ಆಸ್ಟ್ರಿಯಾದ ರಾಯಭಾರಿ ರೇಣು ಪಾಲ್‌ ವಾಪಸ್‌

Team Udayavani, Dec 31, 2019, 7:48 AM IST

ಹೊಸದಿಲ್ಲಿ: ಮನೆ ಬಾಡಿಗೆ 15 ಲಕ್ಷ ರೂ. ಎಂದು ಬಿಲ್‌ ತೋರಿಸಿ ಕೇಂದ್ರ ವಿದೇಶಾಂಗ ಸಚಿವಾಲಯದ ಕೆಂಗಣ್ಣಿಗೆ ತುತ್ತಾಗಿರುವ ಆಸ್ಟ್ರಿಯಾದ ರಾಯಭಾರಿ ರೇಣು ಪಾಲ್‌ರನ್ನು ಸ್ವದೇಶಕ್ಕೆ ಕರೆಸಿಕೊಳ್ಳಲಾಗಿದೆ.

ಕೇಂದ್ರೀಯ ಜಾಗೃತ ದಳ (ಸಿವಿಸಿ) ನಡೆಸಿದ್ದ ತನಿಖೆಯಲ್ಲಿ ಈ ಅಂಶ ಪತ್ತೆಯಾಗಿದ್ದರಿಂದ ವಿದೇಶಾಂಗ ಸಚಿವಾಲಯ ಮುಜುಗರಕ್ಕೆ ಒಳಗಾಗಿತ್ತು. 1988ನೇ ಕೇಡರ್‌ನ ಭಾರತೀಯ ವಿದೇಶಾಂಗ ಸೇವೆ (ಐಎಫ್ಎಸ್‌) ಅಧಿಕಾರಿಯಾಗಿರುವ ಅವರು, ಹಾಲಿ ಹುದ್ದೆಯಲ್ಲಿ ಮುಂದಿನ ತಿಂಗಳು ಅವಧಿ ಪೂರೈಸಲಿದ್ದರು. ಸದ್ಯ ಅವರಿಗೆ ಯಾವುದೇ ಹುದ್ದೆ-ಹೊಣೆ ವಹಿಸಲಾಗಿಲ್ಲ.

ಸರಕಾರದ ಅನುಮತಿ ಇಲ್ಲದೆ ಹಣ ದುರುಪಯೋಗ ಮತ್ತು ಮಿತಿಗಿಂತ ಹೆಚ್ಚು ವೆಚ್ಚ ಮಾಡಿರುವ ಆರೋಪಗಳು ಕೇಳಿಬಂದಿದ್ದ ಹಿನ್ನೆಲೆಯಲ್ಲಿ ಪಾಲ್‌ ವಿರುದ್ಧ ಸಿವಿಸಿ ಮತ್ತು ವಿದೇಶಾಂಗ ಇಲಾಖೆ ತನಿಖೆಗೆ ಶಿಫಾರಸು ಮಾಡಿದ್ದವು. ಮೌಲ್ಯ ವರ್ಧಿತ ತೆರಿಗೆ ಕ್ಲೇಮ್‌ ಹೆಸರಿನಲ್ಲಿ ಹಣ ಪಡೆದುಕೊಳ್ಳುತ್ತಿದ್ದರು ಮತ್ತು ಅದಕ್ಕೆ ಸಂಬಂಧಿಸಿದ ದಾಖಲೆಗಳನ್ನು ತಿರುಚಿದ್ದಾರೆ ಎಂದು ತನಿಖೆಯಿಂದ ಕಂಡುಕೊಳ್ಳಲಾಗಿತ್ತು.