ಡಬ್ಬಾ ಅಂಗಡಿ ತೆರವು ಬೇಡ

Team Udayavani, Dec 18, 2019, 12:36 PM IST

ಮುದ್ದೇಬಿಹಾಳ: ಪಟ್ಟಣದ ಬಸ್‌ ನಿಲ್ದಾಣ ಎದುರಿಗೆ ಬಸವೇಶ್ವರ ವೃತ್ತದ ಹತ್ತಿರ ತೋಟಗಾರಿಕೆ ಇಲಾಖೆಯ ಕಚೇರಿ ಕಾಂಪೌಂಡ್‌ ಗೆ ಹೊಂದಿಕೊಂಡಿರುವ ಡಬ್ಬಾ ಅಂಗಡಿಗಳ ಪ್ರಕರಣ ನ್ಯಾಯಾಲಯದಲ್ಲಿರುವುದರಿಂದ ರಾಜ್ಯ ಹೆದ್ದಾರಿ ಅಗಲೀಕರಣ ಹಿನ್ನೆಲೆ ಈ ಅಂಗಡಿಗಳನ್ನು ತೆರವುಗೊಳಿಸಬಾರದು ಎಂದು ಕೋರಿ ಅಲ್ಲಿನ ಅಂಗಡಿಕಾರರು ಮಂಗಳವಾರ ಜಿಲ್ಲಾಧಿಕಾರಿ ಸೇರಿದಂತೆ ವಿವಿಧ ಜಿಲ್ಲಾ, ತಾಲೂಕು ಮಟ್ಟದ ಅಧಿಕಾರಿಗಳಿಗೆ ಮನವಿ ಸಲ್ಲಿಸಿದ್ದಾರೆ.

ಪಟ್ಟಣದಲ್ಲಿ ಹುನಗುಂದ- ಮುದ್ದೇಬಿಹಾಳ-ತಾಳಿಕೋಟೆ ರಾಜ್ಯಹೆದ್ದಾರಿ ಕಾಮಗಾರಿ ಪ್ರಗತಿಯಲ್ಲಿದೆ. ಈ ಹೆದ್ದಾರಿಗೆ ರಸ್ತೆ ಅಗಲೀಕರಣ ನೆಪದಲ್ಲಿ ಪುರಸಭೆ ಜಾಗದಲ್ಲಿ ಇರುವ ಪುರಸಭೆಯವರೇ ಹಾಕಿಕೊಟ್ಟಿರುವ ಡಬ್ಟಾ ಅಂಗಡಿಗಳನ್ನು ತೆರವುಗೊಳಿಸಲು ಹವಣಿಸಲಾಗುತ್ತಿದೆ. ಇದನ್ನರಿತು ಅಂಗಡಿ ತೆರವುಗೊಳಿಸದಂತೆ ಕೋರಿ ನ್ಯಾಯಾಲಯದ ಮೊರೆ ಹೋಗಲಾಗಿತ್ತು.

ನ್ಯಾಯಾಲಯವು 8-1-2020ರವರೆಗೆ ಯಥಾಸ್ಥಿತಿ ಕಾಯ್ದುಕೊಳ್ಳುವಂತೆ ಸಂಬಂಧಿಸಿದ ಅಧಿಕಾರಿಗಳಿಗೆ ಸೂಚಿಸಿದೆ. ಅಲ್ಲದೆ ಈಗಾಗಲೇ ದಾವಾ ನಂಬರ್‌ ಓ ಎಸ್‌ 143/2017 ಅಡಿ ಸ್ಥಳೀಯ ನ್ಯಾಯಾಲಯದಲ್ಲಿ ಪ್ರಕರಣ ಚಾಲ್ತಿ ಇದೆ ಎಂದು ಮನವಿಯಲ್ಲಿ ತಿಳಿಸಲಾಗಿದೆ.

ಇದಲ್ಲದೆ ಅಗಲೀಕರಣ ಕಾಮಗಾರಿ ಪ್ರಾರಂಭಿಸಿದ ಮೇಲೆ ಹೈಕೋರ್ಟ್‌ನ ಕಲಬುರಗಿ ಪೀಠದಲ್ಲಿ ದಾವಾ ಸಂಖ್ಯೆ 200933/2019 ಅಡಿ ಪ್ರಕರಣ ದಾಖಲಿಸಿ 28-12-2018ರಂದು
ಅತಿಕ್ರಮಣ ತೆರವುಗೊಳಿಸದಂತೆ ಪುರಸಭೆಗೆ ಸಲ್ಲಿಸಿದ್ದ ಮನವಿಯನ್ನು ಪರಿಗಣಿಸಿ ಹೈಕೋರ್ಟ್‌ ಕೂಡ ಯಥಾಸ್ಥಿತಿಗೆ ಆದೇಶ ಮಾಡಿದೆ. ಇದನ್ನು ಪರಿಗಣಿಸಿ ಪುರಸಭೆ ಅಧಿಕಾರಿಗಳಿಗೆ ಡಬ್ಟಾ ಅಂಗಡಿ ತೆರವುಗೊಳಿಸದಂತೆ ನಿರ್ದೇಶನ ನೀಡಬೇಕು ಎಂದು ಮನವಿಯಲ್ಲಿ ಕೋರಲಾಗಿದೆ.

ಒಂದು ವೇಳೆ ಆದೇಶ ಮೀರಿ ಪುರಸಭೆಯವರು ಅಂಗಡಿ ತೆರುವುಗೊಳಿಸಲು ಮುಂದಾದಲ್ಲಿ ನ್ಯಾಯಾಂಗ ನಿಂದನೆ ಪ್ರಕರಣ ದಾಖಲಿಸುವುದು ಮಾತ್ರವಲ್ಲದೆ ಪುರಸಭೆಯ ಎದುರು ಡಬ್ಬಾ ಅಂಗಡಿಯವರೆಲ್ಲ ಹೋರಾಟ ನಡೆಸುವ ಪರಿಸ್ಥಿತಿ ಬರುತ್ತದೆ. ಇದನ್ನು ತಪ್ಪಿಸಲು ಡಬ್ಬಾ ಅಂಗಡಿಗಳನ್ನು ಬಲವಂತವಾಗಿ
ತೆರುವುಗೊಳಿಸುವ ಕ್ರಮಕ್ಕೆ ತಡೆ ನೀಡಬೇಕು ಎಂದು ತಿಳಿಸಲಾಗಿದೆ.

ಮನವಿ ಪ್ರತಿಗಳನ್ನು ಮುದ್ದೇಬಿಹಾಳ ತಹಶೀಲ್ದಾರ್‌, ಪುರಸಭೆ ಮುಖ್ಯಾಧಿಕಾರಿ, ಸಿಪಿಐ, ಪಿಎಸೈ, ಪುರಸಭೆ ಆಡಳಿತಾಧಿಕಾರಿಯೂ ಆಗಿರುವ ವಿಜಯಪುರದ ಉಪ ವಿಭಾಗಾಧಿಕಾರಿ, ಜಿಲ್ಲಾ ನಗರಾಭಿವೃದ್ಧಿ ಕೋಶದ ಯೋಜನಾ ನಿರ್ದೇಶಕರು ಸೇರಿ ಹಲವರಿಗೆ ಮನವಿ ಪ್ರತಿ ಸಲ್ಲಿಸಲಾಗಿದ್ದು ಈ ಪ್ರತಿ ಜೊತೆಗೆ ನ್ಯಾಯಾಲಯದ ಆದೇಶಗಳನ್ನೂ ಲಗತ್ತಿಸಲಾಗಿದೆ. ಅಮೀನಸಾಬ ಮುಲ್ಲಾ, ಈರಣ್ಣ ಮಾಡಗಿ, ಹುಸೇನ ಮುಲ್ಲಾ, ಬಸವರಾಜ ಮಡಿವಾಳರ, ನಾಗೇಶ ಅಗಸರ, ನಿಂಗಯ್ಯ ಪತ್ರಿಮಠ, ಸಿದ್ದಯ್ಯ ಪತ್ರಿಮಠ, ಪಹ್ಲಾದ ಹಡಪದ, ಶೇಕಪ್ಪ ಹಡಪದ, ಬಸನಗೌಡ ಬಿರಾದಾರ ಮತ್ತಿತರರು ಆಯಾ ಅಧಿಕಾರಿಗಳಿಗೆ ಮನವಿ ಸಲ್ಲಿಸುವಾಗ ಇದ್ದರು.