ಡೇವಿಸ್‌ ಕಪ್‌ ಟೆನಿಸ್‌: ಪಾಕ್‌ ಪರದಾಟ; ಎರಡೂ ಸಿಂಗಲ್ಸ್‌ ಗೆದ್ದ ಭಾರತ

Team Udayavani, Nov 29, 2019, 11:55 PM IST

ರಾಮ್‌ಕುಮಾರ್‌ ರಾಮನಾಥನ್‌

ನುರ್‌ ಸುಲ್ತಾನ್‌ (ಕಜಾಕ್‌ಸ್ಥಾನ್‌): ಪಾಕಿಸ್ಥಾನ ವಿರುದ್ಧದ ಡೇವಿಸ್‌ ಕಪ್‌ ಮುಖಾಮುಖೀಯಲ್ಲಿ ನೆಚ್ಚಿನ ಭಾರತ ತನ್ನ ಛಾತಿಗೆ ತಕ್ಕ ಪ್ರದರ್ಶನ ನೀಡಿದೆ. ಮೊದಲೆರಡೂ ಸಿಂಗಲ್ಸ್‌ ಪಂದ್ಯಗಳನ್ನು ಗೆದ್ದು 2-0 ಮುನ್ನಡೆ ಸಾಧಿಸಿದೆ.

ತಟಸ್ಥ ತಾಣವಾದ ಕಜಾಕ್‌ಸ್ಥಾನದ ನುರ್‌ ಸುಲ್ತಾನ್‌ನಲ್ಲಿ ಶುಕ್ರವಾರ ನಡೆದ ಮೊದಲ ಸುತ್ತಿನ ಸಿಂಗಲ್ಸ್‌ನಲ್ಲಿ ರಾಮ್‌ಕುಮಾರ್‌ ರಾಮನಾಥನ್‌ ಮತ್ತು ಸುಮಿತ್‌ ನಾಗಲ್‌ ಸುಲಭ ಗೆಲುವನ್ನು ತಮ್ಮದಾಗಿಸಿಕೊಂಡರು.

ಮೊದಲ ಸಿಂಗಲ್ಸ್‌ನಲ್ಲಿ ರಾಮ್‌ಕುಮಾರ್‌ ರಾಮನಾಥನ್‌ 17ರ ಹರೆಯದ ಎದುರಾಳಿ ಮುಹಮ್ಮದ್‌ ಶೋಯಿಬ್‌ ಅವರಿಗೆ ಒಂದೂ ಅಂಕ ಬಿಟ್ಟುಕೊಡದೆ 6-0, 6-0 ಅಂತರದ ಅಮೋಘ ಜಯ ಸಾಧಿಸಿದರು. ಕೇವಲ 42 ನಿಮಿಷಗಳಲ್ಲಿ ಈ ಪಂದ್ಯ ಮುಗಿಯಿತು.

ಸುಮಿತ್‌ ನಾಗಲ್‌ ದ್ವಿತೀಯ ಸಿಂಗಲ್ಸ್‌ನಲ್ಲಿ ಹುಫೈಜ ಮೊಹಮ್ಮದ್‌ ರೆಹಮಾನ್‌ ಅವರಿಗೆ 6-0, 6-2 ಅಂತರದ ಸೋಲುಣಿಸಿದರು. ಇದು ಡೇವಿಸ್‌ ಕಪ್‌ನಲ್ಲಿ ಸುಮಿತ್‌ ಸಾಧಿಸಿದ ಮೊದಲ ಗೆಲುವು. ಇದಕ್ಕೆ 64 ನಿಮಿಷ ತಗುಲಿತು.

ಈ ಪಂದ್ಯಾವಳಿಯನ್ನು ತಟಸ್ಥ ಕೇಂದ್ರಕ್ಕೆ ಸ್ಥಳಾಂತರಿಸಿದ್ದ ರಿಂದ ಪಾಕಿಸ್ಥಾ ನದ ಅಗ್ರ ಶ್ರೇಯಾಂಕದ ಟೆನಿಸಿಗರು ಕೂಟ ವನ್ನು ಬಹಿಷ್ಕರಿಸಿದ್ದರು. ಹೀಗಾಗಿ ಪಾಕ್‌ ಜೂನಿಯರ್‌ ಆಟಗಾರರು ಕಣಕ್ಕಿಳಿದಿದ್ದರು.

ಇಂದು ಡಬಲ್ಸ್‌ ಮುಖಾಮುಖೀ
ಶನಿವಾರದ ಡಬಲ್ಸ್‌ನಲ್ಲಿ ಲಿಯಾಂಡರ್‌ ಪೇಸ್‌-ಜೀವನ್‌ ನೆಡುಂಚೆಜಿಯನ್‌ ಪಾಕಿಸ್ಥಾನದ ಹುಫೈಜ-ಶೋಯಿಬ್‌ ವಿರುದ್ಧ ಆಡಲಿದ್ದಾರೆ. ಡೇವಿಸ್‌ ಕಪ್‌ ಚರಿತ್ರೆಯಲ್ಲಿ ಅತ್ಯಧಿಕ 43 ಡಬಲ್ಸ್‌ ಪಂದ್ಯಗಳನ್ನು ಜಯಿಸಿದ ತಮ್ಮ ದಾಖಲೆಯನ್ನು ವಿಸ್ತರಿಸುವ ಉತ್ತಮ ಅವಕಾಶ ಪೇಸ್‌ ಮುಂದಿದೆ. ಇನ್ನೊಂದೆಡೆ ನೆಡುಂಚೆಜಿಯನ್‌ ಪಾಲಿಗೆ ಇದು ಡೇವಿಸ್‌ ಕಪ್‌ ಪದಾರ್ಪಣ ಪಂದ್ಯವಾಗಲಿದೆ.

ವಿಜೇತ ತಂಡ ಕ್ರೊವೇಶಿಯಾಕ್ಕೆ ತೆರಳಿ ವರ್ಲ್ಡ್ ಗ್ರೂಪ್‌ ಕ್ವಾಲಿಫೈಯರ್ ಪಂದ್ಯವನ್ನು ಆಡಲಿದೆ. ಈ ಪಂದ್ಯ ಮಾರ್ಚ್‌ 6 ಮತ್ತು 7ರಂದು ನಡೆಯಲಿದೆ.