ಕೆಜಿಎಫ್-2ಗೆ ರವೀನಾ ಟಂಡನ್‌ ಎಂಟ್ರಿ

ಸಿನಿಮಾ ನೋಡಿದ ರವೀನಾ ಟಂಡನ್‌ ಯಶ್‌ ಅವರ ನಟನೆಯನ್ನು ಮೆಚ್ಚಿ ಟ್ವೀಟ್‌ ಕೂಡಾ ಮಾಡಿದ್ದರು.

Team Udayavani, Feb 10, 2020, 3:01 PM IST

ಯಶ್‌ ನಾಯಕರಾಗಿರುವ “ಕೆಜಿಎಫ್-2’ನಲ್ಲಿ ರವೀನಾ ಟಂಡನ್‌ ನಟಿಸಲಿದ್ದಾರಂತೆ …ಹೀಗೊಂದು ಸುದ್ದಿ ಅನೇಕ ದಿನಗಳಿಂದ ಹರಿದಾಡುತ್ತಿದ್ದರೂ ಚಿತ್ರತಂಡ ಮಾತ್ರ ಅಧಿಕೃತವಾಗಿ ಈ ಬಗ್ಗೆ ಏನೂ ಹೇಳಿರಲಿಲ್ಲ.

ಈಗ ಸ್ವತಃ ಚಿತ್ರತಂಡ ರವೀನಾ ಟಂಡನ್‌ ಎಂಟ್ರಿಯನ್ನು ಖಚಿತಪಡಿಸಿದೆ. ನಿರ್ದೇಶಕ ಪ್ರಶಾಂತ್‌ ನೀಲ್‌, ರವೀನಾ ಟಂಡನ್‌ ಜೊತೆಗಿರುವ ಫೋಟೋ ಹಾಕಿ, ಅವರಿಗೆ ವೆಲ್‌ಕಮ್‌ ಹೇಳಿದ್ದಾರೆ. ಚಿತ್ರದಲ್ಲಿ ರವೀನಾ ಟಂಡನ್‌, ರಮೀಕಾ ಸೇನ್‌ ಎಂಬ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಈ ಚಿತ್ರದಲ್ಲಿ ರವೀನಾ ರಾಜಕಾರಣಿಯಾಗಿ ಕಾಣಿಸಿಕೊಳ್ಳಲಿದ್ದಾರಂತೆ.

ಮೂಲಗಳ ಪ್ರಕಾರ, ಪ್ರಧಾನಿ ಪಾತ್ರದಲ್ಲಿ ರವೀನಾ ನಟಿಸಲಿದ್ದಾರೆ. ಯಶ್‌ ನಾಯಕರಾಗಿರುವ “ಕೆಜಿಎಫ್’ ಚಿತ್ರದ ಹಿಂದಿ ವಿತರಣೆಯನ್ನು ರವೀನಾ ಟಂಡನ್‌ ಅವರ ಪತಿ ಅನಿಲ್‌ ತದಾನಿ ಪಡೆದಿದ್ದರು. ಚಿತ್ರ ಹಿಂದಿಯಲ್ಲೂ ದೊಡ್ಡ ಯಶಸ್ಸು ಕಂಡಿತು. ಅಂದು ಸಿನಿಮಾ ನೋಡಿದ ರವೀನಾ ಟಂಡನ್‌ ಯಶ್‌ ಅವರ ನಟನೆಯನ್ನು ಮೆಚ್ಚಿ ಟ್ವೀಟ್‌ ಕೂಡಾ ಮಾಡಿದ್ದರು. ಈಗ ಚಿತ್ರದ ಮುಂದುವರೆದ ಭಾಗದ ಪ್ರಮುಖ ಪಾತ್ರವೊಂದಕ್ಕಾಗಿ ರವೀನಾ ಅವರನ್ನೇ ಚಿತ್ರತಂಡ ಕರೆತಂದಿದೆ. “ಡೆತ್‌ ವಾರೆಂಟ್‌ ಹೊರಡಿಸುವ ಮಹಿಳೆಯ ಆಗಮನವಾಗಿದೆ…’ಎಂದು ಪ್ರಶಾಂತ್‌ ನೀಲ್‌ ಬರೆದುಕೊಂಡಿದ್ದಾರೆ.

ಉಪೇಂದ್ರ ನಿರ್ದೇಶನದ “ಉಪೇಂದ್ರ’ ಚಿತ್ರದಲ್ಲಿ ರವೀನಾ ಟಂಡನ್‌ ಅವರು ನಟಿಸಿದ್ದರು. ಆ ನಂತರ ಯಾವುದೇ ಕನ್ನಡ ಸಿನಿಮಾದಲ್ಲಿ ನಟಿಸಿರಲಿಲ್ಲ. ಈಗ ದೊಡ್ಡ ಗ್ಯಾಪ್‌ನ ನಂತರ ಬಂದಿದ್ದಾರೆ. ಈಗಾಗಲೇ “ಕೆಜಿಎಫ್-2′ ಚಿತ್ರದಲ್ಲಿ ಸಂಜಯ್‌ ದತ್‌ ನಟಿಸಿದ್ದಾರೆ.