ಡೀಸಿ ಸೂಚಿಸಿದ್ರೂ ಕೆರೆಗಳ ಸ್ವಚ್ಛ ಮಾಡಿಲ್ಲ

Team Udayavani, Dec 21, 2019, 3:25 PM IST

ಮುಳಬಾಗಿಲು: ತಾಲೂಕಿನ 31 ಕೆರೆಗಳಿಗೆ ಮುಂದಿನ ತಿಂಗಳು ಪಾಲಾರ್‌ ನದಿ ಮೂಲಕ ಕೆ.ಸಿ.ವ್ಯಾಲಿ ನೀರು ಹರಿಯಲಿದೆ. ಆದರೆ, ಕೆರೆ ಅಂಗಳದಲ್ಲಿ ಬೆಳೆದಿರುವ ಜಾಲಿ ಮರ, ಇತರೆ ಗಿಡ-ಗಂಟಿಗಳನ್ನು ಸಾಮಾಜಿಕ ಅರಣ್ಯ ಇಲಾಖೆ ಮತ್ತು ಗ್ರಾಪಂ ಅಧಿಕಾರಿಗಳು ತೆರವುಗೊಳಿಸದೇ ನಿರ್ಲಕ್ಷ್ಯವಹಿಸಿದ್ದಾರೆ.

ಪಾಲರ್‌ ನದಿಯಲ್ಲಿನ ಗಿಡ ಮರ ಸ್ವಚ್ಛಗೊಳಿಸಲಾಗಿದೆ ಆದ್ರೂ ಕೆರೆಗಳಲ್ಲಿ ಹಾಗೆ ಬಿಡಲಾಗಿದೆ. ಕೆರೆಯಲ್ಲಿನ ಗಡಿ ಗಂಟಿ ತೆರವು ಮಾಡುವ ಸಂಬಂಧ ನಗರದ ಮಿನಿವಿಧಾನಸೌಧದಲ್ಲಿ 2019, ಜ.10ರಂದು ಜಿಲ್ಲಾಡಳಿತ, ತಾಲೂಕು ಆಡಳಿತ, ಅರಣ್ಯ, ಪೊಲೀಸ್‌, ಗಣಿ ಮತ್ತು ಭೂ ವಿಜ್ಞಾನ ಇಲಾಖೆ ಅಧಿಕಾರಿಗಳ ಸಭೆಯನ್ನು ಅಂದಿನ ಸಂಸದ ಕೆ.ಎಚ್‌.ಮುನಿಯಪ್ಪ ಮತ್ತು ಶಾಸಕ ಎಚ್‌.ನಾಗೇಶ್‌ ಸಮ್ಮುಖದಲ್ಲಿ ಜಿಲ್ಲಾಧಿಕಾರಿ ಜೆ.ಮಂಜುನಾಥ್‌ ಸಭೆ ನಡೆಸಿದ್ದರು.

ಸೂಚನೆ ನೀಡಿದ್ದ ಡೀಸಿ: ತಾಲೂಕಿಗೆ ಕೆ.ಸಿ ವ್ಯಾಲಿ ನೀರು ಮತ್ತು ಎತ್ತಿನಹೊಳೆ ನೀರು ಕೆರೆಗೆ ಬರುವುದರಿಂದ ನೀರು ಸಂರಕ್ಷಿಸಲು, ಕೆರೆಗಳಲ್ಲಿ ಬೆಳೆಸಿರುವ ಜಾಲಿ ಮತ್ತು ಇತರೇ ಮರಗಳನ್ನು ಗ್ರಾಪಂಗಳ ಮೂಲಕ ಮಾ.30ರ ಒಳಗಾಗಿ ಕಟಾವು ಮಾಡಿಸಿ, ಸ್ವಚ್ಛಗೊಳಿಸುವಂತೆ ಸಾಮಾಜಿಕ ವಲಯಾರಣ್ಯಾಧಿಕಾರಿ ಹರೀಶ್‌ಗೆ ಸೂಚನೆ ನೀಡಿದ್ದರು.

ನದಿಯಲ್ಲಿನ ಮರಗಿಡ ತೆರವು: ಗಡುವು ಮುಗಿದು 11 ತಿಂಗಳು ಆಗಿದ್ದರೂ ಯಾರೊಬ್ಬರೂ ಗಮನ ಹರಿಸಿಲ್ಲ. ಈಗಾಗಲೇ ಕೆ.ಸಿ. ವ್ಯಾಲಿ ನೀರು ಕೋಲಾರ ಕೆರೆಗಳಿಗೆ ಹರಿಯುತ್ತಿದ್ದು, ಪಾಲಾರ್‌ ನದಿಯ ಮೂಲಕ ತಾಲೂಕಿನ ಹೊಳಲಿ ಕೆರೆಗೂ ಹರಿಯಲಿದೆ. ಹೀಗಾಗಿ ಕೆ.ಸಿ.ವ್ಯಾಲಿ ಯೋಜನೆಯ ಅಧಿಕಾರಿಗಳು ಪಾಲಾರ್‌ ನದಿಯಲ್ಲಿ ಬೆಳೆದಿದ್ದ ಗಿಡ ಮರಗಳನ್ನು ಸ್ವತ್ಛಗೊಳಿಸುವ ಕಾರ್ಯದಲ್ಲಿ ನಿರತರಾಗಿದ್ದಾರೆ. ಆದರೆ, ಕೆರೆಯಲ್ಲಿ ಗಿಡ ಮರ ತೆರವು ಮಾಡಿಲ್ಲ.

ಕ್ಲಸ್ಟರ್‌ 1 ರಲ್ಲಿ ಬರುವ ಕೆರೆಗಳು: ಈ ನೀರು ಪಾಲಾರ್‌ ನಿಂದ ಹರಿದು ಅಲ್ಲಿಂದ ಕ್ಲಸ್ಟರ್‌ 1ರ ಮೂಲಕ ಜಮ್ಮನಹಳ್ಳಿ ಕೆರೆ, ವರದಗಾನಹಳ್ಳಿ ಬಿದಿರು ಕೆರೆ, ವಿಜಲಾಪುರ ದೊಡ್ಡ ಕೆರೆ, ಗಂಜಿಗುಂಟೆ ದೊಡ್ಡ ಕೆರೆ, ಆವಣಿ ದೊಡ್ಡ ಕೆರೆ, ಊ.ಮಿಟ್ಟೂರು ದೊಡ್ಡ ಕೆರೆ, ಮರಕಲಘಟ್ಟ ದೊಡ್ಡ ಕೆರೆ, ಕ್ಲಸ್ಟರ್‌ 1ಎ ನಲ್ಲಿ ಕದರೀಪುರ ಎರಕುಲಗುಂಟ ಕೆರೆ ಮತ್ತು ವಿರೂಪಾಕ್ಷ ಗುಟ್ಟಹಳ್ಳಿ ಕೆರೆಗೆ ನೀರು ಹರಿಯಲಿದೆ.

ಕ್ಲಸ್ಟರ್‌ ಎರಡು: ಅದೇ ರೀತಿ ಕ್ಲಸ್ಟರ್‌ ಎರಡರ ಮೂಲಕ ಕೆಂಗುಂಟೆ ಕೆರೆ, ಸೋಮೇಶ್ವರಪಾಳ್ಯ ಕೆರೆ, ಇಂಡ್ಲು ಕೆರೆ, ಸೊನ್ನ ವಾಡಿ ದೊಡ್ಡಕೆರೆ, ಕವತನಹಳ್ಳಿ ದೊಡ್ಡ ಕೆರೆ, ಗುಮ್ಲಾಪುರ ಪಟೇಲ್‌ ಕೆರೆ, ಮೇಲಾಗಾಣಿ ದೊಡ್ಡ ಕೆರೆ, ಕನ್ನಸಂದ್ರ ದೊಡ್ಡ ಕೆರೆ, ತಾಯಲೂರು ಅಮಾನಿಕೆರೆ, ಮದ್ದೇರಿ ದೊಡ್ಡ ಕೆರೆ, ಕ್ಲಸ್ಟರ್‌ 3ರ ಮೂಲಕ ಕದರೀ ಪುರ ಗೋಪಣ್ಣ ಕೆರೆ, ಲಿಂಗಾಪುರ ದೊಡ್ಡ ಕೆರೆ, ದೊಡ್ಡಯ್ಯನ ಕೆರೆ, ಉಪ್ಪು ಕೆರೆ, ಸಿದ್ದ ಘಟ್ಟಹೊಸಕೆರೆ, ಮೇಡಿಗಪಲ್ಲಿಕೆರೆ, ಸಿದ್ದಘಟ್ಟವಡ್ಡು ಕೆರೆ, ಮಾರಂಡ ಹಳ್ಳಿ ಕೆರೆ, ಕಪ್ಪಲಮಡಗು ವಡ್ಡು ಕೆರೆ, ಮರಹೇರು ದೊಡ್ಡ ಕೆರೆ, ನಂಗಲಿ ದೊಡ್ಡ ಕೆರೆ, ಬ್ಯಾಟನೂರು ಮಲ್ಲಪ್ಪನಕೆರೆ ಸೇರಿ 31 ಕೆರೆಗಳಿಗೆ ನೀರು ಹರಿಯಲಿದೆ. ರೈತ ಸಂಘದ ರಾಜ್ಯ ಉಪಾಧ್ಯಕ್ಷ ನಾರಾಯಣಗೌಡ ಮಾತನಾಡಿ, ನಂಗಲಿ, ಗುಮ್ಲಾಪುರ, ಹೆಬ್ಬಣಿ, ಚಿನ್ನಹಳ್ಳಿ, ಮಂಚಿಗಾನಹಳ್ಳಿ, ಇನ್ನಿತರ ಕೆರೆಗಳಲ್ಲಿ ಜಾರಿ ಮರ ಬೆಳೆದು ಕೆರೆಯಂಗಳವನ್ನು ಆವರಿಸಿಕೊಂಡಿವೆ. ಅಧಿಕಾರಿಗಳ ಮಾತ್ರ ನಮಗೂ ಇದಕ್ಕೂ ಸಂಬಂಧ ವಿಲ್ಲದ ರೀತಿ ನಿರ್ಲಕ್ಷ್ಯ ವಹಿಸುತ್ತಿದ್ದಾರೆ. ನೀರು ಕೆರೆಗಳಿಗೆ ಹರಿಸಿದ ನಂತರ ನೀರಿನ ಸಂರಕ್ಷಣೆ ಹೇಗೆ ಮಾಡಲು ಸಾಧ್ಯ ಎಂದು ಆರೋಪಿಸಿದರು.

-ಎಂ.ನಾಗರಾಜಯ್ಯ