ಚಾಲಕರ ಒತ್ತಡ ನಿವಾರಣೆಗೆ ಯೋಗ ತರಬೇತಿ

Team Udayavani, Jan 24, 2020, 11:28 AM IST

ನೆಲಮಂಗಲ: ಇತ್ತೀಚಿನ ದಿನಗಳಲ್ಲಿ ವಾಹನಗಳ ಸಂಖ್ಯೆ ಹೆಚ್ಚಿ ಚಾಲಕರು ದೈಹಿಕ ಸಮಸ್ಯೆ ಹಾಗೂ ಮಾನಸಿಕ ಒತ್ತಡಕ್ಕೆ ಸಿಲುಕುತ್ತಿದ್ದಾರೆ. ಹೀಗಾಗಿಯೇ ರಸ್ತೆ ಅಪಘಾತಗಳು ಸಂಭವಿಸುತ್ತಿದ್ದು, ಅಪಘಾತ ಗಳನ್ನು ತಪ್ಪಿಸಲು ಪ್ರಾದೇಶಿಕ ಸಾರಿಗೆ ಕಚೇರಿ(ಆರ್‌ ಟಿಒ) ಅಧಿಕಾರಿಗಳು ಹೊಸ ಮಾರ್ಗವೊಂದನ್ನು ಕಂಡುಕೊಂಡಿದ್ದಾರೆ. ಚಾಲಕರಿಗೆ ಯೋಗ ತರಬೇತಿ ನೀಡುತ್ತಿದ್ದು, ಅಪಘಾತಗಳ ಸಂಖ್ಯೆಯನ್ನು ತಗ್ಗಿಸುವಲ್ಲಿ ಯಶಸ್ವಿಯೂ ಆಗಿದ್ದಾರೆ.

ಬೆಂಗಳೂರಿನ ಬಿಎಂಟಿಸಿ ತರಬೇತಿ ಶಾಲೆ ಹಾಗೂ ನೆಲಮಂಗಲ ಪ್ರಾದೇಶಿಕ ಆರ್‌ಟಿಒ ಕಚೇರಿಗೆ ವಾಹನ ಚಾಲನೆ ಪರವಾನಗಿ ಪಡೆಯಲು ಬರುವ ಚಾಲಕರಿಗೆ ಯೋಗಾಭ್ಯಾಸ ಮಾಡಿಸಿ, ಒತ್ತಡ ನಿಯಂತ್ರಿಸಲು ತರಬೇತಿ ನೀಡಲಾಗುತ್ತಿದೆ. ಸರ್ಕಾರ, ಪ್ರತಿ ವರ್ಷ ರಸ್ತೆ ಸುರಕ್ಷತೆಗೆ ಸರ್ಕಾರ ಕೋಟಿಗಟ್ಟಲೇ ಖರ್ಚು ಮಾಡಿ, ಜಾಗೃತಿ ಮೂಡಿಸಿದೆ.

ಒತ್ತಡ ತಗ್ಗಿಸಲು ಯೋಗದ ಶಿಕ್ಷಣ: ಅಪಘಾತಕ್ಕೆ ಒತ್ತಡವೇ ಬಹಳ ಮುಖ್ಯ ಕಾರಣ ಎಂದು ತಿಳಿದ ಆರ್‌ಟಿಒ ಅಧಿಕಾರಿಗಳು ಹಾಗೂ ಬಿಎಂಟಿಸಿ ತರಬೇತುದಾರರು, ಚಾಲಕರಿಗೆ ಯೋಗ ತರಬೇತಿ ಕೊಡಿಸುತ್ತಿದ್ದಾರೆ. ನಂತರ ಚಾಲಕರ ಒತ್ತಡ ನಿವಾರಣೆ ಜತೆ ಅಪಘಾತ ನಿಯಂತ್ರಣ ಮನಗಂಡ ಅಧಿಕಾರಿ ಗಳು ತರಬೇತಿ ಶಾಲೆಗಳಲ್ಲಿ ಹಾಗೂ ಚಾಲನೆ ಪರವಾನಗಿ (ಡಿಎಲ್‌)ಗೆ ಬರುವ ಚಾಲಕರು ಸೇರಿದಂತೆ 5 ಸಾವಿರ ಚಾಲಕರಿಗೆ ಯೋಗದ ಅಭ್ಯಾಸ ಮಾಡಿಸಲಾಗಿದೆ. 10 ಸಾವಿರ ಕಾಲೇಜು ವಿದ್ಯಾರ್ಥಿ ಗಳಿಗೆ ತರಬೇತಿ ನೀಡಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಒತ್ತಡ ನಿವಾರಿಸುವ ಯೋಗ: ಚಾಲಕರು ಹಾಗೂ ವೃತ್ತಿಪರ ಚಾಲಕರು ಪ್ರತಿನಿತ್ಯ 10 ನಿತ್ಯ ಸೂರ್ಯ ನಮಸ್ಕಾರ, 5 ನಿಮಿಷ ಶವಾಸನ, 5 ನಿಮಿಷ ಪ್ರಾಣಾಯಾಮ, 5 ನಿಮಿಷ ಧ್ಯಾನ ಸೇರಿದಂತೆ ಅರ್ಧ ಗಂಟೆವರೆಗೆ ಯೋಗಾಭ್ಯಾಸ ಮಾಡಿದರೆ, ಮಾನಸಿಕ ಒತ್ತಡದ ಜತೆಗೆ ವಾಹನ ಚಾಲನೆ ಮಾಡಿ ಉಂಟಾಗುವ ದೈಹಿಕ ಒತ್ತಡ ದೂರ ಮಾಡಿಕೊಳ್ಳಬಹುದು. ವಾಹನ ಚಾಲನೆ ಮಾಡುವಾಗ ಕೆಲವು ಬಾರಿ ದೀರ್ಘ‌ ಉಸಿರಾಟ ಮಾಡಿದರೆ ದೇಹ ಮನಸ್ಸು ಏಕಾಗ್ರತೆ ಹೆಚ್ಚುತ್ತದೆ ಎಂದು ಆರ್‌ಟಿಒ ಹಿರಿಯ ಇನ್‌ಸ್ಪೆಕ್ಟರ್‌ ಡಾ.ಡಿ.ಎಸ್‌.ಒಡೆಯರ್‌ ತಿಳಿಸಿದರು.

ಬಿಎಂಟಿಸಿ ಚಾಲಕರಿಗೆ ಮದ್ದು: ಬೆಂಗಳೂರು ನಗರದ ಟ್ರಾಫಿಕ್‌ ಒತ್ತಡ ಹಾಗೂ ವಾಯು ಮಾಲಿನ್ಯದ ನಡುವೆ ನರಕಯಾತನೆ ಅನುಭವಿಸುವ ಬಿಎಂಟಿಸಿ ಚಾಲಕರು ದಿನನಿತ್ಯ ಬಸ್‌ ಚಾಲನೆ ಮಾಡಿ, ಒತ್ತಡದಿಂದ ಅಪಘಾತ ಮಾಡಿಕೊಂಡ ಉದಾರಣೆಗಳಿದೆ. 43 ಡಿಪೋ ವ್ಯಾಪ್ತಿಯಲ್ಲಿ ಅಪಘಾತ ಮಾಡುವ ಚಾಲಕರಿಗೆ ತರಬೇತಿ ನೀಡುವ ಸಂದರ್ಭದಲ್ಲಿ ಯೋಗದ ಅಭ್ಯಾಸ ಮಾಡುತ್ತಿದ್ದು, ಚಾಲಕರಿಂದ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗುವ ಜೊತೆ ಅಪಘಾತ ಪ್ರಮಾಣದಲ್ಲಿ ಕಡಿಮೆಯಾಗಿದೆ ಎಂದು ತಿಳಿಸಿದರು.

ಚಟದಿಂದ ಮುಕ್ತಿ: ವೃತ್ತಿಪರ ಚಾಲಕರು ಶೇ.90ರಷ್ಟು ದೈಹಿಕ ಒತ್ತಡದಿಂದ ಒಂದಲ್ಲಾ ಒಂದು ಚಟ ಅಭ್ಯಾಸ ಮಾಡಿಕೊಂಡಿರುತ್ತಾರೆ. ಆ ಚಟಗಳಿಂದ ಅನುಕೂಲಕ್ಕಿಂತ ಅನಾನುಕೂಲವೇ ಹೆಚ್ಚು, ವೃತ್ತಿಪರ ಚಾಲಕರು ಯೋಗ ಮಾಡಬೇಕು. ದುಶ್ಚಟಗಳಿಂದ ದೂರವಾದರೆ ಅಪಘಾತಗಳು ಕಡಿಮೆಯಾಗುತ್ತವೆ ಎನ್ನುತ್ತಾರೆ ಯೋಗ ಶಿಕ್ಷಕರು.

ಸುರಕ್ಷತಾ ಸಪ್ತಾಹ: ಸರ್ಕಾರ ಈಗಾಗಲೇ 31ನೇ ರಸ್ತೆ ಸುರಕ್ಷತೆ ಸಪ್ತಾಹ ಮಾಡಿದ್ದು, ಕೋಟಿಗಟ್ಟಲೇ ಹಣ ವ್ಯಯಿಸಿದೆ. ಆದರೆ ಸರ್ಕಾರ ಸ್ವಲ್ಪ ಬದಲಾವಣೆ ಮಾಡಿ, ಸಪ್ತಾಹದ ಸಮಯದಲ್ಲಿ ಯೋಗದಿಂದ ಚಾಲಕರಿಗೆ ಹಾಗೂ ಅಪಘಾತ ನಿಯಂತ್ರಣಕ್ಕೆ ಕಾರಣವಾಗುವ ಅಂಶ, ತಿಳಿಸಿದರೆ ವಾರಗಳ ಕಾಲ ನಡೆಯುವ ಸಪ್ತಾಹ ಯಶಸ್ವಿಯಾಗುತ್ತದೆ ಎಂಬುದು ಚಾಲಕರ ಮಾತು.

ಬಹುತೇಕ ಚಾಲಕರು ದೈಹಿಕ ಸಮಸ್ಯೆ ಹಾಗೂ ಒತ್ತಡದಿಂದ ಬಳಲುತ್ತಿರುತ್ತಾರೆ. ಹೀಗಾಗಿ ತರಬೇತಿ ಶಾಲೆಯಲ್ಲಿ ಚಾಲಕರಿಗೆ ಕಡ್ಡಾಯವಾಗಿ ಯೋಗಾಭ್ಯಾಸ ಮಾಡಿಸಲಾಗುತ್ತಿದೆ. ಅದರಿಂದ ಬಹಳಷ್ಟು ಪ್ರಯೋಜನವಾಗಿದ್ದು, ಒತ್ತಡ ನಿವಾರಣೆಗೆ ಉತ್ತಮ ಔಷಧ ಯೋಗ.  –ಶ್ರೀನಿವಾಸ್‌, ಬಿಎಂಟಿಸಿ ತರಬೇತಿ ವಿಭಾಗದ ಇನ್‌ಸ್ಪೆಕ್ಟರ್‌