ಪ್ರಮೀಳಾ ಪ್ರಲಾಪ ನಮಗೆ ಬೇಕಾಗಿಲ್ಲ: ಜೈಶಂಕರ್‌ ಟೀಕೆಗೆ ರಾಜೀವ್‌ ಚಂದ್ರಶೇಖರ್‌ ತಿರುಗೇಟು

ಅಮೆರಿಕದ ಸಂಸದೆಗೆ ಕಮಲಾ ಹ್ಯಾರೀಸ್‌, ಎಲಿಝಬೆತ್‌ ವಾರೆನ್‌ರಿಂದ ಬೆಂಬಲ

Team Udayavani, Dec 21, 2019, 7:40 PM IST

ವಾಷಿಂಗ್ಟನ್‌/ನವದೆಹಲಿ: ವಿದೇಶಾಂಗ ಸಚಿವ ಎಸ್‌.ಜೈಶಂಕರ್‌ ಅಮೆರಿಕದ ವಿದೇಶಾಂಗ ವ್ಯವಹಾರಗಳ ಸಂಸತ್‌ ಸಮಿತಿ ಜತೆಗೆ ಭೇಟಿ ರದ್ದು ಮಾಡಿದ್ದಕ್ಕೆ ಟೀಕೆ ಮಾಡಿರುವ ಸಂಸದೆ ಎಲಿಜಬೆತ್‌ ವಾರೆನ್‌ಗೆ ಬಿಜೆಪಿಯ ರಾಜ್ಯಸಭಾ ಸದಸ್ಯ ರಾಜೀವ್‌ ಚಂದ್ರಶೇಖರ್‌ ತಿರುಗೇಟು ನೀಡಿದ್ದಾರೆ.

ಅಮೆರಿಕದ ಸಂಸತ್‌ ಸದಸ್ಯೆ ಪ್ರಮೀಳಾ ಜಯಪಾಲ್‌ ತಮ್ಮಷ್ಟಕ್ಕೇ ಮಾತನಾಡಿಕೊಳ್ಳುವುದಕ್ಕೆ ಅಡ್ಡಿ ಇಲ್ಲ. ಅವರಿಗೆ ಯಾವ ವಿಚಾರದ ಬಗ್ಗೆ ಮಾತನಾಡುತ್ತಿದ್ದೇನೆ ಎಂಬ ಅರಿವು ಇದ್ದರೆ ಸಾಕು. ಅವರ ಪ್ರಲಾಪವನ್ನು ಕೇಳಿಸಿಕೊಂಡು ಸಮಯ ಹಾಳು ಮಾಡುವ ಜರೂರತ್ತು ನಮಗೆ ಇಲ್ಲ ಎಂದು ಟ್ವಿಟರ್‌ನಲ್ಲಿ ತಿರುಗೇಟು ನೀಡಿದ್ದಾರೆ. ಇದೇ ವೇಳೆ ಜಯಪಾಲ್‌ಗೆ ಡೆಮಾಕ್ರಾಟ್‌ ಪಕ್ಷದಿಂದ ಅಧ್ಯಕ್ಷೀಯ ಅಭ್ಯರ್ಥಿಗಳಾಗಬೇಕು ಎಂದು ಮುಂಚೂಣಿಯಲ್ಲಿರುವ ಬರ್ನಿ ಸ್ಯಾಂಡರ್ಸ್‌ ಮತ್ತು ಎಲಿಝಬೆತ್‌ ವಾರೆನ್‌ ಬೆಂಬಲ ಸೂಚಿಸಿದ್ದಾರೆ.

ಜಯಪಾಲ್‌ ಹೌಸ್‌ ಆಫ್ ಕಾಮನ್ಸ್‌ನಲ್ಲಿ ಕಾಶ್ಮೀರ ಸ್ಥಿತಿಗತಿ ವಿರುದ್ಧ ಮಂಡಿಸಲಾಗಿರುವ ಗೊತ್ತುವಳಿ ಬಗ್ಗೆ ಇಬ್ಬರು ಪ್ರಮುಖರು ಬೆಂಬಲ ವ್ಯಕ್ತಪಡಿಸಿದ್ದಾರೆ ಜತೆಗೆ ವಿದೇಶಾಂಗ ಸಚಿವ ಎಸ್‌.ಜೈಶಂಕರ್‌ ಸಭೆ ರದ್ದು ಮಾಡಿದ್ದಕ್ಕೆ ಆಕ್ಷೇಪವನ್ನೂ ಮಾಡಿದ್ದಾರೆ. ಅಮೆರಿಕ ಸಂಸದರ ಧ್ವನಿಯನ್ನು ತಡೆಯಲು ಭಾರತದ ವಿದೇಶಾಂಗ ಸಚಿವರು ಪ್ರಯತ್ನ ಮಾಡುತ್ತಿದ್ದಾರೆ ಎಂದು ಮೈಕ್ರೋ ಬ್ಲಾಗಿಂಗ್‌ ಜಾಲತಾಣದಲ್ಲಿ ಬರೆದುಕೊಂಡಿದ್ದಾರೆ ಎಲಿಝಬೆಲ್‌ ವಾರೆನ್‌. ಇದರ ಜತೆಗೆ ಪ್ರಮೀಳಾ ಜಯಪಾಲ್‌ಗೆ ಮತ್ತೂಬ್ಬ ಭಾರತೀಯ ಮೂಲದ ಸಂಸತ್‌ ಸದಸ್ಯೆ ಕಮಲಾ ಹ್ಯಾರಿಸ್‌ ಕೂಡ ಬೆಂಬಲ ಸೂಚಿಸಿದ್ದಾರೆ.