ರೈತರ ನಿದ್ದೆ ಗೆಡಿಸಿದ ಹರಕೆ ಗೂಳಿಗಳು

Team Udayavani, Nov 18, 2019, 10:55 AM IST

ಮಡಿವಾಳಪ್ಪ ಹೇರೂರ
ವಾಡಿ: ಮಂಗ, ಕಾಡು ಹಂದಿ, ಹೆಗ್ಗಣ ಹೀಗೆ ಪ್ರಾಣಿಗಳು ಮತ್ತು ಕಾಳು ಕಡಿಯುವ ಕೀಟಗಳಿಂದ ಬಿತ್ತಿದ ಬೆಳೆ ರಕ್ಷಣೆ ಮಾಡುವುದು ಎಂದರೆ ರೈತರ ಪಾಲಿಗೆ ದೊಡ್ಡ ಸವಾಲೇ ಸರಿ. ಇಂತಹದ್ದರಲ್ಲಿ ಹರಕೆ ಗೂಳಿಗಳಿಂದ ಬೆಳೆ ರಕ್ಷಿಸುವುದೇ ಇನ್ನೊಂದು ಸವಾಲಾಗಿದ್ದು, ಇದರಿಂದ ನಾಲವಾರ ವಲಯದ ವಿವಿಧ ಗ್ರಾಮಗಳ ರೈತರು ಕಂಗೆಟ್ಟಿದ್ದಾರೆ.

ಸುಗೂರು (ಎನ್‌), ಮಾರಡಗಿ, ತುನ್ನೂರ, ಮಳಗ ಹೀಗೆ ಕೆಲ ಗ್ರಾಮಗಳ ವ್ಯಾಪ್ತಿಯ ಜಮೀನುಗಳಲ್ಲೀಗ ಹರಕೆ ಗೂಳಿಗಳ ಉಪಟಳ ಹೆಚ್ಚಾಗಿ ಕಂಡು ಬರುತ್ತಿದ್ದು, ಬೆಳೆ ರಕ್ಷಿಸಲು ರೈತರು ಹಗಲು ರಾತ್ರಿ ನಿದ್ದೆಗೆಟ್ಟು ಕಾವಲು ಕಾಯುವಂತಾಗಿದೆ. ಸಾಮೂಹಿಕವಾಗಿ ದಾಳಿಯಿಡುವ ಈ ಗೂಳಿಗಳ ಹಿಂಡು ಫಸಲನ್ನೇ ಕಿತ್ತು ಬೀಸಾಡುತ್ತಿವೆ. ಬೆಳೆಗಳ ಪೈರು ಕಿತ್ತು ಹೊಲ ನಾಶಗೊಳಿಸುತ್ತಿವೆ. ಹೀಗಾಗಿ ಕೈಗೆ ಬಂದ ತುತ್ತು ಬಾಯಿಗೆ ಬರದಂತಾಗಿದೆ ಎಂದು ರೈತರು ಅಳಲು ತೋಡಿಕೊಂಡಿದ್ದಾರೆ.

ಕಳೆದ ಎರಡ್ಮೂರು ವರ್ಷಗಳಿಂದ ಇಲ್ಲಿಯೇ ಬೀಡು ಬಿಟ್ಟಿರುವ ನೂರಾರು ಗೂಳಿಗಳು, ಮೇವು ಅರಸಿ ಅಡವಿಗೆ ಹೋಗುತ್ತವೆ ಮರಳಿ ಇಲ್ಲಿಯೇ ಠಿಕಾಣಿ ಹೂಡುತ್ತವೆ. ಬೆಳೆ ರಕ್ಷಿಸಲೆಂದು ಬೆದರಿಸಲು ಮುಂದಾದರೆ ದುರುಗುಟ್ಟಿ ನೋಡುತ್ತವೆ. ಕಲ್ಲು ಕಟ್ಟಿಗೆಯಿಂದ ತಿವಿಯಲು ಹೋದರೆ ಮಣ್ಣು ಕೆದರಿ ಇರಿಯಲು ಬರುತ್ತವೆ.

ಹೊಲಗಳಲ್ಲಿನ ತೊಗರಿ, ಹತ್ತಿ, ಜೋಳ, ಕಡಲೆ, ಶೇಂಗಾ ಬೆಳೆಗಳನ್ನು ತಿಂದು ಕಲ್ಲು ಗಣಿಗಳಲ್ಲಿ ನೀರು ಕುಡಿದು ಡುರ್ಕಿ ಹೊಡೆಯುತ್ತಿವೆ. ಹೊಲ ಬಿಟ್ಟು ಕಾಲು ಕಿತ್ತದ ಗೂಳಿಗಳಿಂದ ನೆಮ್ಮದಿ ಕದಡಿದೆ. ಇದರಿಂದ ಕೃಷಿ ಚಟುವಟಿಕೆ ಮೇಲೆ ದುಷ್ಪರಿಣಾಮ ಬೀರುತ್ತಿದೆ. ಆರ್ಥಿಕ ನಷ್ಟದಿಂದ ಸಾಲದ ಶೂಲಕ್ಕೆ ಸಿಲುಕುವಂತಾಗಿದೆ ಎಂದು ರೈತರು “ಉದಯವಾಣಿ’ ಎದುರು ಕಷ್ಟ ಹೇಳಿಕೊಂಡಿದ್ದಾರೆ.

ಜೋಳ ಬಿತ್ತನೆ ಕೈಬಿಟ್ಟ ರೈತರು: ಜೋಳ ಬೆಳೆಯುವಲ್ಲಿ ಮುಂದಿದ್ದ ನಾಲವಾರ ವಲಯದ ಭೂಮಿಗಳು ಜೋಳದ ಬೆಳೆಯಿಂದ ವಂಚಿತಗೊಂಡಿವೆ. ಈ ಹಿಂದೆ ತಾಂಡಾ ಜನರು ತಾವು ಬೆಳೆದ ಗೆಣಸು ಕೊಟ್ಟು ನಾಲವಾರ ರೈತರಿಂದ ಜೋಳ ಪಡೆಯುತ್ತಿದ್ದರು. ಆದರೀಗ ನಾಲವಾರದ ರೈತರೇ ತಾಂಡಾಗಳಿಗೆ ಹೋಗಿ ಜೋಳ ತರಬೇಕಾದ ದುಸ್ಥಿತಿ ನಿಮಾರ್ಣವಾಗಿದೆ.

ಗೂಳಿಗಳಿಗೆ ಹೆದರಿ ನಾಲವಾರ, ಸುಗೂರು (ಎನ್‌), ಮಾರಡಗಿ ಗ್ರಾಮದ ರೈತರು ಜೋಳ ಬೆಳೆಯುವುದನ್ನೇ ಕೈಬಿಟ್ಟಿದ್ದಾರೆ. ಯಾವುದೇ ಬೆಳೆ ಬೆಳೆದರೂ ಹೊಲಕ್ಕೆ ತಂತಿ ಬೇಲಿ ಹಾಕುವುದು ಕಡ್ಡಾಯವಾಗಿದೆ. ರಾತ್ರಿ ಹಗಲು ಹೊಲದ ಸುತ್ತ ಗಸ್ತು ತಿರುಗದಿದ್ದರೆ ಗೂಳಿ ದಾಳಿಗೆ ಇಡೀ ಹೊಲ ಸರ್ವನಾಶ ಹೊಂದುವ ಆತಂಕ ರೈತರಲ್ಲಿ ಮನೆಮಾಡಿದೆ. ಬಿತ್ತನೆ ಮಾಡಿದ ದಿನದಿಂದ ರಾಶಿಯಾಗಿ ದವಸಧಾನ್ಯ ಮನೆ ಸೇರುವವರೆಗೂ ಗೂಳಿಗಳಿಂದ ಬೆಳೆ ರಕ್ಷಣೆ ಮಾಡಬೇಕಾದ ಪರಿಸ್ಥಿತಿ ಬಂದಿರುವುದು ರೈತರ ನೋವಿಗೆ ಕಾರಣವಾಗಿದೆ.