ಇಬ್ಬರು ಶಿಕ್ಷಕರು ಪ್ರೀತಿಸಿದ್ದು ಒಂದೇ ವಿದ್ಯಾರ್ಥಿನಿಯನ್ನ; ಸಾವಿನಲ್ಲಿ ಪ್ರೇಮ ಕಥೆ ಅಂತ್ಯ!

Team Udayavani, Feb 19, 2020, 5:25 PM IST

ಮಿರ್ಜಾಪುರ್(ಉತ್ತರಪ್ರದೇಶ): ಒಂದೇ ಶಾಲೆಯಲ್ಲಿ ಪಾಠ ಕಲಿಸುತ್ತಿದ್ದ ಇಬ್ಬರು ಶಿಕ್ಷಕರು ಅದೇ ಶಾಲೆಯ ಹುಡುಗಿಯನ್ನು ಪ್ರೀತಿಸಿ ಕೊನೆಗೆ ಇಬ್ಬರು ಸಾವಿನಲ್ಲಿ ಅಂತ್ಯಕಂಡ ಘಟನೆ ಉತ್ತರಪ್ರದೇಶದ ಮಿರ್ಜಾಪುರ ಎಂಬಲ್ಲಿ ನಡೆದಿದೆ.

ಇಬ್ಬರು ಶಿಕ್ಷಕರು ಒಂದೇ ಹುಡುಗಿಯನ್ನು ಪ್ರೀತಿಸುತ್ತಿದ್ದ ವಿಷಯ ತಿಳಿದ ಮೇಲೆ ಸಹಶಿಕ್ಷಕರು, ಸಹೋದ್ಯೋಗಿಗಳು ಇಬ್ಬರಿಗೂ ವಿಷಯ ಮನವರಿಕೆ ಮಾಡಿದ್ದರು. ಆದರೆ ಇಬ್ಬರು ಅರ್ಥ ಮಾಡಿಕೊಳ್ಳಲು ಸಿದ್ದರಾಗಿಲ್ಲವಾಗಿತ್ತು ಎಂದು ವರದಿ ತಿಳಿಸಿದೆ.

ಪ್ರೀತಿಯ ಅಮಲಿನಲ್ಲಿದ್ದ ಶಿಕ್ಷಕ ಕೊನೆಗೂ ತನ್ನ ಸಹೋದ್ಯೋಗಿ ಶಿಕ್ಷಕನನ್ನು ಕೊಲೆ ಮಾಡಿಸಿದ್ದ. ನಂತರ ತಾನೂ ಆತ್ಮಹತ್ಯೆಗೆ ಶರಣಾಗಿದ್ದ ಎಂದು ವರದಿ ವಿವರಿಸಿದೆ.

ಏನಿದು ಪ್ರೇಮ ಪ್ರಕರಣ:

ಮಿರ್ಜಾಪುರ್ ಜಿಲ್ಲೆಯ ಕುರೈಥಿಯ ಎಚ್ ಪಿ ತಿವಾರಿ ಪಬ್ಲಿಕ್ ಶಾಲೆಯಲ್ಲಿ ಸೂರಜ್, ಅನೂಜ್ ಹಾಗೂ ರತ್ನೇಶ್ ಮೂವರು ಶಿಕ್ಷಕರಾಗಿದ್ದರು. ಸೂರಜ್ ಮತ್ತು ಅನೂಜ್ ಆಪ್ತ ಸ್ನೇಹಿತರಾಗಿದ್ದರು. ಅನೂಜ್ ಕಳೆದ ಮೂರು ವರ್ಷಗಳಿಂದ ತಾನು ಪಾಠ ಮಾಡುತ್ತಿದ್ದ ಶಾಲೆಯ ವಿದ್ಯಾರ್ಥಿನಿಯನ್ನು ಪ್ರೀತಿಸುತ್ತಿದ್ದ ಎಂದು ಪೊಲೀಸರು ತಿಳಿಸಿದ್ದಾರೆ.

ಕಳೆದ ಎರಡು ತಿಂಗಳಿನಿಂದ ಸೂರಜ್ ಕೂಡಾ ಅದೇ ಹುಡುಗಿ ಜತೆ ಮೊಬೈಲ್ ನಲ್ಲಿ ಮಾತನಾಡತೊಡಗಿದ್ದ. ಈ ಬಗ್ಗೆ ಅನೂಜ್ ಗೆ ವಿಷಯ ತಿಳಿದಾಗ ಸೂರಜ್ ಗೆ ತಾನು ಪ್ರೀತಿಸುತ್ತಿದ್ದ ವಿಷಯ ಮನವರಿಕೆ ಮಾಡಲು ಯತ್ನಿಸಿದ್ದ. ಆದರೆ ಸೂರಜ್ ಆತನ ಮಾತು ಕೇಳಲು ಸಿದ್ದವಾಗಿಲ್ಲವಾಗಿತ್ತು.

ಕೊನೆಗೆ ಅನೂಜ್, ರತ್ನೇಶ್ ಫೆಬ್ರವರಿ 11ರಂದು ಮಫ್ಲರ್ ನಿಂದ ಸೂರಜ್ ಉಸಿರುಗಟ್ಟಿಸಿ ಕೊಂದು ಶವವನ್ನು ಬಾವಿಗೆ ಎಸೆದಿದ್ದರು. ಫೆ.13ರಂದು ಅನೂಜ್ ಆತ್ಮಹತ್ಯೆಗೆ ಶರಣಾಗಿದ್ದ. ಪ್ರಕರಣದ ಬಗ್ಗೆ ತನಿಖೆ ನಡೆಸಿದ ನಂತರ ಪೊಲೀಸರು ರತ್ನೇಶ್ ನನ್ನು ಬಂಧಿಸಿರುವುದಾಗಿ ತಿಳಿಸಿದ್ದಾರೆ.