ತ್ರಿಪುರಾದಲ್ಲೇ ಬ್ರು ಜನಾಂಗ ವಾಸ್ತವ್ಯ

Team Udayavani, Jan 17, 2020, 1:31 AM IST

ಹೊಸದಿಲ್ಲಿ: ಮಿಜೋರಾಂನಿಂದ ನಿರಾಶ್ರಿತರಾಗಿ ಬಂದಿರುವ 30 ಸಾವಿರ ಬ್ರು ಬುಡಕಟ್ಟು ಜನಾಂಗದವರು ತ್ರಿಪುರಾದಲ್ಲಿ ನೆಲೆಸಲಿದ್ದಾರೆ. ಅದಕ್ಕೆ ಸಂಬಂಧಿಸಿದ ಒಪ್ಪಂದಕ್ಕೆ ಗುರುವಾರ ಹೊಸದಿಲ್ಲಿಯಲ್ಲಿ ಸಹಿ ಹಾಕಲಾಗಿದೆ. ತ್ರಿಪುರಾ ಸಿಎಂ ಬಿಪ್ಲಬ್‌ ಕುಮಾರ್‌ ದೇವ್‌, ಮಿಜೋರಾಂ ಸಿಎಂ ಝೊರಾಮ್‌ತಾಂಗಾ, ಕೇಂದ್ರ ಗೃಹ ಸಚಿವ ಅಮಿತ್‌ ಶಾ ಈ ಸಂದರ್ಭದಲ್ಲಿದ್ದರು.

ಒಪ್ಪಂದದ ಪ್ರಕಾರ ಪ್ರತಿ ಬ್ರು ಕುಟುಂಬಕ್ಕೆ 4 ಲಕ್ಷ ರೂ. ನೀಡಲಾಗುತ್ತದೆ. ಅದನ್ನು ನಿಗದಿತ ಠೇವಣಿ ರೂಪದಲ್ಲಿ ಇರಿಸಲಾಗುತ್ತದೆ. 2 ವರ್ಷಗಳ ಕಾಲ ಪ್ರತಿ ತಿಂಗಳು 5 ಸಾವಿರ ರೂ. ನೀಡಲಾಗುತ್ತದೆ. ಜಮೀನು, 2 ವರ್ಷಗಳ ಕಾಲ ಪಡಿತರ ನೀಡಲಾಗುತ್ತದೆ. ಈ ಉದ್ದೇಶಕ್ಕಾಗಿ ಕೇಂದ್ರ ಸರಕಾರ 600 ಕೋಟಿ ರೂ. ನೀಡಲಿದೆ.

1997ರ ಬಳಿಕ ತ್ರಿಪುರಾದಲ್ಲಿ ಈ ಬುಡಕಟ್ಟು ಜನಾಂಗ ನೆಲೆಸಿದೆ. ಇದೇ ವಿಚಾರಕ್ಕೆ ಸಂಬಂಧಿಸಿದಂತೆ 2018ರ ಜುಲೈನಲ್ಲಿ ಒಪ್ಪಂದಕ್ಕೆ ಸಹಿ ಹಾಕಲಾಗಿತ್ತಾದರೂ, ಅದು ಯಶಸ್ವಿಯಾಗಿರಲಿಲ್ಲ. ಇದುವರೆಗೆ 328 ಕುಟುಂಬಗಳು ಮಾತ್ರ ತ್ರಿಪುರಾಕ್ಕೆ ಬಂದು ನೆಲೆಸಿವೆ.