ಕಡಲೆಕಾಯಿ ಪರಿಷೆಯಲ್ಲಿ “ಸಲಗ’ ಕ್ಲೈಮ್ಯಾಕ್ಸ್‌

Team Udayavani, Dec 8, 2019, 6:03 AM IST

ಸಿನಿಮಾದವರು ನೈಜತೆ ಬಯಸೋದು ಜಾಸ್ತಿ. ಆದರೆ, ನೈಜತೆಯಲ್ಲಿ ಚಿತ್ರೀಕರಣ ಮಾಡೋದು ಮಾತ್ರ ಕಷ್ಟದ ಕೆಲಸ. ಅದರಲ್ಲೂ ಜಾತ್ರೆ, ಸಮಾರಂಭಗಳ ನಡುವೆ ಚಿತ್ರೀಕರಣ ಮಾಡೋದೆಂದರೆ ಅದು ಸುಲಭದ ಕೆಲಸವಲ್ಲ. ಅದರಲ್ಲೂ ಸ್ಟಾರ್‌ ನಟರನ್ನು ಇಟ್ಟುಕೊಂಡು ಔಟ್‌ಡೋರ್‌ನಲ್ಲಿ ಚಿತ್ರೀಕರಣ ರಿಸ್ಕ್ನ ಕೆಲಸ. ಆದರೆ, “ಸಲಗ’ ಚಿತ್ರತಂಡ ಮಾತ್ರ ಆ ತರಹದ ಒಂದು ಸವಾಲನ್ನು ಯಶಸ್ವಿಯಾಗಿ ಜಯಿಸಿದೆ.

ಹೌದು, “ದುನಿಯಾ’ ವಿಜಯ್‌ ನಿರ್ದೇಶನದ “ಸಲಗ’ ಚಿತ್ರದ ಕ್ಲೈಮ್ಯಾಕ್ಸ್‌ ಚಿತ್ರೀಕರಣ ಇತ್ತೀಚೆಗೆ ಬಸವನಗುಡಿಯ ಕಡಲೆಕಾಯಿ ಪರಿಷೆಯಲ್ಲಿ ನಡೆದಿದೆ. 50 ಸಾವಿರಕ್ಕೂ ಹೆಚ್ಚು ಜನರು ಸೇರಿದ್ದ ಪರಿಷೆಯಲ್ಲಿ ದುನಿಯಾ ವಿಜಯ್‌ ಹಾಗೂ ತಂಡ “ಸಲಗ’ದ ಕ್ಲೈಮ್ಯಾಕ್ಸ್‌ನ ಪ್ರಮುಖ ದೃಶ್ಯಗಳನ್ನು ಚಿತ್ರೀಕರಿಸಿಕೊಂಡಿದೆ. ಪರಿಷೆ ಮುಗಿದರೂ ಮತ್ತೇ ಮೂರು ದಿನಗಳ ಕಾಲ ಆ ವಾತಾವರಣವನ್ನು ರೀಕ್ರಿಯೇಟ್‌ ಮಾಡಿ, ಚಿತ್ರೀಕರಣ ಮಾಡಲಿದೆ ಚಿತ್ರತಂಡ. ಈ ಮೂಲಕ “ಸಲಗ’ ಕ್ಲೈಮ್ಯಾಕ್ಸ್‌ಗೆ ನೈಜತೆಯ ಸ್ಪರ್ಶ ನೀಡಿದೆ.

ಚಿತ್ರದ ಬಹುತೇಕ ಚಿತ್ರೀಕರಣ ಮುಗಿದಿದ್ದು, ಫೈಟ್‌ ಹಾಗೂ ಹಾಡುಗಳ ಚಿತ್ರೀಕರಣ ಬಾಕಿ ಇದೆ. ಚಿತ್ರದ ಫೈಟ್‌ವೊಂದನ್ನು ಕಲಾಸಿಪಾಳ್ಯದಲ್ಲಿ ಚಿತ್ರೀಕರಿಸುವ ಯೋಜನೆಯೂ ಚಿತ್ರತಂಡಕ್ಕಿದೆ. ಚಿತ್ರದ ಇಂಟ್ರೋಡಕ್ಷನ್‌ ಹಾಡು ಬಾಕಿ ಇದ್ದು, ಅದನ್ನೂ ಅದ್ಧೂರಿಯಾಗಿ ಚಿತ್ರೀಕರಿಸಲು ಮುಂದಾಗಿದೆ. ಕೆ.ಪಿ.ಶ್ರೀಕಾಂತ್‌ ನಿರ್ಮಾಣದ ಈ ಚಿತ್ರವನ್ನು “ದುನಿಯಾ’ ವಿಜಯ್‌ ನಿರ್ದೇಶಿಸುತ್ತಿದ್ದಾರೆ. ಇದು ಅವರ ನಿರ್ದೇಶನದ ಚೊಚ್ಚಲ ಚಿತ್ರ.