ಏ.1ರಿಂದ ಬಿಎಸ್‌-6 ಪೆಟ್ರೋಲ್‌, ಡೀಸೆಲ್‌ ದರ 1ರೂ. ಏರಿಕೆ?

Team Udayavani, Jan 30, 2020, 9:50 PM IST

ನವದೆಹಲಿ: ಏ.1ರಿಂದ ದೇಶಾದ್ಯಂತ ಭಾರತ್‌ ಸ್ಟೇಜ್‌ -6 (ಬಿಎಸ್‌06) ಪರಿಸರ ಮಾಲಿನ್ಯ ನಿಯಂತ್ರಣ ವ್ಯವಸ್ಥೆ ಜಾರಿ ಬರಲಿದೆ. ಅದಕ್ಕೆ ಪೂರಕವಾಗಿ ಪೆಟ್ರೋಲ್‌, ಡೀಸೆಲ್‌ ದರ ಪ್ರತಿ ಲೀಟರ್‌ಗೆ 50 ಪೈಸೆಯಿಂದ 1 ರೂ. ವರೆಗೆ ಏರಿಕೆಯಾಗಲಿದೆ.

ಸದ್ಯ ದೇಶದಲ್ಲಿ ಐರೋಪ್ಯ ರಾಷ್ಟ್ರಗಳಲ್ಲಿರುವ ಯೂರೋ-4 ಮಾದರಿಯಂತೆ ಬಿಎಸ್‌-4 ಮಾದರಿಯ ಇಂಧನಗಳನ್ನು ಪೂರೈಸಲಾಗುತ್ತಿದೆ.

ಸುಪ್ರೀಂಕೋರ್ಟ್‌ ನಿರ್ದೇಶನದ ಹಿನ್ನೆಲೆಯಲ್ಲಿ ಏ.1ರಿಂದ ಬಿಎಸ್‌-6 ನಿಯಮಗಳಿಗೆ ಅನ್ವಯವಾಗುವಂತೆ ಪೆಟ್ರೋಲ್‌, ಡೀಸೆಲ್‌ ಅನ್ನು ಮಾರುಕಟ್ಟೆಗೆ ಬಿಡುಗಡೆ ಮಾಡಲಾಗುತ್ತದೆ. ಸದ್ಯ ದೇಶದ ಆಯ್ದ ನಗರಗಳಲ್ಲಿ ಮಾತ್ರ ಬಿಎಸ್‌-6 ಇಂಧನ ದೊರೆಯುತ್ತಿದೆ. ಇಂಡಿಯನ್‌ ಆಯಿಲ್‌ ಕಾರ್ಪೊರೇಷನ್‌ ಅಧ್ಯಕ್ಷ ಸಂಜೀವ್‌ ಸಿಂಗ್‌ ಮಾತನಾಡಿ, ಕಂಪನಿಯ ರಿಫೈನರಿಗಳಲ್ಲಿ ಈಗಾಗಲೇ ಬಿಎಸ್‌-6 ನಿಯಮಗಳಿಗೆ ಅನ್ವಯವಾಗುವಂತೆ ಪೆಟ್ರೋಲ್‌, ಡೀಸೆಲ್‌ ಉತ್ಪಾದಿಸಲಾಗುತ್ತದೆ. ಇದರಿಂದಾಗಿ ತೈಲ ಕಂಪನಿಗಳು ರಿಫೈನರಿಗಳ ಮೇಲ್ದರ್ಜೆಗಾಗಿ ಮಾಡಿದ ಹೂಡಿಕೆ ವಾಪಸ್‌ ಪಡೆವ ನಿಟ್ಟಿನಲ್ಲಿ ದರ ಏರಿಕೆ ಅನಿವಾರ್ಯವಾಗಲಿದೆ ಎಂದಿದ್ದಾರೆ.