ಮುಂದಿನ ನಿಲ್ದಾಣ ಮಂಗಳ?

Team Udayavani, Dec 28, 2019, 11:57 PM IST

ಮಾಹಿತಿ ನೀಡಲಿರುವ "ಮಾರ್ಸ್‌ 2020 ರೋವರ್‌'

ಪಸಾಡೆನಾ (ಅಮೆರಿಕ): ಮಂಗಳನ ಅಧ್ಯಯನಕ್ಕಾಗಿ 2020ರಲ್ಲಿ ನಭಕ್ಕೆ ಹಾರಲಿರುವ “ಮಾರ್ಸ್‌ 2020 ರೋವರ್‌’, ಕೆಂಪುಗ್ರಹದಲ್ಲಿ ಹಿಂದೆ ಜೀವಿಗಳ ಅಸ್ತಿತ್ವವಿತ್ತೇ ಎಂಬುದನ್ನು ಪರೀಕ್ಷಿಸುವುದರ ಜತೆಗೆ, ಮುಂದಿನ ದಿನಗಳಲ್ಲಿ ಮನುಷ್ಯರಿಗೆ ಅಲ್ಲಿ ನೆಲೆ ನಿಲ್ಲಲು ಅವಕಾಶಗಳಿವೆಯೇ ಎಂಬುದನ್ನೂ ಪತ್ತೆ ಹಚ್ಚಲಿದೆ ಎಂದು ಅಮೆರಿಕ ಬಾಹ್ಯಾಕಾಶ ಸಂಸ್ಥೆಯ (ನಾಸಾ) ವಿಜ್ಞಾನಿಗಳು ತಿಳಿಸಿದ್ದಾರೆ.

ಲಾಸ್‌ಏಂಜಲೀಸ್‌ ಸಮೀಪದ ಪಸಾಡೆನಾ ಪ್ರಾಂತ್ಯದಲ್ಲಿರುವ ಜೆಟ್‌ ಪ್ರೊಪಲನ್‌ ಲ್ಯಾಬೊ ರೇಟರಿಯಲ್ಲಿ ಈ ರೋವರ್‌ ಅನ್ನು ತಯಾರಿಸಲಾಗಿದ್ದು, ಕಳೆದ ವಾರ ಅದರ ಸಂಚಲನೆಯನ್ನು ಪರೀಕ್ಷಿಸಲಾಗಿದೆ. ಪತ್ರಕರ್ತರಿಗೆ ಈ ರೋವರನ್ನು ತೋರಿಸಲು ಕರೆಯಲಾಗಿದ್ದ ಪತ್ರಿಕಾಗೋಷ್ಠಿ ಯಲ್ಲಿ ಮಾತನಾಡಿದ ನಾಸಾ ವಿಜ್ಞಾನಿಗಳು, ವಿಭಿನ್ನ ಉದ್ದೇಶದೊಂದಿಗೆ ಮಂಗಳನಲ್ಲಿ ಕಾಲಿಡ ಲಿರುವ ಈ ಬಾಹ್ಯಾಕಾಶನೌಕೆಯು ಭವಿಷ್ಯದಲ್ಲಿ ಮನುಷ್ಯನ ಹಲವಾರು ಸಾಹಸಗಳಿಗೆ ನಾಂದಿ ಹಾಡಲಿದೆ ಎಂಬ ಆಶಯ ವಕ್ತಪಡಿಸಿದರು.

ಒಟ್ಟು 23 ಕ್ಯಾಮೆರಾಗಳನ್ನು ಹೊಂದಿರುವ ಈ ರೋವರ್‌, ಮುಂದಿನ ವರ್ಷ ಜುಲೈನಲ್ಲಿ ಮಂಗಳನತ್ತ ಪ್ರಯಾಣ ಬೆಳೆಸಲಿದ್ದು, ಫೆಬ್ರವರಿಯಲ್ಲಿ ಅಲ್ಲಿ ಹೋಗಿ ಇಳಿಯಲಿದೆ.

ಮುಂದಿನ ವರ್ಷ ಜುಲೈನಲ್ಲಿ ನಭಕ್ಕೆ ಚಿಮ್ಮಲಿರುವ ನೌಕೆ
ಲಾಸ್‌ಏಂಜಲೀಸ್‌ ಬಳಿಯ ಲ್ಯಾಬ್‌ನಲ್ಲಿ ಯಶಸ್ವಿ ಪರೀಕ್ಷೆ
ಮಂಗಳನಲ್ಲಿ ಮಾನವನ ಜೀವನಕ್ಕೆ ಇರಬಹುದಾದ ಅನುಕೂಲತೆಗಳ ಬಗ್ಗೆ ಪರೀಕ್ಷಿಸಲಿರುವ ರೋವರ್‌
ಕೆಂಪುಗ್ರಹದಲ್ಲಿ ಈ ಹಿಂದೆ ಜೀವಿಗಳಿದ್ದ ಬಗ್ಗೆಯೂ ಪರೀಕ್ಷೆ