ಗೂಡೊಳಗೆ ಆ “ಮೂರು’ ದಿನ

Team Udayavani, Dec 18, 2019, 5:25 AM IST

ಮುಟ್ಟಿನ ದಿನಗಳಲ್ಲಿ ಮಹಿಳೆಯರನ್ನು ಮೂಲೆಗೆ ಕೂರಿಸುವ ಪದ್ಧತಿ ನಮ್ಮಲ್ಲಷ್ಟೇ ಅಲ್ಲ, ನೇಪಾಳದಲ್ಲೂ ಇದೆ. ಅಲ್ಲಿನ ಕೆಲವು ಹಳ್ಳಿಗಳಲ್ಲಿ, ಮುಟ್ಟಿನ ಮೂರು-ನಾಲ್ಕು ದಿನ ಮಹಿಳೆ ಮನೆಯಲ್ಲಿ ಇರುವಂತಿಲ್ಲ. ಮನುಷ್ಯರನ್ನು, ಜಾನುವಾರುಗಳನ್ನು, ಹಣ್ಣು-ಮರಗಳನ್ನು, ಸಾರ್ವಜನಿಕ ನೀರಿನ ನಲ್ಲಿ, ಬಾವಿಯನ್ನು ಮುಟ್ಟುವಂತಿಲ್ಲ. ಅಷ್ಟೂ ದಿನ ಆಕೆ ಮನೆಯಿಂದ ದೂರವಿರುವ ಸಣ್ಣ ಜೋಪಡಿಯಲ್ಲಿ ಕಾಲ ಕಳೆಯಬೇಕು. ಈ ಪದ್ಧತಿಗೆ “ಚೌಪಾಡಿ’ ಎನ್ನುತ್ತಾರೆ. ಈ ಅಮಾನವೀಯ ಪದ್ಧತಿಯನ್ನು ನೇಪಾಳದ ನ್ಯಾಯಾಲಯ 2005ರಲ್ಲಿಯೇ ಕಾನೂನು ಬಾಹಿರವೆಂದು ಘೋಷಿಸಿದೆ. ಆದರೂ, ಕೆಲವು ಕುಗ್ರಾಮಗಳಲ್ಲಿ ಪರಿಸ್ಥಿತಿ ಬದಲಾಗಿಲ್ಲ. ಇತ್ತೀಚೆಗೆ, ಈ ಚೌಪಾಡಿ ಪದ್ಧತಿಗೆ 21 ವರ್ಷದ ವಿವಾಹಿತೆಯೊಬ್ಬಳು ಬಲಿಯಾಗಿರುವುದು ದುರಂತ.

ಅಚಮ್‌ ಎಂಬ ಹಳ್ಳಿಯ ಪಾರ್ವತಿ ಎಂಬಾಕೆ ಮುಟ್ಟಿನ ದಿನಗಳನ್ನು ಗುಡಿಸಲಿನಲ್ಲಿ ಕಳೆಯುವಾಗ ಸಾವಿಗೀಡಾಗಿದ್ದಾಳೆ. ಸಾವಿಗೆ ಕಾರಣವೇನೆಂದು ಸ್ಪಷ್ಟವಾಗಿಲ್ಲ. ಆದರೆ, ರಾತ್ರಿ ವೇಳೆ ಅಲ್ಲಿನ ತಾಪಮಾನ 10 ಡಿಗ್ರಿ ಸೆ.ಗಿಂತ ಕುಸಿಯುತ್ತದೆ. ಕೊರೆಯುವ ಚಳಿಯಿಂದ ರಕ್ಷಿಸಿಕೊಳ್ಳಲು ಪಾರ್ವತಿ ಗುಡಿಸಲೊಳಗೆ ಬೆಂಕಿ ಉರಿಸಿದ್ದಳಂತೆ. ಕಿಟಕಿಗಳಿಲ್ಲದ ಆ ಜೋಪಡಿಯಲ್ಲಿ ಹೊಗೆಯಿಂದ ಉಸಿರುಕಟ್ಟಿ ಆಕೆ ಸತ್ತಿರಬಹುದು ಎನ್ನಲಾಗುತ್ತಿದೆ. ಸಮೀಕ್ಷೆಯೊಂದರ ಪ್ರಕಾರ, ಆ ಹಳ್ಳಿಯ 72% ಹುಡುಗಿಯರು ಪ್ರತಿ ತಿಂಗಳೂ ಗುಡಿಸಲು ವಾಸ ಅನುಭವಿಸುತ್ತಿದ್ದಾರಂತೆ!