ಸಾವಿನ ಸೂಚಿ ಈ ಸಕೂಚಿ

Team Udayavani, Feb 21, 2020, 5:50 AM IST

ಕನ್ನಡದಲ್ಲಿ ಈ ವರ್ಷ ಕೂಡ ಒಂದಷ್ಟು ಹಾರರ್‌-ಥ್ರಿಲ್ಲರ್‌ ಚಿತ್ರಗಳು ತೆರೆಗೆ ಬರಲು ಸಿದ್ಧವಾಗುತ್ತಿದ್ದು, ಅಂಥದ್ದೇ ಒಂದು ಚಿತ್ರ “ಸಕೂಚಿ’ ಇತ್ತೀಚೆಗೆ ತನ್ನ ಹಾಡುಗಳನ್ನು ಬಿಡುಗಡೆ ಮಾಡುವ ಮೂಲಕ ಪ್ರಚಾರ ಕಾರ್ಯಕ್ಕೆ ಚಾಲನೆ ನೀಡಿದೆ.

ಕರ್ನಾಟಕ ಚಲನಚಿತ್ರ ಕಲಾವಿದರ ಸಂಘದ ಸಭಾಂಗಣದಲ್ಲಿ ನಡೆದ ಸಮಾರಂಭದಲ್ಲಿ ಹಿರಿಯ ನಿರ್ದೇಶಕ ಸಿ.ವಿ ಶಿವಶಂಕರ್‌, ನಿರ್ಮಾಪಕ ಕೆ. ಮಂಜು, ನಟರಾದ ನೀನಾಸಂ ಸತೀಶ್‌, ಪ್ರಮೋದ್‌ ಶೆಟ್ಟಿ, ಅರುಣ್‌, ವಿಧಾನ ಪರಿಷತ್‌ ಸದಸ್ಯ ಟಿ.ಎ ಶರವಣ, ಎನ್‌.ಆರ್‌ ರಮೇಶ್‌ ಸೇರಿದಂತೆ ಚಿತ್ರರಂಗ ಮತ್ತು ರಾಜಕೀಯ ರಂಗದ ಹಲವು ಗಣ್ಯರ ಸಮ್ಮುಖದಲ್ಲಿ ಚಿತ್ರದ ಹಾಡುಗಳನ್ನು ಹೊರತರಲಾಯಿತು.

“ಸಕೂಚಿ’ ಚಿತ್ರದ ಟೈಟಲ್‌ಗೆ “ಸಾವಿನ ಸೂಚಿ’ ಎಂಬ ಅಡಿಬರಹವಿದ್ದು, ಬ್ಲ್ಯಾಕ್‌ ಮ್ಯಾಜಿಕ್‌ ಸುತ್ತ ನಡೆಯುವ ಘಟನೆಗಳ ಕಥಾಹಂದರ ಚಿತ್ರದಲ್ಲಿದೆ. ಕೆಲವರ್ಷಗಳ ಹಿಂದೆ ಬೆಂಗಳೂರಿನಲ್ಲಿ ನಡೆದ ಘಟನೆಯೊಂದು ಈ ಚಿತ್ರದ ಕಥೆಗೆ ಪ್ರೇರಣೆ ಎಂದಿರುವ ಚಿತ್ರತಂಡ, ಇಲ್ಲಿಯವರೆಗೂ ಯಾರೂ ಹೇಳದ ವಿಷಯವೊಂದನ್ನು ಈ ಚಿತ್ರದಲ್ಲಿ ತೆರೆಮೇಲೆ ಹೇಳಲು ಹೊರಟಿದ್ದೇವೆ ಎಂದಿದೆ.

“ರ್‍ಯಾಂಪೇಜ್‌ ಪ್ರೊಡಕ್ಷನ್ಸ್‌’ ಬ್ಯಾನರ್‌ನಲ್ಲಿ ಬಿ.ಸಿ ಅಶ್ವಿ‌ನ್‌ ನಿರ್ಮಿಸಿರುವ “ಸಕೂಚಿ’ ಚಿತ್ರದಲ್ಲಿ ತ್ರಿವಿಕ್ರಮ್‌ ನಾಯಕನಾಗಿ, ಡಯಾನಾ ಮೇರಿ ನಾಯಕಿಯಾಗಿ ಕಾಣಿಸಿಕೊಂಡಿದ್ದಾರೆ. ಚಿತ್ರಕ್ಕೆ ಅಶೋಕ್‌ ಎಸ್‌ ಕಥೆ, ಚಿತ್ರಕಥೆ ಬರೆದು ನಿರ್ದೇಶನ ಮಾಡುತ್ತಿದ್ದಾರೆ. ಗಣೇಶ್‌ ಗೋವಿಂದಸ್ವಾಮಿ ಸಂಗೀತ ಸಂಯೋಜನೆಯ “ಸಕೂಚಿ’ ಚಿತ್ರಕ್ಕೆ ಹೃದಯ ಶಿವ ಸಾಹಿತ್ಯ ಒದಗಿಸಿದ್ದಾರೆ. ಚಿತ್ರದ ಹಾಡುಗಳಿಗೆ ಆನಂದ ಯಾದವ್‌ ನೃತ್ಯ ಸಂಯೋಜಿಸಿದ್ದಾರೆ. ಚಿತ್ರಕ್ಕೆ ಆನಂದ ಸುಂದರೇಶ್‌ ಛಾಯಾಗ್ರಹಣ, ಮಹೇಶ್‌ ತೊಗಟ ಸಂಕಲನವಿದೆ. ಸದ್ಯ ಹಾಡುಗಳ ಮೂಲಕ ನಿಧಾನವಾಗಿ ಚಿತ್ರದ ಪ್ರಚಾರ ಕಾರ್ಯಗಳಿಗೆ ಚಾಲನೆ ನೀಡಿರುವ “ಸಕೂಚಿ’ ಮುಂದಿನ ತಿಂಗಳು ತೆರೆಗೆ ಬರುವ ಸಾಧ್ಯತೆ ಇದೆ.