ಮಂಗಳೂರು ಗಲಭೆಯಲ್ಲಿ ಕಾಂಗ್ರೆಸ್ ಕೈವಾಡ: ನಳಿನ್ ಆರೋಪ

Team Udayavani, Dec 24, 2019, 12:10 PM IST

ಬೆಂಗಳೂರು: ಮಂಗಳೂರಿನಲ್ಲಿ‌ನಡೆದ ಗಲಭೆ ಪೂರ್ವಯೋಜಿತ ಎಂಬುದು ಸಿಸಿಟಿವಿ ದೃಶ್ಯಾವಳಿಗಳ ಮೂಲಕ ಸ್ಪಷ್ಟವಾಗಿದೆ. ಕಾಶ್ಮೀರದಲ್ಲಿ ಪೊಲೀಸರ ಮೇಲೆ ದಾಳಿ ನಡೆಸುವ ರೀತಿಯಲ್ಲಿ ದಾಳಿ ಮಾಡಿದ್ದಾರೆ. ಕೃತ್ಯದ ಹಿಂದೆ ಹೊರಗಡೆಯಿಂದ ಬಂದ ಜನ ಹಾಗೂ ಕಾಂಗ್ರೆಸ್ ನ‌ ಕೈವಾಡವಿದೆ ಎಂದು ರಾಜ್ಯ ಬಿಜೆಪಿ ಅಧ್ಯಕ್ಷರಾದ ಸಂಸದ ನಳಿನ್ ಕುಮಾರ್ ಕಟೀಲ್ ಆರೋಪಿಸಿದರು.

ರಾಜ್ತ ಬಿಜೆಪಿ ಕಚೇರಿಯಲ್ಲಿ ಪ್ರತಿಕ್ರಿಯಿಸಿದ ಅವರು, ಗಲಭೆ ನಡೆದ ಹಿಂದಿನ ದಿನ ಮಾಜಿ ಸಚಿವ ಯು.ಟಿ. ಖಾದರ್ ಅವರು ಬೆಂಕಿ ಹಾಕುತ್ತಾರೆ ಎಂದು ಹೇಳಿದ್ದರು. ಹಾಗಾಗಿ ಅವರಿಗೆ ಗಲಭೆಯ ವಾಸನೆ ಮೊದಲೇ ಇತ್ತು ಹಾಗೂ ಪೂರ್ವ ಯೋಜಿತವೆಂಬ ಸಂಶಯ ಮೂಡುತ್ತದೆ ಎಂದು ಹೇಳಿದರು.

ದಾಂಧಲೆ ನಡೆಸಿದವರಲ್ಲಿ ಎಸ್ ಡಿಪಿಐ, ಪಿಎಫ್ ಐ, ಕೆಎಫ್ ಡಿ, ಕಾಂಗ್ರೆಸ್ ಪಕ್ಷದವರಿದ್ದಂತಿದೆ. ಹಾಗಾಗಿ ಕಾಂಗ್ರೆಸ್ ಉತ್ತರ ನೀಡಬೇಕು. ಕೆಎಫ್ ಡಿ, ಎಸ್ ಡಿಪಿಐ ನಿಷೇಧಿಸಬೇಕು ಎಂಬ ಒತ್ತಾಯವಿದೆ ಎಂದು ಹೇಳಿದರು