಗಳನ್ನು ವಿಚಾರಣೆ ನಡೆಸಲಾಗುತ್ತಿದೆ.