ಕೊರೋನಾ ಮಹಾಮಾರಿ: ಬಲಿಯಾದವರ ಸಂಖ್ಯೆ 259ಕ್ಕೆ ಏರಿಕೆ: 12,000 ಮಂದಿಯಲ್ಲಿ ವೈರಾಣು ಪತ್ತೆ

Team Udayavani, Feb 1, 2020, 8:38 AM IST

ವುಹಾನ್: ಕೊರೋನಾ ವೈರಸ್ ತನ್ನ ಮರಣ ಮೃದಂಗವನ್ನು ಮುಂದುವರಿಸಿದ್ದು ಈಗಾಗಲೇ ಸಾವನ್ನಪ್ಪಿದವರ ಸಂಖ್ಯೆ 259 ಕ್ಕೆ ಜಿಗಿದಿದೆ. ಮಾತ್ರವಲ್ಲದೆ ಸೋಂಕು ತಗುಲಿದವರ ಪ್ರಮಾಣ ಕೂಡ ದಿನೇ ದಿನೇ ಏರುತ್ತಿದ್ದು 12,000 ಮಂದಿಯಲ್ಲಿ ವೈರಾಣು ಪತ್ತೆಯಾಗಿರುವ ಖಚಿತ ಮಾಹಿತಿಯನ್ನು ಚೀನಾ ಸರ್ಕಾರ ಘೋಷಿಸಿದೆ.

ಶುಕ್ರವಾರ ಒಂದೇ ದಿನ 46 ಜನರು ತೀವ್ರ ಉಸಿರಾಟದ ತೊಂದರೆಯಿಂದ ಮೃತಪಟ್ಟರು ಎಂದು ರಾಷ್ಟ್ರೀಯ ಆರೋಗ್ಯ ಆಯೋಗ ತಿಳಿಸಿದೆ. ಕೊರೋನಾ ವೈರಸ್ ನ ಕೇಂದ್ರಬಿಂದು ವುಹಾನ್ ಪ್ರಾಂತ್ಯದಲ್ಲೇ  ಸೋಂಕು ತಗುಲಿದವರ ಪ್ರಮಾಣ ಏರಿಕೆಯಾಗುತ್ತಿದ್ದು ಪರಿಣಾಮವಾಗ ವಿಶ್ವ ಆರೋಗ್ಯ ಸಂಸ್ಥೆ ಜಾಗತಿಕ ತುರ್ತು ಪರಿಸ್ಥಿತಿಯನ್ನು ಘೋಷಿಸಿದೆ.

ಭಾರತೀಯರು ಸ್ವದೇಶಕ್ಕೆ: ಮಹಾಮಾರಿ ಕೊರೋನಾ ವೈರಸ್ ದಾಳಿಗೆ ತುತ್ತಾಗಿರುವ ಚೀನಾದ ವುಹಾನ್‌ನಲ್ಲಿ ಸಿಲುಕಿರುವ ಭಾರತೀಯ ವಿದ್ಯಾರ್ಥಿಗಳನ್ನು ಸ್ವದೇಶಕ್ಕೆ ಕರೆತರಲಾಗಿದೆ. ಏರ್ ಇಂಡಿಯಾ ಬೋಯಿಂಗ್ 747 ವಿಮಾನದಲ್ಲಿ ಇಂದು ಮುಂಜಾನೆ 324 ಭಾರತೀಯರನ್ನು ಕರೆತರಲಾಗಿದೆ ಎಂದು ವರದಿ ತಿಳಿಸಿದೆ. ದೆಹಲಿಯ ರಾಮ್ ಮನೋಹರ್ ಲೋಹಿಯಾ ಆಸ್ಪತ್ರೆ ಮತ್ತು ಏರ್ ಇಂಡಿಯಾ ಪ್ಯಾರಾಮೆಡಿಕ್‌ನ ಐವರು ವೈದ್ಯರ ತಂಡ ಕೂಡ ಜೊತೆಗಿದ್ದು ಅಗತ್ಯವಾದ ಮುನ್ನೇಚ್ಚರಿಕೆ ತೆಗೆದುಕೊಳ್ಳಲಾಗಿದೆ.