ಬಿಜೆಪಿಗೆ ಸಮೀಕ್ಷೆಯ ಆತಂಕ

Team Udayavani, Nov 28, 2019, 6:30 AM IST

ಬೆಂಗಳೂರು: ಉಪ ಚುನಾವಣೆ ಕಣ ರಂಗೇರುತ್ತಿದ್ದು, ಸದ್ಯದ ಪರಿಸ್ಥಿತಿಯಲ್ಲಿ 4 ಕ್ಷೇತ್ರಗಳಲ್ಲಿ ಬಿಜೆಪಿಗೆ ಹಿನ್ನಡೆ ಆಗುವ ಸಾಧ್ಯತೆ ಇದೆ, 4 ಕಡೆ ತೀವ್ರ ಹಣಾಹಣಿ ನಡೆಯಲಿದೆ ಎಂಬುದು ಪಕ್ಷದ ಕೈಸೇರಿರುವ ಸಮೀಕ್ಷಾ ವರದಿಗಳಿಂದ ಗೊತ್ತಾಗಿದೆ. ಉಳಿದಂತೆ 8 ಕ್ಷೇತ್ರಗಳು ಬಿಜೆಪಿಗೆ ಆಶಾದಾಯಕವಾಗಿರುವ ಬಗ್ಗೆಯೂ ವರದಿ ಉಲ್ಲೇಖೀಸಿದೆ. ಈ ವರದಿಗಳ ಆಧಾರದಲ್ಲಿ ಬದಲಾದ ಪರಿಸ್ಥಿತಿಗೆ ಪೂರಕವಾಗಿ ಕಾರ್ಯತಂತ್ರ ಹೆಣೆದು ಗೆಲುವು ಸಾಧಿಸುವತ್ತ ಶ್ರಮಿಸಲು ಬಿಜೆಪಿ ನಾಯಕರು ಗಮನ ಹರಿಸಿದ್ದಾರೆ ಎಂದು ಮೂಲಗಳು ಹೇಳಿವೆ.

ನಾಲ್ಕು ಕ್ಷೇತ್ರಗಳಲ್ಲಿ ಹಿನ್ನಡೆ
ಪ್ರತಿಷ್ಠಿತ ಕ್ಷೇತ್ರಗಳೆನಿಸಿರುವ ಕೆ.ಆರ್‌. ಪೇಟೆ, ಹುಣಸೂರು, ಶಿವಾಜಿ ನಗರ ಮತ್ತು ಕಾಗವಾಡಗಳಲ್ಲಿ ಸದ್ಯ ಬಿಜೆಪಿಗೆ ತುಸು ಹಿನ್ನಡೆಯ ವಾತಾವರಣ ವಿರುವುದು ಗೊತ್ತಾಗಿದೆ.

ಮೂರು ಕಡೆ ತೀವ್ರ ಹಣಾಹಣಿ
ಹೊಸಕೋಟೆ, ಯಶವಂತಪುರ ಮತ್ತು ಚಿಕ್ಕಬಳ್ಳಾಪುರಗಳಲ್ಲೂ ತೀವ್ರ ಹಣಾಹಣಿ ನಡೆಯುವ ಲಕ್ಷಣ ಕಂಡು ಬಂದಿದ್ದು, ಬಿ’ ವಲಯದಲ್ಲಿವೆ ಎಂದು ಸಮೀಕ್ಷೆ ಹೇಳಿದೆ. ಹೊಸಕೋಟೆಯಲ್ಲಿ ಶರತ್‌ ಬಚ್ಚೇಗೌಡ ಸ್ಪರ್ಧೆಯಿಂದಾಗಿ ಹಿನ್ನಡೆಯಾಗುವ ಸಾಧ್ಯತೆ ಬಗ್ಗೆಯೂ ಉಲ್ಲೇಖವಾಗಿದೆ.

ಎ’ ವಲಯದಲ್ಲಿ ಎಂಟು ಕ್ಷೇತ್ರ
ಮಹಾಲಕ್ಷ್ಮೀ ಲೇಔಟ್‌, ಕೆ.ಆರ್‌. ಪುರ, ಯಲ್ಲಾಪುರ, ಗೋಕಾಕ, ಅಥಣಿ, ವಿಜಯನಗರ (ಹೊಸಪೇಟೆ), ಹಿರೇ ಕೆರೂರುಗಳಲ್ಲಿ ಸದ್ಯ ಬಿಜೆಪಿಗೆ ಪೂರಕ ವಾತಾವರಣವಿದೆ ಎಂದು ಸಮೀಕ್ಷೆ ಹೇಳಿದೆ. ರಾಣೆಬೆನ್ನೂರಿನಲ್ಲಿದ್ದ ಸಮಸ್ಯೆ ಬಗೆಹರಿಸಲಾಗಿದ್ದು, ಎ’ ವಲಯ ದಲ್ಲಿದೆ ಎಂದು ಸಮೀಕ್ಷೆ ಹೇಳಿದೆ.

ಕಾರ್ಯತಂತ್ರ ಬದಲು
ಮತದಾನಕ್ಕೆ ವಾರ ವಷ್ಟೇ ಬಾಕಿಯಿದ್ದು, ಹಿನ್ನಡೆಯಾಗಲಿರುವ ಮತ್ತು ತೀವ್ರ ಹಣಾಹಣಿ ನಡೆಯುವ ಕ್ಷೇತ್ರಗಳತ್ತ ಹೆಚ್ಚು ಗಮನಹರಿಸಲು ಬಿಜೆಪಿ ನಿರ್ಧರಿಸಿದೆ. ಸ್ಥಳೀಯ ಪರಿಸ್ಥಿತಿಗೆ ಪೂರಕ ವಾಗಿ ಪ್ರಮುಖ ವಿಚಾರಗಳನ್ನು ಪ್ರಸ್ತಾವಿಸುವ ಜತೆಗೆ ಅಭ್ಯರ್ಥಿ ಗೆದ್ದರೆ ಸಚಿವರಾಗಿ ಕ್ಷೇತ್ರದಲ್ಲಿ ಹೆಚ್ಚು ಅಭಿವೃದ್ಧಿ ಕಾರ್ಯ ನಡೆಯಲಿದೆ ಎಂಬ ಅಂಶವನ್ನೇ ಒತ್ತಿ ಹೇಳುವಂತೆ ಮುಖಂಡರು, ಕಾರ್ಯಕರ್ತರಿಗೆ ಸೂಚನೆ ನೀಡಲಾಗಿದೆ ಎನ್ನಲಾಗಿದೆ.

ಎಂ. ಕೀರ್ತಿಪ್ರಸಾದ್‌