ಇನ್ನೂ ದುರಸ್ತಿಯಾಗದ ರಸ್ತೆ ; ಸಚಿವರ ಸೂಚನೆಗೂ ಸಿಗದ ಮನ್ನಣೆ

Team Udayavani, Jan 12, 2020, 3:19 AM IST

ಗಂಗೊಳ್ಳಿ: ಕಡಲ್ಕೊರೆತ ತಡೆಗಾಗಿ ಗಂಗೊಳ್ಳಿಯಲ್ಲಿ ಕೈಗೊಂಡ ಬ್ರೇಕ್‌ ವಾಟರ್‌ ಕಾಮಗಾರಿ ಸಂಬಂಧಿತ ಘನ ವಾಹನಗಳ ಸಾಗಾಟದಿಂದಾಗಿ ಬಂದರಿನ ಆವರಣದ ಒಳಗಿರುವ ಎಲ್ಲ ರಸ್ತೆಗಳಿಗೂ ಹಾನಿಯಾಗಿದೆ. ಇದರ ಮರು ಡಾಮರೀಕರಣ ಅಥವಾ ಅಭಿವೃದ್ಧಿಪಡಿಸುವ ಹೊಣೆಗಾರಿಕೆ ಬ್ರೇಕ್‌ವಾಟರ್‌ ಕಾಮಗಾರಿ ಗುತ್ತಿಗೆ ವಹಿಸಿಕೊಂಡ ಸಂಸ್ಥೆಯದ್ದಾಗಿದ್ದರೂ, ಅವರು ಈವರೆಗೆ ಈ ಬಗ್ಗೆ ಗಮನವೇ ಹರಿಸಿಲ್ಲ. ಮೀನುಗಾರಿಕಾ ಸಚಿವರು ಈ ಬಗ್ಗೆ ಸೂಚನೆ ನೀಡಿದರೂ, ಅದಕ್ಕೂ ಮನ್ನಣೆ ಸಿಕ್ಕಿಲ್ಲ.

ಕೋಡಿಯಲ್ಲಿ ಸುಮಾರು 900 ಮೀ. ಹಾಗೂ ಗಂಗೊಳ್ಳಿಯಲ್ಲಿ 700 ಮೀ. ಉದ್ದದ 102 ಕೋ.ರೂ. ಬ್ರೇಕ್‌ ವಾಟರ್‌ ಕಾಮಗಾರಿ ಪೂರ್ಣಗೊಂಡಿದೆ. ಇದರಲ್ಲಿ ಗಂಗೊಳ್ಳಿ ಭಾಗದಲ್ಲಿ ತಡೆಗೋಡೆ ನಿರ್ಮಾಣಕ್ಕೆ ಭಾರೀ ಗಾತ್ರದ ಟೆಟ್ರಾಫೈಡ್‌ಗಳನ್ನು, ಘನ ಗಾತ್ರದ ಕಲ್ಲುಗಳನ್ನು ಸಾಗಾಟ ಮಾಡಲು ಘನ ವಾಹನಗಳು ಇಲ್ಲಿನ ಒಳ ರಸ್ತೆಗಳನ್ನು ಬಳಸಿಕೊಂಡಿದ್ದವು. ಈ ಘನ ಗಾತ್ರದ ವಾಹನಗಳ ಸಂಚಾರದಿಂದ ಈಗ ಬಂದರಿನ ಒಳಗಿನ ರಸ್ತೆಗಳೆಲ್ಲ ಸಂಪೂರ್ಣ ಹದಗೆಟ್ಟು ಹೋಗಿದೆ.

ಇಲ್ಲಿ ಮೊದಲಿದ್ದ ಡಾಮರೆಲ್ಲ ಕಿತ್ತು ಹೋಗಿ ಈಗ ಬರೀ ಹೊಂಡ, ಜಲ್ಲಿ ಕಲ್ಲುಗಳು ಮಾತ್ರ ಉಳಿದುಕೊಂಡಿದೆ. ಇದರಿಂದ ಮೀನು ಇನ್ನಿತರ ಮೀನುಗಾರಿಕೆಗೆ ಸಂಬಂಧಿಸಿದ ಸರಕುಗಳ ಸಾಗಾಟದ ವಾಹನಗಳಿಗೆಲ್ಲ ಸಂಚರಿಸಲು ಸಮಸ್ಯೆಯಾಗುತ್ತಿದೆ.

ಬ್ರೇಕ್‌ ವಾಟರ್‌ ಕಾಮಗಾರಿ ವೇಳೆ 5 ಕೋ.ರೂ. ಅನುದಾನವನ್ನು ರಸ್ತೆ ದುರಸ್ತಿ, ಇನ್ನಿತರ ಪರಿಸರ ಅಭಿವೃದ್ಧಿಗೆ ವಿನಿಯೋಗಿಸಬೇಕು ಎನ್ನುವ ಕರಾರು ಇದ್ದರೂ ರಸ್ತೆ ಡಾಮ ರಿಗೆ ಮುಂದಾಗುತ್ತಿಲ್ಲ ಎನ್ನುವುದು ಮೀನುಗಾರರ ಆರೋಪ. ಆದರೆ ಇದು ಕರಾರಿನಲ್ಲಿ ಇರಲಿಲ್ಲ ಎನ್ನುವುದು ಗುತ್ತಿಗೆದಾರರ ವಾದ ವಾಗಿದೆ. ಹಾಗಿದ್ದರೆ ಇವರು ಕಾಮಗಾರಿಗೆ ಬೇಕಾದ ಸಲಕರಣೆ, ಸಾಮಗ್ರಿ ಸಾಗಾಟಕ್ಕೆ ಇವರು ನಿತ್ಯ ಬಳಕೆಯ ರಸ್ತೆ ಬಳಸಬಾರದಿತ್ತು ಎನ್ನುವುದು ಮೀನುಗಾರರ ವಾದವಾಗಿದೆ.

ರಸ್ತೆ ದುರಸ್ತಿ : ಜವಾಬ್ದಾರಿ
ಬಂದರಿನ ಒಳಗಿನ ರಸ್ತೆಯನ್ನು ಅವರ ಅಗತ್ಯಕ್ಕೆ ಬಳಸಿಕೊಂಡು, ರಸ್ತೆಯೆಲ್ಲ ಸಂಪೂರ್ಣ ಹಾಳಾಗಿದೆ. ದುರಸ್ತಿ ಮಾಡಿಕೊಡುವುದು ಅವರ ಜವಾಬ್ದಾರಿಯಾಗಿದೆ. ಈ ಬಗ್ಗೆ ಮೀನುಗಾರರೆಲ್ಲ 2 ಬಾರಿ ಸಭೆ ಸೇರಿ ರಸ್ತೆ ದುರಸ್ತಿಗೆ ಆಗ್ರಹಿಸಿದ್ದೇವು. ಆದರೂ ಯಾವುದೇ ಪ್ರಗತಿ ಮಾತ್ರ ಆಗಿಲ್ಲ. – ಅರುಣ್‌ ಕುಮಾರ್‌, ಮೀನುಗಾರ ಮುಖಂಡರು

ಶೀಘ್ರ ರಸ್ತೆ ಡಾಮರೀಕರಣ
ಈ ಬಗ್ಗೆ ಬ್ರೇಕ್‌ವಾಟರ್‌ ಕಾಮಗಾರಿ ವಹಿಸಿಕೊಂಡಿರುವ ಗುತ್ತಿಗೆದಾರರಿಗೆ ವಾರದ ಹಿಂದೆ ನೋಟಿಸ್‌ ಕೂಡ ನೀಡಲಾಗಿದೆ. ಆದಷ್ಟು ಬೇಗ ರಸ್ತೆ ಕಾಮಗಾರಿಗೆ ಎಲ್ಲ ಕ್ರಮವಹಿಸಲಾಗುವುದು. 100 ಕೋ.ರೂ. ಪೈಕಿ 71 ಕೋ.ರೂ. ಅನುದಾನ ನೀಡಲಾಗಿದೆ. ಆದರೆ ಇನ್ನೂ ಬಾಕಿ 28 ಕೋ.ರೂ. ಅನುದಾನ ಬಾಕಿಯಿದೆ.
– ಉದಯಕುಮಾರ್‌, ಸಹಾಯಕ ಇಂಜಿನಿಯರ್‌, ಬಂದರು ಮತ್ತು ಮೀನುಗಾರಿಕಾ ಇಲಾಖೆ ಉಡುಪಿ

ಸಂಸದರ ಸೂಚನೆ
ಈ ರಸ್ತೆಯನ್ನು ಅಭಿವೃದ್ಧಿಪಡಿಸಬೇಕು ಎನ್ನುವ ಗಂಗೊಳ್ಳಿಯ ಮೀನುಗಾರರ ಬೇಡಿಕೆಗೆ ಭೇಟಿ ಕೊಟ್ಟಿದ ಸಂಸದ ಬಿ.ವೈ. ರಾಘವೇಂದ್ರ ಅವರು ಸೂಚಿಸಿದ್ದು, ಇದಲ್ಲದೆ ರಸ್ತೆ ಅಭಿವೃದ್ಧಿಪಡಿಸದೇ ಬಾಕಿ ಉಳಿದ ಹಣವನ್ನು ಬಿಡು ಗಡೆ ಮಾಡಲು ಬಿಡುವುದಿಲ್ಲ ಎಂದು ಕೂಡ ತಿಳಿಸಿದ್ದರು. ಶಾಸಕ ಬಿ.ಎಂ. ಸುಕುಮಾರ್‌ ಶೆಟ್ಟಿ ಅವರು ಕೂಡ ರಸ್ತೆ ಅಭಿವೃದ್ಧಿಗೆ ಒತ್ತಾಯಿಸಿದ್ದರು. ಇತ್ತೀಚೆಗೆ ಬಂದರು ಮತ್ತು ಮೀನುಗಾರಿಕಾ ಸಚಿವ ಕೋಟ ಶ್ರೀನಿವಾಸ ಪೂಜಾರಿಯವರು ಇಲ್ಲಿಗೆ ಭೇಟಿ ನೀಡಿದ್ದಾಗಲೂ ರಸ್ತೆ ಕಾಮಗಾರಿ ಆಗದೇ ಬಾಕಿ ಹಣ ಬಿಡುಗಡೆ ಮಾಡುವುದಿಲ್ಲ ಎಂದು ಎಚ್ಚರಿಸಿದ್ದರು.

ಬಂದರು ಕೂಡ ನಿರ್ಲಕ್ಷ್ಯ
ಇಲ್ಲಿನ ಬಂದರಿನ ಎರಡನೇ ಹರಾಜು ಪ್ರಾಂಗಣದ ಜೆಟ್ಟಿ ಕುಸಿದು ಒಂದೂವರೆ ವರ್ಷಗಳೇ ಕಳೆದರೂ, ಇನ್ನೂ ಇದರ ಅಭಿವೃದ್ಧಿ ಕುರಿತಂತೆ ಯಾವುದೇ ಕ್ರಮಕೈಗೊಂಡಿಲ್ಲ. ಇದರ ಮರು ನಿರ್ಮಾಣಕ್ಕಾಗಿ 12 ಕೋ.ರೂ. ಅನುದಾನದ ಅಗತ್ಯವಿದೆಯೆಂದು ಇಂಜಿನಯರ್‌ಗಳು ವರದಿ ತಯಾರಿಸಿ ಸರಕಾರಕ್ಕೆ ಸಲ್ಲಿಸಿದ್ದು, ಅದಕ್ಕಿನ್ನು ಪ್ರಸ್ತಾವನೆ ಸಿಗಬೇಕಿದೆ.