ಅಂಬೇಡ್ಕರ್‌ ವಿಚಾರಧಾರೆಗಳ ಗ್ರಹಿಕೆ ಅಗತ್ಯ: ಪ್ರಕಾಶ ದೇಸಾಯಿ

Team Udayavani, Nov 10, 2019, 4:25 PM IST

ಬಳ್ಳಾರಿ: ಮಾಜಿ ಪ್ರಧಾನಿ ದಿ. ಇಂದಿರಾಗಾಂಧಿ  ಅವಧಿಯಲ್ಲಿ ಯಾವುದೇ ಬಿಲ್‌ಗ‌ಳ ಬಗ್ಗೆ ಚರ್ಚೆ, ವಿಮರ್ಶೆಗಳಿಗೆ ಅವಕಾಶವೇ ಇರುತ್ತಿರಲಿಲ್ಲ. ಅವು ನೇರವಾಗಿ ಜಾರಿಯಾಗುತ್ತಿದ್ದರಿಂದ ಅದರ ಪರಿಣಾಮ ನೇರವಾಗಿ ದಲಿತರ ಮೇಲೆ ಪ್ರಭಾವ ಬೀರುತ್ತಿದ್ದು, ತುಳಿತಕ್ಕೊಳಗಾಗಿ ಹಿಂದುಳಿಯಲು ಕಾರಣ ಎಂದು ಗೋವಾ ವಿಶ್ವವಿದ್ಯಾಲಯದ ಪ್ರಾಧ್ಯಾಪಕ ಪ್ರಕಾಶ್‌ ದೇಸಾಯಿ ವಿಷಾದ ವ್ಯಕ್ತಪಡಿಸಿದರು.

ನಗರದ ವಾಲ್ಮೀಕಿ ಭವನದಲ್ಲಿ ಕರ್ನಾಟಕ ರಾಜ್ಯ ದಲಿತ ಸಂಘರ್ಷ ಸಮಿತಿ (ಲಕ್ಷ್ಮೀ ನಾರಾಯಣ ನಾಗವಾರ ಬಣ) ವತಿಯಿಂದ ಹಮ್ಮಿಕೊಳ್ಳಲಾಗಿದ್ದ ಎರಡು ದಿನಗಳ ಅಧ್ಯಯನ ಶಿಬಿರವನ್ನು ಶನಿವಾರ ಉದ್ಘಾಟಿಸಿ ಮಾತನಾಡಿದರು. ಮಾಜಿ ಪ್ರಧಾನಿ ಇಂದಿರಾಗಾಂಧಿ  ಅವಧಿಯಲ್ಲಿ ಸಾಕಷ್ಟು ಯೋಜನೆಯ ಬಿಲ್‌ಗ‌ಳು ಜಾರಿಯಾದರೂ ಅವುಗಳ ಬಗ್ಗೆ ಚರ್ಚೆಗಳೇ ಆಗುತ್ತಿರಲಿಲ್ಲ. ಇದರಿಂದ ಅಂದು ದೇಶದಲ್ಲಿದ್ದ ರೆಡ್ಡಿ, ಲಿಂಗಾಯತ, ಜಾಟ್‌ ಸೇರಿ ಎಲ್ಲ ಸಮುದಾಯಗಳು ತುಳಿತಕ್ಕೊಳಪಟ್ಟಿದ್ದರೂ ಸಹ ದಲಿತರ ಮೇಲೆ ಹೆಚ್ಚಿನ ಪರಿಣಾಮ ಬೀರಿತ್ತು. ಇದರಿಂದಾಗಿ ದೇಶದಲ್ಲಿ ಹಲವಾರು ಪ್ರಾದೇಶಿಕ ರಾಜಕೀಯ ಪಕ್ಷಗಳು ಹುಟ್ಟಿಕೊಂಡವು ಎಂದು ಸ್ಪಷ್ಟಪಡಿಸಿದರು.

ಇಂದಿರಾಗಾಂಧಿ ಬಳಿಕ ವಿ.ಪಿ. ಸಿಂಗ್‌ ಅವಧಿಯಲ್ಲಿ ಮಂಡಲ ಕಮೀಷನ್‌ ಜಾರಿಗೆ ತರಲಾಯಿತು. ಈ ಕಮೀಷನ್‌ನಿಂದ ದಲಿತರಿಗೆ ಎಷ್ಟರ ಮಟ್ಟಿಗೆ ಅನುಕೂಲವಾಯಿತು. ದಲಿತರು ರಾಜಕೀಯವಾಗಿ ಅಭಿವೃದ್ಧಿಯಾಗಿದ್ದಾರಾ? ಎಂದು ಪ್ರಶ್ನಿಸಿದ ಅವರು, ಶೇಟ್‌ ಜೀ, ಭಟ್‌ ಜೀ ಅವರಿಂದ ಎಚ್ಚರ ವಹಿಸಬೇಕಾಗಿದೆ. ಅಂಬೇಡ್ಕರ್‌ ಅವರ ಪ್ರಬುದ್ಧ ಭಾರತದ ಕನಸಿನ ಬಗ್ಗೆ ಮಾತನಾಡುವಾಗ ಮನಸ್ಸುಗಳನ್ನು ಶುದ್ಧಗೊಳಿಸಬೇಕು. ಜ್ಯೋತಿಬಾಪುಲೆ ಹಾಗೂ ಅಂಬೇಡ್ಕರ್‌ ಅವರ ವಿಚಾರಗಳನ್ನು ತಿಳಿಯಬೇಕು ಎಂದು ತಿಳಿಸಿದರು.

ಸಮಿತಿ ರಾಜ್ಯ ಸಂಘಟನಾ ಸಂಚಾಲಕ ಶ್ಯಾಮ್‌ ಘಾಟಗೆ ಮಾತನಾಡಿ, ದೇಶದ ಅಧಿಕಾರ ಕೋಮುವಾದಿ ನಾಯಕರ ಕೈಯಲ್ಲಿದೆ. ನಾವು ಬಂದಿದ್ದೇ ಸಂವಿಧಾನವನ್ನು ಬದಲಾವಣೆ ಮಾಡಲು ಎಂದು ಬಹಿರಂಗವಾಗಿಯೇ ಅವರು ಹೇಳುತ್ತಿದ್ದಾರೆ. ಇನ್ನು ಕೆಲವರು ಮೀಸಲಾತಿಯನ್ನು ಸ್ಥಗಿತಗೊಳಿಸಬೇಕು ಎಂದರೆ, ಮತ್ತೆ ಕೆಲವರು ದಲಿತ ನೌಕರರ ಬಡ್ತಿ ಮೀಸಲಾತಿ ಏಕೆ ಬೇಕು ಎಂದು ಪ್ರಶ್ನಿಸುತ್ತಿದ್ದಾರೆ. ದಲಿತ ಹೋರಾಟ, ಚಳುವಳಿಗಳನ್ನು ಹತ್ತಿಕ್ಕಲು ಕೋಮುವಾದಿ, ಜಾತಿವಾದಿಗಳು ಪ್ರಯತ್ನಿಸುತ್ತಿವೆ. ದಲಿತ ಸಾಹಿತಿ, ಚಿಂತಕರಾದ ದೇವನೂರು ಮಹಾದೇವ, ಡಾ| ಜಿ. ಸಿದ್ದಲಿಂಗಯ್ಯ ಹಿಂದೆ ಹೋರಾಟಗಳನ್ನು ರೂಪಿಸಿ, ಇದೀಗ ನಮಗೆ ಬಿಟ್ಟುಕೊಟ್ಟಿದ್ದು, ಅದನ್ನು ಮುಂದುವರೆಸಬೇಕು ಎಂದು ಕೋರಿದರು.

ಶಿಬಿರದ ಅಧ್ಯಕ್ಷತೆ ವಹಿಸಿದ್ದ ಸಮಿತಿಯ ರಾಜ್ಯ ಸಂಚಾಲಕ ಲಕ್ಷ್ಮೀ ನಾರಾಯಣ ನಾಗವಾರ, ನೋಟ್‌ ಅಮಾನ್ಯೀಕರಣದಿಂದ ದೇಶದಲ್ಲಿ ಅಘೋಷಿತ ತುರ್ತು ಪರಿಸ್ಥಿತಿ ಹೇರಲಾಗಿದೆ. ಆರ್ಥಿಕ ದಿವಾಳಿತನ, ಜಿಎಸ್‌ಟಿಯಿಂದ ಹಲವಾರು ಕೈಗಾರಿಕೆಗಳು ಮುಚ್ಚಿಹೋಗಿವೆ. ಇದರಿಂದ ಪ್ರಜಾಪ್ರಭುತ್ವಕ್ಕೆ ಗಂಡಾಂತರ ಬಂದಂತಾಗಿದೆ. ಇದರ ವಿರುದ್ಧ ಮಾತನಾಡಿದವರ ಮೇಲೆ ಪ್ರಕರಣ ದಾಖಲಿಸಿ ದೇಶದ್ರೋಹಿ ಪಟ್ಟ ಕಟ್ಟಲಾಗುತ್ತಿದೆ. ಇದರ ಬಗ್ಗೆ ಸಾರ್ವಜನಿಕವಾಗಿ ಚರ್ಚಿಸಿ ಹೊಸ ಇತಿಹಾಸ ಸೃಷ್ಟಿಸಬೇಕಾಗಿದೆ. ಹಸಿವು, ಅಸಮಾನತೆಯನ್ನು ಹೋಗಲಾಡಿಸಬೇಕೆಂಬ ಅಂಬೇಡ್ಕರ್‌ ಆಶಯಗಳಿಗೆ ಕೊಡಲಿಪೆಟ್ಟು ಬೀಳಲಿದೆ ಎಂದರು.

ರಾಜ್ಯ ಖಜಾಂಚಿ ಕೆಂಪಣ್ಣ ಸಾಗ್ಯ ಮಾತನಾಡಿದರು. ಇದಕ್ಕೂ ಮುನ್ನ ಅಂಬೇಡ್ಕರ್‌ ಭಾವಚಿತ್ರಕ್ಕೆ ಪುಷ್ಪ ಅರ್ಪಿಸಿ ಗೌರವ ಸೂಚಿಸಲಾಯಿತು. ಬಳಿಕ  ವಿವಿಧ ಗೋಷ್ಠಿಗಳು ನಡೆದವು. ಶಿಬಿರದಲ್ಲಿ ಸಮಿತಿಯ ರಾಜ್ಯ ಸಂಘಟನಾ ಸಂಚಾಲಕ ಕಲ್ಲಪ್ಪ ಕಾಂಬಳೆ, ಶರಣಪ್ಪ ಲೆಬಗೇರಿ, ಜೀವನಹಳ್ಳಿ ಆರ್‌.ವೆಂಕಟೇಶ್‌, ಪ್ರೇಮಾ ವಸಂತ್‌, ಗೌರಮ್ಮ ದೊಡ್ಡಮನಿ, ಗೀತಾದೇವಿ ರಾಥೋಡ್‌, ವೈ.ಕೆ.ಬುಡ್ಡಮ್ಮನವರ ಸೇರಿದಂತೆ ಹಲವರು ಇದ್ದರು. ವೆಂಕಟೇಶ್‌ ಮೂರ್ತಿ ಕಾರ್ಯಕ್ರಮ ನಿರ್ವಹಿಸಿದರು.