ಪಿಬಿಎಲ್‌: ಸಿಂಧು, ತೈ ಜು 77 ಲಕ್ಷ ರೂ.ಗೆ ಮಾರಾಟ

Team Udayavani, Nov 27, 2019, 12:37 AM IST

ಹೊಸದಿಲ್ಲಿ: ವಿಶ್ವ ಚಾಂಪಿಯನ್‌ ಪಿ.ವಿ. ಸಿಂಧು ಅವರನ್ನು ಪ್ರೀಮಿಯರ್‌ ಬ್ಯಾಡ್ಮಿಂಟನ್‌ ಲೀಗ್‌ (ಪಿಬಿಎಲ್‌)ನ ಐದನೇ ಋತುವಿಗಾಗಿ ನಡೆದ ಹರಾಜಿನಲ್ಲಿ ಹೈದರಾಬಾದ್‌ ಹಂಟರ್ 77 ಲಕ್ಷ ರೂ.ಗಳಿಗೆ ತನ್ನಲ್ಲಿ ಉಳಿಸಿಕೊಂಡಿದೆ.

ವನಿತಾ ಸಿಂಗಲ್ಸ್‌ನಲ್ಲಿ ವಿಶ್ವದ ನಂಬರ್‌ ವನ್‌ ತಾರೆ ಚೈನೀಸ್‌ ತೈಪೆಯ ತೈ ಜು ಯಿಂಗ್‌ ಕೂಡ ಸಿಂಧು ಅವರಂತೆ 77 ಲಕ್ಷ ರೂ.ಗಳಿಗೆ ಮಾರಾಟವಾಗಿದ್ದಾರೆ. ತೈ ಜು ಅವರನ್ನು ಖರೀದಿಸಲು ಹಾಲಿ ಚಾಂಪಿಯನ್‌ ಬೆಂಗಳೂರು ರಾಪ್ಟರ್ ಮತ್ತು ಪುಣೆ 7 ಏಸಸ್‌ ತೀವ್ರ ಸ್ಪರ್ಧೆ ನಡೆಸಿದ್ದವು. ಅಂತಿಮವಾಗಿ ಬೆಂಗಳೂರು ರಾಪ್ಟರ್ ತೈ ಜು ಅವರನ್ನು ಖರೀದಿಸುವಲ್ಲಿ ಯಶಸ್ವಿಯಾಯಿತು. ಹೀಗಾಗಿ ಸಿಂಧು ಮತ್ತು ತೈ ಜು ಗರಿಷ್ಠ ಮೊತ್ತಕ್ಕೆ ಮಾರಾಟಗೊಂಡ ಆಟಗಾ ರ್ತಿಯರಾಗಿ ಕಾಣಿಸಿಕೊಂಡರು.

ಭಾರತದ ಬಿ. ಸಾಯಿ ಪ್ರಣೀತ್‌ ಅವರನ್ನು ಕೂಡ ಬೆಂಗಳೂರು ರಾಪ್ಟರ್ 32 ಲಕ್ಷ ರೂ.ಗಳಿಗೆ ತನ್ನಲ್ಲಿ ಉಳಿಸಿ ಕೊಂಡಿದೆ. ಡಬಲ್ಸ್‌ ಆಟಗಾರರಾದ ಬಿ. ಸುಮೀತ್‌ ರೆಡ್ಡಿ ( 11 ಲಕ್ಷ ರೂ. ಚೆನ್ನೈ ಸೂಪರ್‌ಸ್ಟಾರ್), ಚಿರಾಗ್‌ ಶೆಟ್ಟಿ (15.50 ಲಕ್ಷ ರೂ. ಪುಣೆ 7 ಏಸಸ್‌) ಅವರು ಕಳೆದ ವರ್ಷ ಆಡಿದ ಫ್ರಾಂಚೈಸಿನಲ್ಲಿ ಈ ಬಾರಿಯೂ ಆಡಲಿದ್ದಾರೆ. ರಾಷ್ಟ್ರೀಯ ಕೋಚ್‌ ಪುಲ್ಲೇಲ ಗೋಪಿಚಂದ್‌ ಅವರ ಪುತ್ರಿ ಗಾಯತ್ರಿ ಅವರನ್ನು ಚೆನ್ನೈ ಸೂಪ ರ್‌ಸ್ಟಾರ್ ಖರೀದಿಸಿದರೆ ಅಸ್ಸಾಂನ ಯುವ ಶಟ್ಲರ್‌ ಅಸ್ಮಿತಾ ಚಲಿಹಾ 3 ಲಕ್ಷ ರೂ.ಗಳಿಗೆ ತವರಿನ ತಂಡ ನಾರ್ತ್‌ ಈಸ್ಟರ್ನ್ ವಾರಿಯರ್ ಖರೀದಿಸಿದೆ. ತಮ್ಮ ಅಂತಾರಾಷ್ಟ್ರೀಯ ಬಾಳ್ವೆಗೆ ಹೆಚ್ಚಿನ ಗಮನ ಹರಿಸುವ ಉದ್ದೇಶದಿಂದ ಸೈನಾ ಮತ್ತು ಕೆ. ಶ್ರೀಕಾಂತ್‌ ಈ ಬಾರಿ ಕೂಟದಿಂದ ಹಿಂದೆ ಸರಿಯಲು ನಿರ್ಧರಿಸಿದ್ದಾರೆ.