ಅಂಪಾಯರ್‌ ದಾರ್‌ಗೆ ಕಿವೀಸ್‌ ಕ್ರಿಕೆಟಿಗ ಢಿಕ್ಕಿ

Team Udayavani, Dec 14, 2019, 11:18 PM IST

ವಿಶ್ವದಾಖಲೆಯ ಅಂಪಾಯರ್‌ ಪಾಕಿಸ್ಥಾನದ ಅಲೀಂ ದಾರ್‌ ಪರ್ತ್‌ ಟೆಸ್ಟ್‌ ಪಂದ್ಯದ 3ನೇ ದಿನದಾಟದ ವೇಳೆ ನ್ಯೂಜಿಲ್ಯಾಂಡ್‌ ಕ್ರಿಕೆಟಿಗನಿಂದ ಢಿಕ್ಕಿಯಾಗಿ ಅಂಗಳಕ್ಕೆ ಉರುಳಿ ಬಿದ್ದ ಘಟನೆ ಸಂಭವಿಸಿದೆ.

ಟಿಮ್‌ ಸೌಥಿ ಆಸೀಸ್‌ ಬ್ಯಾಟ್ಸ್‌ಮನ್‌ ಲಬುಶೇನ್‌ಗೆ ಬೌಲಿಂಗ್‌ ಮಾಡುತ್ತಿರುವಾಗ ಈ ಘಟನೆ ಸಂಭವಿಸಿತು. ಲಬುಶೇನ್‌ ಚೆಂಡನ್ನು ಬೌಲರ್‌ನತ್ತ ಬಡಿದಟ್ಟಿದಾಗ ಸೌಥಿ ಇದನ್ನು ತಡೆದರು. ಆಗ ಬರ್ನ್ಸ್ ಕ್ರೀಸ್‌ ಬಿಟ್ಟಿದ್ದರಿಂದ ಸೌಥಿ ರನೌಟ್‌ಗೆ ಯತ್ನಿಸಿದರು. ಆಗ ಚೆಂಡನ್ನು ಹಿಡಿಯಲು ಓಡಿ ಬರುತ್ತಿದ್ದ ಮಿಚೆಲ್‌ ಸ್ಯಾಂಟ್ನರ್‌ ಅಂಪಾಯರ್‌ ಅಲೀಮ್‌ ದಾರ್‌ಗೆ ಢಿಕ್ಕಿ ಹೊಡೆದರು. ನಿಯಂತ್ರಣ ತಪ್ಪಿದ ದಾರ್‌ ಮಂಡಿಯೂರಿ ಬಿದ್ದರು. ನೋವಿನ ತೀವ್ರತೆಯಿಂದ ಅವರಿಗೆ ಏಳಲಾಗಲಿಲ್ಲ. ಕೂಡಲೇ ನ್ಯೂಜಿಲ್ಯಾಂಡ್‌ ತಂಡದ ವೈದ್ಯರು ಆಗಮಿಸಿ ಚಿಕಿತ್ಸೆ ನೀಡಿದರು.

ದಾರ್‌ ಚೇತರಿಸಿಕೊಂಡು ಕರ್ತವ್ಯಕ್ಕೆ ಮುಂದಾದಾಗ ವೀಕ್ಷಕರೆಲ್ಲ ಎದ್ದು ನಿಂತು ಗೌರವ ಸಲ್ಲಿಸಿದರು. ರವಿವಾರ ಬಹುಶಃ ದಾರ್‌ ಬದಲು ತೃತೀಯ ಅಂಪಾಯರ್‌ ಮರೈಸ್‌ ಎರಾಸ್ಮಸ್‌ ಅಂಗಳಕ್ಕಿಳಿಯಲೂಬಹುದು.