ಜಾತಿ-ಧರ್ಮ ನಮೂದು ವದಂತಿಗಳನ್ನು ಹರಡಬೇಡಿ ಎಂದ ಹಣಕಾಸು ಸಚಿವಾಲಯ

Team Udayavani, Dec 22, 2019, 6:28 PM IST

ಹೊಸದಿಲ್ಲಿ: ಪೌರತ್ವ ತಿದ್ದುಪಡಿ ಕಾಯ್ದೆಗೆ ಸಂಬಂಧಿಸಿದಂತೆ ದೇಶಾದ್ಯಂತ ಪ್ರತಿಭಟನೆಗಳು ನಡೆಯುತ್ತಿದ್ದು, ದೇಶದೆಲ್ಲೆಡೆ ಹಲವಾರು ವದಂತಿಗಳು ಹರಡುತ್ತಿವೆ. ಪ್ರತಿಯೊಂದಕ್ಕೂ ಜಾತಿ/ಧರ್ಮ ನಮೂದಿಸಬೇಕಾದ ಅಗತ್ಯವಿದೆ ಎಂಬ ಊಹಾಪೋಹ ಕೇಳಿಬರುತ್ತಿದ್ದು, ಕಾಯ್ದೆ ಕುರಿತು ಜನರಲ್ಲಿರುವ ಗೊಂದಲಗಳನ್ನು ಸರಿಪಡಿಸಲು ಕೇಂದ್ರ ಸರಕಾರ ಮುಂದಾಗಿದೆ.

ಬ್ಯಾಂಕ್‌ಗಳಲ್ಲಿ ಖಾತೆ ತೆರೆಯಲು ಅಥವಾ ಈಗಿರುವ ಖಾತೆಗೆ ಹೆಚ್ಚುವರಿ ಮಾಹಿತಿ ನೀಡಬೇಕೆನಿಸಿದರೆ ಜಾತಿ/ಧರ್ಮದ ಹೆಸರು ನಮೂದಿಸಬೇಕಾಗುತ್ತದೆ ಎಂದು ವದಂತಿ ಹರಡಿರುವ ಬೆನ್ನಲ್ಲೇ ಕೇಂದ್ರ ಸರಕಾರ ಈ ನಿಯಮವನ್ನು ಜಾರಿಯಲ್ಲಿ ಇಲ್ಲ ಎಂದು ಜನರಿಗೆ ಕೇಂದ್ರ ಹಣಕಾಸು ಸಚಿವಾಲಯ ಸ್ಪಷ್ಟನೆ ನೀಡಿದೆ.

ಈ ಸಂಬಂಧ ಟ್ವೀಟ್‌ ಮಾಡಿರುವ ಹಣಕಾಸು ಸಚಿವಾಲಯದ ಕಾರ್ಯದರ್ಶಿ ರಾಜೀವ್‌ ಕುಮಾರ್‌, ಇಂಥ ಯಾವುದೇ ವದಂತಿಗಳನ್ನು ಸಾರ್ವಜನಿಕರು ನಂಬಬಾರದು. ಬ್ಯಾಂಕ್‌ಗಳು ಇದುವರೆಗೂ ಯಾವುದೇ ರೀತಿಯ ಸೂಚನೆಗಳನ್ನು ನೀಡಿಲ್ಲ ಎಂದು ಹೇಳಿದ್ದಾರೆ.

ಕೆವೈಸಿ (ಗ್ರಾಹಕರ ಮಾಹಿತಿ) ತುಂಬಬೇಕಾದರೆ ಈ ರೀತಿಯ ಮಾಹಿತಿ ನೀಡುವ ಅಗತ್ಯವೇ ಇಲ್ಲ. ವದಂತಿಗಳನ್ನು ಹರಡಬೇಡಿ ಎಂದು ಹಣಕಾಸು ಸಚಿವಾಲಯ ಪ್ರಕಟಣೆಯಲ್ಲಿ ಸ್ಪಷ್ಟಪಡಿಸಿದೆ.