ಯಾವ ಮೈದಾನದಲ್ಲೂ ಸಿಕ್ಸರ್‌ ಬಾರಿಸಬಲ್ಲೆ: ಶಿವಂ ದುಬೆ

Team Udayavani, Dec 10, 2019, 1:22 PM IST

ತಿರುವನಂತಪುರಂ: ಸಾಮರ್ಥ್ಯವೊಂದಿದ್ದರೆ ಸಾಕು, ಯಾವುದೇ ಮೈದಾನ ದಲ್ಲೂ ಸಿಕ್ಸರ್‌ ಬಾರಿಸಬಹುದು ಎಂದು ಆಲ್‌ರೌಂಡರ್‌ ಶಿವಂ ದುಬೆ ಹೇಳಿದ್ದಾರೆ.

ವಿಂಡೀಸ್‌ ವಿರುದ್ದದ ದ್ವಿತೀಯ ಟಿ20 ಪಂದ್ಯದಲ್ಲಿ ಬಡ್ತಿ ಪಡೆದು ಬಂದ ದುಬೆ 30 ಎಸೆತಗಳಲ್ಲಿ 54 ರನ್‌ ಸಿಡಿಸಿದ ಬಳಿಕ ಸುದ್ದಿಗಾರರೊಂದಿಗೆ ಮಾತನಾ ಡಿದರು.

ನಮ್ಮಲ್ಲಿ ಸಾಮರ್ಥ್ಯವೊಂದಿದ್ದರೆ ಏನು ಬೇಕಾದರೂ ಸಾಧನೆ ಮಾಡಬಹುದು. ತಿರುವನಂತಪುರದ ಮೈದಾನ ಬಹಳ ದೊಡ್ಡದಾಗಿದೆ. ಇಲ್ಲಿ ಸಿಕ್ಸರ್‌ ಬಾರಿಸುವುದು ಅಷ್ಟು ಸುಲಭವಲ್ಲ. ಆದರೆ ನನಗೆ ಮಾತ್ರ ಯಾವುದೇ ಕಷ್ಟ ಎನಿಸಲಿಲ್ಲ. ಮೈದಾನ ಎಷ್ಟೇ ದೊಡ್ಡದಿದ್ದರೂ ಸಲೀಸಾಗಿ ಸಿಕ್ಸರ್‌ ಬಾರಿಸುವ ಸಾಮರ್ಥ್ಯ ನನ್ನಲ್ಲಿದೆ’ ಎಂದು ದುಬೆ ಹೇಳಿದರು.

ತನ್ನ ಮೇಲೆ ವಿಶ್ವಾಸವಿರಿಸಿ 3ನೇ ಕ್ರಮಾಂಕದಲ್ಲಿ ಆಡಲು ಅವಕಾಶ ನೀಡಿದ ನಾಯಕ ವಿರಾಟ್‌ ಕೊಹ್ಲಿ ಮತ್ತು ತನಗೆ ಸಂಪೂರ್ಣ ಬೆಂಬಲವಿತ್ತ ರೋಹಿತ್‌ ಶರ್ಮ ಅವರಿಗೆ ದುಬೆ ಧನ್ಯವಾದ ಸಲ್ಲಿಸಿದರು.