ರಾಜ್ಯದ ಶೇ. 44ರಷ್ಟು ವಾಹನಗಳಿಗೆ ಫಾಸ್ಟ್ಯಾಗ್‌

2.70 ಲಕ್ಷ ವಾಹನಗಳು ಫಾಸ್ಟ್ಯಾಗ್‌ ಅಳವಡಿಸಿಕೊಂಡು ಸಂಚಾರ

Team Udayavani, Dec 27, 2019, 7:00 AM IST

ಬೆಂಗಳೂರು: ಟೋಲ್‌ ಪ್ಲಾಜಾಗಳಲ್ಲಿ ಫಾಸ್ಟ್ಯಾಗ್‌ ಕಡ್ಡಾಯ ಜಾರಿಯನ್ನು ವಿಸ್ತರಿಸಿದ ಬೆನ್ನಲ್ಲೇ ವಾಹನಗಳಿಗೆ ಟ್ಯಾಗ್‌ ಅಳವಡಿಸಿಕೊಂಡವರ ಸಂಖ್ಯೆ ಶೇ. 12ರಷ್ಟು ಹೆಚ್ಚಾಗಿದ್ದು, ಈವರೆಗೆ ಶೇ. 44ರಷ್ಟು ವಾಹನಗಳು ಫಾಸ್ಟ್ಯಾಗ್‌ ಅಳವಡಿಸಿಕೊಂಡಿವೆ.

ಫಾಸ್ಟ್ಯಾಗ್‌ ಕಡ್ಡಾಯವೆಂದು ಘೋಷಿಸುವ ವೇಳೆಗೆ ರಾಜ್ಯದಲ್ಲಿ ಶೇ. 19ರಷ್ಟು ವಾಹನಗಳು ಮಾತ್ರ ಇದನ್ನು ಅಳವಡಿಸಿಕೊಂಡಿದ್ದವು. ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರವು ಡಿ.15ರಂದು ಫಾಸ್ಟ್ಯಾಗ್‌ ಹೊಂದಲು ಕೊನೆಯ ದಿನಾಂಕವೆಂದು ತಿಳಿಸಿತ್ತು. ಆದರೆ ಈ ವೇಳೆಗೆ ರಾಜ್ಯದಲ್ಲಿ ಕೇವಲ ಶೇ. 32ರಷ್ಟು ವಾಹನಗಳು ಫಾಸ್ಟ್ಯಾಗನ್ನು ಹೊಂದಿದ್ದವು. ಈ ಹಿನ್ನೆಲೆಯಲ್ಲಿ ಹಾಗೂ ಸ್ಟಿಕ್ಕರ್‌ಗಳು ಬೇಡಿಕೆಗೆ ತಕ್ಕಂತೆ ಪೂರೈಕೆ ಇಲ್ಲದಿರುವುದರಿಂದ ಅವಧಿಯನ್ನು ಜ. 15ರ ವರೆಗೆ ವಿಸ್ತರಿಸಲಾಯಿತು. ಡಿ.15ರಿಂದ 25ರ ವರೆಗೆ 10 ದಿನಗಳಲ್ಲಿ ಶೇ. 12ರಷ್ಟು ವಾಹನಗಳು ಫಾಸ್ಟ್ಯಾಗ್‌ ಹೊಂದಿವೆ.

ರಾಜ್ಯದಲ್ಲಿ 39 ಟೋಲ್‌ ಫ್ಲಾಜಾಗಳಿದ್ದು, 400ಕ್ಕೂ ಅಧಿಕ ಪ್ರವೇಶದ್ವಾರಗಳಿವೆ. ಟೋಲ್‌ ಪ್ಲಾಜಾಗಳಲ್ಲಿ ಶುಲ್ಕ ಪಾವತಿಸಲು ವಾಹನ ನಿಲ್ಲಿಸದೆ ಆನ್‌ಲೈನ್‌ನಲ್ಲಿ ಶುಲ್ಕ ಪಾವತಿಸುವ ಫಾಸ್ಟ್ಯಾಗ್‌ ತಂತ್ರಜ್ಞಾನ ಅಳವಡಿಕೆಯನ್ನು ಪ್ರಾಧಿಕಾರ ಕಡ್ಡಾಯಗೊಳಿಸಿದ್ದು, ಡಿ.15ರಿಂದ ಹೆಚ್ಚಿನ ಸಂಖ್ಯೆಯಲ್ಲಿ ಜನರು ಫಾಸ್ಟಾ éಗ್‌ಗೆ ಮೊರೆ ಹೋಗಿದ್ದಾರೆ ಎಂಬುದು ವರದಿಯಲ್ಲಿ ತಿಳಿದು ಬಂದಿದೆ.

ಜನವರಿಗೆ ಶೇ. 50 ಗುರಿ
ಪ್ರತಿದಿನ ಶೇ. 1.25ರಷ್ಟು ವಾಹನಗಳು ಫಾಸ್ಟ್ಯಾಗ್‌ ಅಳವಡಿಸಿಕೊಳ್ಳುತ್ತಿದ್ದು, ಜನವರಿ ವೇಳೆಗೆ ಶೇ. 50 ದಾಟುವ ಸಾಧ್ಯತೆ ಹೆಚ್ಚಿದೆ. ಬೆಂಗಳೂರು, ಮೈಸೂರು ಭಾಗ ಗಳಲ್ಲಿ ಹೆಚ್ಚಿನ ವಾಹನಗಳು ಹೊಸ ತಂತ್ರಜ್ಞಾನ ಅಳ ವಡಿಸಿಕೊಂಡಿವೆ. ಜ. 15ರ ವೇಳೆಗೆ ಬಹುತೇಕ ವಾಹನಗಳು ಫಾಸ್ಟಾ éಗ್‌ ಹೊಂದಿರಲಿವೆ ಎಂದು ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರದ ಅಧಿಕಾರಿಯೊಬ್ಬರು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.

ಶೇ. 95ರಷ್ಟು ಬಸ್‌ಗಳಿಗೆ ಫಾಸ್ಟ್ಯಾಗ್‌
ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆ ನಿಗಮ (ಕೆಎಸ್‌ಆರ್‌ಟಿಸಿ)ದ 8,500ಕ್ಕೂ ಅಧಿಕ ಬಸ್‌ಗಳಲ್ಲಿ ಶೇ. 40ರಷ್ಟು ಬಸ್‌ಗಳು ಟೋಲ್‌ ಮೂಲಕ ಸಂಚರಿಸಲಿವೆ. ಟೋಲ್‌ ಮೂಲಕ ಹೋಗುವ ಶೇ. 95ರಷ್ಟು ಬಸ್‌ಗಳಿಗೆ ಹಚ್ಚಲಾಗಿದೆ. ಜ. 15ರ ವರೆಗೆ ಸಮಯ ಇರುವುದರಿಂದ ಉಳಿದ ಬಸ್‌ಗಳಿಗೂ ಶೀಘ್ರವೇ ಸ್ಟಿಕ್ಕರ್‌ ಅಂಟಿಸಲಾಗುವುದು. ಟೋಲ್‌ಗಾಗಿ ನಿಗಮದಲ್ಲಿ 60 ಕೋಟಿ ರೂ. ಮೀಸಲಿಡಲಾಗಿದೆ ಎಂದು ನಿಗಮದ ನಿರ್ದೇಶಕ ಶಿವಯೋಗಿ ಕಳಸದ ತಿಳಿಸಿದರು.

ಜನರ ಮನಃಸ್ಥಿತಿ ಬದಲಾಗುತ್ತಿದ್ದು, ಡಿ.15ರ ಅನಂತರ ಹೆಚ್ಚಿನ ಸಂಖ್ಯೆಯಲ್ಲಿ ಫಾಸ್ಟ್ಯಾಗ್‌ ಅಳವಡಿಸಿಕೊಳ್ಳುತ್ತಿದ್ದಾರೆ. ಈ ತಂತ್ರಜ್ಞಾನ ಸುಗಮ ಸಂಚಾರಕ್ಕೆ ಅನುಕೂಲಕರ ವಾಗಿದೆ.
– ಬಿ.ಟಿ. ಶ್ರೀಧರ್‌, ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರದ ರಾಜ್ಯ ಯೋಜನಾ ನಿರ್ದೇಶಕ

- ಮಂಜುನಾಥ ಗಂಗಾವತಿ