ಚೀನ ಓಪನ್‌: ಮೊದಲ ಸುತ್ತಿನಲ್ಲೇ ಸೋತ ಸೈನಾ

Team Udayavani, Nov 6, 2019, 11:12 PM IST

ಫ‌ುಝು (ಚೀನ): ಪಿ.ವಿ. ಸಿಂಧು ಬಳಿಕ ಇದೀಗ ಸೈನಾ ನೆಹ್ವಾಲ್‌ ಸರದಿ. ಚೀನ ಓಪನ್‌ ಬ್ಯಾಡ್ಮಿಂಟನ್‌ ಪಂದ್ಯಾವಳಿಯಲ್ಲಿ ಸಿಂಧು ಅವರಂತೆ ಸೈನಾ ಕೂಡ ಮೊದಲ ಸುತ್ತಿನಲ್ಲೇ ಸೋತು ಹೊರಬಿದ್ದಿ ದ್ದಾರೆ. ಮತ್ತೂಮ್ಮೆ ಅಂತಾರಾಷ್ಟ್ರೀಯ ಕೂಟದಿಂದ ಬೇಗನೇ ನಿರ್ಗಮಿಸುವ ಸಂಕಟಕ್ಕೆ ಸಿಲುಕಿದ್ದಾರೆ. ಆದರೆ ಪುರುಷರ ಸಿಂಗಲ್ಸ್‌ನಲ್ಲಿ ಪಾರುಪಳ್ಳಿ ಕಶ್ಯಪ್‌, ಬಿ. ಸಾಯಿ ಪ್ರಣೀತ್‌ ಮೊದಲ ಸುತ್ತು ದಾಟುವಲ್ಲಿ ಯಶಸ್ವಿಯಾಗಿದ್ದಾರೆ.

ಬುಧವಾರ ನಡೆದ ಮಹಿಳಾ ಸಿಂಗಲ್ಸ… ವಿಭಾಗದ ಮೊದಲ ಸುತ್ತಿನ ಸ್ಪರ್ಧೆಯಲ್ಲೇ ಸೈನಾ ಸ್ಥಳೀಯ ಫೇವರಿಟ್‌ ಆಟಗಾರ್ತಿ ಕೈ ಯಾನ್‌ ಯಾನ್‌ ವಿರುದ್ಧ 9-21, 12-21 ಅಂತರದಲ್ಲಿ ಸೋಲನುಭವಿಸಿದರು.

7 ಲಕ್ಷ ಅಮೆರಿಕನ್‌ ಡಾಲರ್‌ ಬಹುಮಾನ ಮೊತ್ತ ಹೊಂದಿರುವ ಈ ಟೂರ್ನಿಯಲ್ಲಿ ಒಲಿಂಪಿಕ್‌ ಕಂಚಿನ ಪದಕ ವಿಜೇತೆ ಸೈನಾ ಅವರಿಂದ ಉತ್ತಮ ಪ್ರದರ್ಶನ ನಿರೀಕ್ಷಿಸಲಾಗಿತ್ತು. ಇದು ಸೈನಾ ಪಾಲಿಗೆ ಅನಿವಾರ್ಯವೂ ಆಗಿತ್ತು. ಆದರೆ ಅವರು ಕೇವಲ 24 ನಿಮಿಷಗಳಲ್ಲಿ ಎದುರಾಳಿಗೆ ಶರಣಾಗಿ ನಿರಾಸೆ ಮೂಡಿಸಿದರು. ಇದರೊಂದಿಗೆ ಈ ಕೂಟದಲ್ಲಿ ಭಾರತದ ವನಿತಾ ಸಿಂಗಲ್ಸ್‌ ವಿಭಾಗದ ಸ್ಪರ್ಧೆ ಎರಡೇ ದಿನದಲ್ಲಿ ಮುಗಿದಂತಾಗಿದೆ.

ವರ್ಷಾರಂಭದಲ್ಲಿ ಇಂಡೋನೇಶ್ಯ ಮಾಸ್ಟರ್ ಪ್ರಶಸ್ತಿ ಗೆದ್ದ 29ರ ಹರೆಯದ ಸೈನಾ, ಫ್ರೆಂಚ್‌ ಓಪನ್‌ ಕ್ವಾರ್ಟರ್‌ ಫೈನಲ್‌ ತಲುಪುವ ಮೊದಲು ಸತತ 3 ಬ್ಯಾಡ್ಮಿಂಟನ್‌ ಕೂಟಗಳಲ್ಲೂ ಮೊದಲ ಸುತ್ತಿನಲ್ಲೇ ಆಘಾತ ಅನುಭವಿಸಿದ್ದರು.

ಪ್ರಣವ್‌-ರೆಡ್ಡಿ ಪರಾಭವ
ಮಿಕ್ಸೆಡ್‌ ಡಬಲ್ಸ್‌ನಲ್ಲಿ ಪ್ರಣವ್‌ ಜೆರ್ರಿ ಚೋಪ್ರ-ಸಿಕ್ಕಿ ರೆಡ್ಡಿ ಜೋಡಿ ಚೈನೀಸ್‌ ತೈಪೆಯ ವಾಂಗ್‌ ಚೀ-ಲೀನ್‌ ಮತ್ತು ಚೆಂಗ್‌ ಚಿ ಯಾ ವಿರುದ್ಧ ನಡೆದ ತೀವ್ರ ಹೋರಾಟದಲ್ಲಿ 14-21, 14-21 ಅಂತರದಿಂದ ಸೋತು ಕೂಟದಿಂದ ನಿರ್ಗಮಿಸಿದೆ.

ಕಶ್ಯಪ್‌, ಪ್ರಣೀತ್‌ ಮುನ್ನಡೆ
ಪುರುಷ ಸಿಂಗಲ್ಸ… ವಿಭಾಗದಲ್ಲಿ ಪಿ. ಕಶ್ಯಪ್‌ ಥಾಯ್ಲೆಂಡಿನ ಸಿತಿಕೋಮ್‌ ಥಮಸಿನ್‌ ವಿರುದ್ಧ 21-14, 21-13 ನೇರ ಗೇಮ್‌ಗಳ ಗೆಲುವು ದಾಖಲಿಸಿದರು. 43 ನಿಮಿಷಗಳ ಕಾಲ ಈ ಹೋರಾಟ ಸಾಗಿತು. ಕಶ್ಯಪ್‌ ಅವರ ಮುಂದಿನ ಎದುರಾಳಿ ಡೆನ್ಮಾರ್ಕ್‌ನ ವಿಕ್ಟರ್‌ ಅಲೆಕ್ಸನ್‌.

ಅನಂತರದ ಸಿಂಗಲ್ಸ್‌ನಲ್ಲಿ ಬಿ. ಸಾಯಿ ಪ್ರಣೀತ್‌ ಇಂಡೋನೇಶ್ಯದ ಟಾಮಿ ಸುಗಿಯಾರ್ಟೊ ವಿರುದ್ಧ 3 ಗೇಮ್‌ಗಳ ಹೋರಾಟ ನಡೆಸಿ 15-21, 21-12, 21-10 ಅಂತರದಿಂದ ಗೆದ್ದು ಬಂದರು. ಇವರ ದ್ವಿತೀಯ ಸುತ್ತಿನ ಎದುರಾಳಿ ಡೆನ್ಮಾರ್ಕ್‌ನ ಆ್ಯಂಡ್ರೆಸ್‌ ಆ್ಯಂಟೆನ್ಸೆನ್‌.