ವನಿತಾ ತ್ರಿಕೋನ ಸರಣಿ: ಸೇಡು ತೀರಿಸಿಕೊಂಡ ಇಂಗ್ಲೆಂಡ್‌

Team Udayavani, Feb 7, 2020, 10:26 PM IST

ಮೆಲ್ಬರ್ನ್: ವನಿತಾ ತ್ರಿಕೋನ ಟಿ20 ಸರಣಿಯಲ್ಲಿ ಭಾರತ ಸತತ 2ನೇ ಸೋಲುಂಡಿದೆ. ಶುಕ್ರವಾರ ಆರಂಭಗೊಂಡ ದ್ವಿತೀಯ ಸುತ್ತಿನ ಸ್ಪರ್ಧೆಯಲ್ಲಿ ಇಂಗ್ಲೆಂಡ್‌ ಕೈಯಲ್ಲಿ 4 ವಿಕೆಟ್‌ಗಳ ಹೊಡೆತ ಅನುಭವಿಸಿದೆ. ಇದರೊಂದಿಗೆ ಇಂಗ್ಲೆಂಡ್‌ ಮೊದಲ ಸುತ್ತಿನ ಸೋಲಿಗೆ ಸೇಡು ತೀರಿಸಿಕೊಂಡಿತು.

ಮೆಲ್ಬರ್ನ್ನ “ಜಂಕ್ಷನ್‌ ಓವಲ್‌’ನಲ್ಲಿ ಮೊದಲು ಬ್ಯಾಟಿಂಗಿಗೆ ಇಳಿಸಲ್ಪಟ್ಟ ಭಾರತ 6 ವಿಕೆಟಿಗೆ ಕೇವಲ 123 ರನ್‌ ಗಳಿಸಿದರೆ, ಇಂಗ್ಲೆಂಡ್‌ 19 ಓವರ್‌ಗಳಲ್ಲಿ 6 ವಿಕೆಟಿಗೆ 124 ರನ್‌ ಹೊಡೆದು ಗೆದ್ದು ಬಂದಿತು. ಶನಿವಾರ ಭಾರತ ಆತಿಥೇಯ ಆಸ್ಟ್ರೇಲಿಯವನ್ನು ಎದುರಿಸಲಿದೆ. ಫೈನಲ್‌ ಪ್ರವೇಶಿಸಲು ಹರ್ಮನ್‌ಪ್ರೀತ್‌ ಪಡೆಗೆ ಇಲ್ಲಿ ಗೆಲುವು ಅನಿವಾರ್ಯ.

ಮಿಂಚಿದ ಮಂಧನಾ
ಭಾರತದ ಪರ ಆರಂಭಿಕ ಆಟಗಾರ್ತಿ ಸ್ಮತಿ ಮಂಧನಾ ಮತ್ತು ವನ್‌ಡೌನ್‌ನಲ್ಲಿ ಬಂದ ಜೆಮಿಮಾ ರೋಡ್ರಿಗಸ್‌ ಮಾತ್ರ ಇಂಗ್ಲೆಂಡ್‌ ದಾಳಿಯನ್ನು ತಡೆದು ನಿಂತರು. 10ನೇ ಓವರ್‌ ತನಕ ಕ್ರೀಸ್‌ನಲ್ಲಿ ಉಳಿದ ಮಂಧನಾ ಆಕ್ರಮಣಕಾರಿಯಾಗಿ ಆಡಿ 40 ಎಸೆತಗಳಿಂದ 45 ರನ್‌ ಬಾರಿಸಿದರು. ಇದರಲ್ಲಿ 7 ಬೌಂಡರಿ ಹಾಗೂ ಇನ್ನಿಂಗ್ಸಿನ ಏಕೈಕ ಸಿಕ್ಸರ್‌ ಸೇರಿತ್ತು. ಜೆಮಿಮಾ 20 ಎಸೆತಗಳಿಂದ 23 ರನ್‌ ಮಾಡಿದರು (3 ಬೌಂಡರಿ).

ಎರಡಂಕೆಯ ಗಡಿ ದಾಟಿದ ಮತ್ತೋರ್ವ ಆಟಗಾರ್ತಿ ನಾಯಕಿ ಹರ್ಮನ್‌ಪ್ರೀತ್‌ ಕೌರ್‌ (14). ಶಫಾಲಿ ವರ್ಮ (8), ವೇದಾ ಕೃಷ್ಣಮೂರ್ತಿ (2), ತನಿಯಾ ಭಾಟಿಯ (8) ವೈಫ‌ಲ್ಯ ಅನುಭವಿಸಿದರು. ಅನ್ಯಾ ಶ್ರಬೊÕàಲ್‌ (31ಕ್ಕೆ 3), ಕ್ಯಾಥರಿನ್‌ ಬ್ರಂಟ್‌ (23ಕ್ಕೆ 2) ಭಾರತವನ್ನು ಕಾಡಿದರು.

ಶೀವರ್‌ ಅರ್ಧ ಶತಕ
ಚೇಸಿಂಗ್‌ ವೇಳೆ ಇಂಗ್ಲೆಂಡ್‌ 28ಕ್ಕೆ 3 ವಿಕೆಟ್‌ ಕಳೆದುಕೊಂಡಿತಾದರೂ ನಥಾಲಿ ಶೀವರ್‌ ಅರ್ಧ ಶತಕದ ಮೂಲಕ ತಂಡಕ್ಕೆ ಆಸರೆಯಾದರು (38 ಎಸೆತ, 50 ರನ್‌, 6 ಬೌಂಡರಿ, 1 ಸಿಕ್ಸರ್‌). ನಾಯಕಿ ಹೀತರ್‌ ನೈಟ್‌ 18, ಫ್ರಾನ್‌ ವಿಲ್ಸನ್‌ ಔಟಾಗದೆ 20 ರನ್‌ ಮಾಡಿದರು.

ಸಂಕ್ಷಿಪ್ತ ಸ್ಕೋರ್‌
ಭಾರತ-6 ವಿಕೆಟಿಗೆ 123 (ಮಂಧನಾ 45, ಜೆಮಿಮಾ 23, ಶ್ರಬೊÕàಲ್‌ 31ಕ್ಕೆ 3, ಬ್ರಂಟ್‌ 23ಕ್ಕೆ 2). ಇಂಗ್ಲೆಂಡ್‌-19 ಓವರ್‌ಗಳಲ್ಲಿ 6 ವಿಕೆಟಿಗೆ 124 (ಶೀವರ್‌ 50, ಫ್ರಾನ್‌ ಔಟಾಗದೆ 20, ನೈಟ್‌ 18, ರಾಜೇಶ್ವರಿ 23ಕ್ಕೆ 3).