ಕಾನೂನು ಸ್ವಯಂಸೇವಕರಿಗೆ ಸರ್ಟಿಫಿಕೇಟ್‌ ಕೋರ್ಸ್‌

Team Udayavani, Jan 25, 2020, 11:24 AM IST

ಹುಬ್ಬಳ್ಳಿ: ಕಾನೂನು ಜನರ ಬಳಿಗೆ ಹೋಗುವ ಅವಶ್ಯಕತೆ ಇದೆ. ಇದನ್ನು ವ್ಯವಸ್ಥಿತವಾಗಿ ವಿಶ್ವವಿದ್ಯಾಲಯ ಮಟ್ಟದಲ್ಲಿ ನಡೆಸಿಕೊಂಡು ಹೋಗಲು ಸಂಯೋಜಿತ ಕಾನೂನು ಮಹಾವಿದ್ಯಾಲಯಗಳಲ್ಲಿ ಕಾನೂನು ಸ್ವಯಂಸೇವಕರ ತರಬೇತಿಗಾಗಿ ಸರ್ಟಿಫಿಕೇಟ್‌ ಕೋರ್ಸ್‌ ಅನ್ನು ಸಂಬಂಧಿತ ಮಂಡಳಿಗಳಿಂದ ಅನುಮೋದನೆ ಪಡೆದು ಪ್ರಾರಂಭಿಸಲಾಗುವುದು ಎಂದು ಕಾನೂನು ವಿವಿ ಕುಲಪತಿ ಡಾ| ಪಿ. ಈಶ್ವರ ಭಟ್‌ ಹೇಳಿದರು.

ನವನಗರದ ಕರ್ನಾಟಕ ರಾಜ್ಯ ಕಾನೂನು ವಿವಿಯಲ್ಲಿ ಡೆವಲಪ್‌ಮೆಂಟ್‌ ಎಜುಕೇಶನ್‌ ಸರ್ವೀಸ್‌ (ಡೀಡ್ಸ್‌), ಪೂರಕ ಕಾನೂನು ಸುಗಮಕಾರರ ನೆಟ್‌ ವರ್ಕ್‌ ಸಹಯೋಗದೊಂದಿಗೆ ಶುಕ್ರವಾರ ಹಮ್ಮಿಕೊಂಡಿದ್ದ “ಮಹಿಳೆಯರ ಜೊತೆ ಕಾನೂನಿನ ನಡೆ’ ವಿಷಯದ ಮೇಲೆ ರಾಜ್ಯಮಟ್ಟದ ವಿಚಾರ ಸಂಕಿರಣ ಉದ್ಘಾಟಿಸಿ ಮಾತನಾಡಿದರು. ಜನರ ಬಳಿ ಕಾನೂನು ಕೊಂಡೊಯ್ಯುವ ದಿಸೆಯಲ್ಲಿ ಡೀಡ್ಸ್‌ ಸಂಸ್ಥೆಯು ಶ್ಲಾಘನೀಯ ಕಾರ್ಯ ಮಾಡುತ್ತಿದೆ ಎಂದರು. ಡಿಎಲ್‌ಎಸ್‌ಎದ ಸದಸ್ಯ ಕಾರ್ಯದರ್ಶಿ, ಹಿರಿಯ ಸಿವಿಲ್‌ ನ್ಯಾಯಾಧೀಶ ಆರ್‌. ಎಸ್‌. ಚಿನ್ನಣ್ಣವರ ಮಾತನಾಡಿ, ಪೂರಕ ಕಾನೂನು ಸುಗಮಕಾರರಿಗೆ ಡಿಎಲ್‌ಎಸ್‌ ಎನಿಂದ ಗುರುತಿನ ಪತ್ರ ನೀಡುವುದರ ಮುಖಾಂತರ ಪೂರಕ ಕಾನೂನು ಸ್ವಯಂ ಸೇವಕರನ್ನು ಸಕ್ರಿಯವಾಗಿ ಕಾನೂನು ನೆರವು ಕಾರ್ಯಕ್ರಮದಲ್ಲಿ ತೊಡಗಿಸಿಕೊಳ್ಳಲು ಸಹಾಯವಾಗುತ್ತದೆ ಎಂದರು.

ಮೌಲ್ಯಮಾಪನ ಕುಲಸಚಿವ ಡಾ| ಜಿ.ಬಿ. ಪಾಟೀಲ ಮಾತನಾಡಿದರು. ಮಂಗಳೂರಿನ ಡೀಡ್ಸ್‌ ನಿರ್ದೇಶಕಿ ಮರ್ಲಿನ್‌ ಮಾರ್ಟಿಸ್‌ ಅಧ್ಯಕ್ಷತೆ ವಹಿಸಿದ್ದರು. ನಂತರ ಕರ್ನಾಟಕ ರಾಜ್ಯ ಪೂರಕ ಕಾನೂನು ಸುಗಮಕಾರರ ಸಮುತ್ಛಯದ ಸಭೆ ನಡೆಯಿತು. ಮೋಹನಚಂದ್ರ, ಗಿರಿಜಾ ಪಾಟೀಲ, ನರಸಿಂಹರಾಜು ಕಮ್ಮಾರ, ಡಾ| ರಾಜೇಂದ್ರಕುಮಾರ ಹಿಟ್ಟಣಗಿ, ಸಹಾಯಕ ಪ್ರಾಧ್ಯಾಪಕರು ಭಾಗವಹಿಸಿದ್ದರು.

ಸಹಾಯಕ ಪ್ರಾಧ್ಯಾಪಕ ಡಾ| ಸುನಿಲ ಬಗಾಡೆ ಸ್ವಾಗತಿಸಿದರು. ಶ್ರೀಮತಿ ಗುಲಾಬಿ ನಿರೂಪಿಸಿದರು. ತುಕಾರಾಮ ಯಕ್ಕಾರ ವಂದಿಸಿದರು.