1 ಕೆಜಿ ಪ್ಲಾಸ್ಟಿಕ್‌ ಕೊಟ್ಟರೆ ಒಂದು ಕೆಜಿ ಅಕ್ಕಿ ಉಚಿತ!

Team Udayavani, Mar 4, 2020, 12:25 PM IST

ಯಾದಗಿರಿ: ಒಂದು ಕೆಜಿ ಪ್ಲಾಸ್ಟಿಕ್‌ ಸಂಗ್ರಹಿಸಿಕೊಟ್ಟರೆ ಒಂದು ಕೆಜಿ ಅಕ್ಕಿ ಪಡೆಯಬಹುದು! ಇಂತಹ ಹೊಸ ನಿಯಮವೊಂದು ಜಿಲ್ಲೆಯ ಅನಪುರ ಗ್ರಾಪಂ ವ್ಯಪ್ತಿಯಲ್ಲಿ ಜಾರಿಗೆ ಬಂದಿದೆ.

ತೆಲಂಗಾಣ ಗಡಿಗೆ ಹೊಂದಿಕೊಂಡಿರುವ ಗ್ರಾಪಂವನ್ನು ಪ್ಲಾಸ್ಟಿಕ್‌ ಮುಕ್ತಗೊಳಿಸಲು ಪಣತೊಟ್ಟಿರುವ ಗ್ರಾಪಂ ಅಧಿಕಾರಿಗಳು ವಿನೂತನ ಪ್ರಯತ್ನಕ್ಕೆ ಕೈಹಾಕಿದ್ದು ಇದಕ್ಕೆ ಸಾರ್ವಜನಿಕರು, ವಿದ್ಯಾರ್ಥಿಗಳ ಸಹಕಾರವೂ ಭರಪೂರ ದೊರೆಯುತ್ತಿದೆ. ಜಿಲ್ಲೆಯಲ್ಲಿಯೇ ಪ್ರಥಮವಾಗಿ ಗುರುಮಠಕಲ್‌ ಮತಕ್ಷೇತ್ರದ ಅನಪುರ ಗ್ರಾಪಂ ಅಧಿಕಾರಿಗಳು ಪ್ಲಾಸಿಕ್‌ ಬಳಕೆಯಿಂದ ಜನಜೀವನದ ಮೇಲಾಗುವ ಪರಿಣಾಮಗಳು, ಪ್ಲಾಸ್ಟಿಕ್‌ ಭೂಮಿಯಲ್ಲಿ ಸಂಗ್ರಹವಾಗಿ ಅಂತರ್ಜಲಕ್ಕೆ ತೊಂದರೆ, ಭೂಮಿಯಲ್ಲಿ ಬೇಗ ಕೊಳೆಯದೆ ಪರಿಸರದ ಮೇಲಾಗುವ ಹಾನಿ ಸೇರಿದಂತೆ ಇತರೆ ವಿಷಯಗಳನ್ನು ಜನರಿಗೆ ಮನದಟ್ಟಾಗುವ ರೀತಿಯಲ್ಲಿ ತಿಳಿಸಿದ್ದಾರೆ. ನಮ್ಮ ಗ್ರಾಮ ಪ್ಲಾಸ್ಟಿಕ್‌ ಮುಕ್ತವಾಗುವುದು ನಮ್ಮೆಲ್ಲರ ಗುರಿ ಎನ್ನುತ್ತಾರೆ ಇಲ್ಲಿನ ಜನರು.

ಅನಪುರ ಗ್ರಾಪಂ ವ್ಯಾಪ್ತಿಗೆ ಅನಪುರ, ನಸಲವಾಯಿ ಹಾಗೂ ಎಡೇಪಲ್ಲಿ ಸೇರಿದ್ದು, ಒಟ್ಟು 6500 ಜನಸಂಖ್ಯೆ ಇದೆ. ಇಲ್ಲಿನ ಜನರು ಪಂಚಾಯಿತಿ ಕಚೇರಿಗೆ ಒಂದು ಕೆಜಿ ಪ್ಲಾಸ್ಟಿಕ್‌ ಗ್ಲಾಸ್‌, ಕೈಚೀಲ ಸೇರಿ ಇತರೆ ಉತ್ಪನ್ನಗಳನ್ನು ಸಂಗ್ರಹಿಸಿ ಕೊಟ್ಟರೇ ಅದನ್ನು ಪಡೆದು ಒಂದು ಕೆಜಿ ಅಕ್ಕಿ ಉಚಿತವಾಗಿ ನೀಡಲಾಗುತ್ತಿದೆ. ವಿದ್ಯಾರ್ಥಿಗಳು ಮನೆ ಸುತ್ತಲಿನ ಪ್ರದೇಶದಲ್ಲಿ ಬಿದ್ದ ಪ್ಲಾಸ್ಟಿಕ್‌ ಆರಿಸಿಕೊಟ್ಟು ಅಕ್ಕಿ ಪಡೆಯುತ್ತಿದ್ದಾರೆ. ಪರಿಸರ ಸ್ವಚ್ಛವಾಗಿಡಲು ಕಾಳಜಿವಹಿಸುವ ಗ್ರಾಮದ ದೊಡ್ಡ ರೈತರು ಸ್ವತಃ ಮುಂದೆ ಬಂದು 10ರಿಂದ 20 ಕೆಜಿವರೆಗೆ ಅಕ್ಕಿ ದೇಣಿಗೆಯಾಗಿ ನೀಡುತ್ತಿದ್ದಾರೆ. ರಾಜ್ಯದಲ್ಲಿಯೇ ಗಡಿ ಗ್ರಾಪಂ ಮಾದರಿಯಾಗಲಿ ಎನ್ನುವುದು ಪರಿಸರ ಪ್ರೇಮಿಗಳ ಆಶಯ.

ವಿದ್ಯಾರ್ಥಿಗಳಿಗೆ ಸಿಗುತ್ತೆ ನೋಟ್‌ ಬುಕ್‌: ಪ್ಲಾಸ್ಟಿಕ್‌ ಮುಕ್ತ ಗ್ರಾಪಂ ಮಾಡುವಲ್ಲಿ ವಿದ್ಯಾರ್ಥಿಗಳು ಪ್ರಮುಖ ಪಾತ್ರ ವಹಿಸಿದ್ದಾರೆ. ಸುತ್ತಲಿನ 1 ಕೆಜಿ ಪ್ಲಾಸ್ಟಿಕ್‌ ಆರಿಸಿಕೊಟ್ಟು 1 ಲಾಂಗ್‌ ಸೈಜ್‌ ನೋಟ್‌ ಬುಕ್‌ ಪಡೆಯುತ್ತಿದ್ದಾರೆ. ಒಂದೆಡೆ ಪ್ಲಾಸ್ಟಿಕ್‌ ಮುಕ್ತ ಮತ್ತೂಂದೆಡೆ ವಿದ್ಯಾರ್ಥಿಗಳ ಅಭ್ಯಾಸಕ್ಕೆ ನೋಟ್‌ ಬುಕ್‌ ಬಳಕೆಯಾಗಲಿದೆ.

ಘನತ್ಯಾಜ್ಯ ವಿಲೇವಾರಿ ಘಟಕ
ಅನಪುರ ಗ್ರಾಪಂಗೆ ಘನತ್ಯಾಜ್ಯ ವಿಲೇವಾರಿ ಘಟಕವೂ ಮಂಜೂರಾಗಿದೆ. ಸರ್ಕಾರ ಇದಕ್ಕೆ 20 ಲಕ್ಷ ರೂ. ಜಿಪಂಗೆ ಬಿಡುಗಡೆ ಮಾಡಿದೆ ಎನ್ನಲಾಗಿದೆ. ಘಟಕ ನಿರ್ಮಾಣ ಕಾಮಗಾರಿ ಆರಂಭವಾಗಬೇಕಿದೆ. ಈ ನಿಟ್ಟಿನಲ್ಲಿ ಪಾಯೋಗಿಕವಾಗಿ ಪ್ಲಾಸ್ಟಿಕ್‌ ಬಳಕೆ ನಿಯಂತ್ರಣಕ್ಕೆ ಪಿಡಿಒ ಪ್ರಯತ್ನ ನಡೆಸಿದ್ದಾರೆ. ಕಸ ವಿಂಗಡಿಸಿ ನೀಡಲು ಮನೆ ಮನೆಗೆ ಹಸಿ ಕಸ ಮತ್ತು ಒಣ ಕಸ ಹಾಕುವುದಕ್ಕೆ ಬುಟ್ಟಿಗಳನ್ನು ನೀಡುವ ಚಿಂತನೆ ನಡೆದಿದೆ.

ಪ್ಲಾಸ್ಟಿಕ್‌ ಬಳಕೆ ನಿಷೇಧಿಸಿದ ಜಿಲ್ಲಾಡಳಿತ
ಜಿಲ್ಲೆಯಲ್ಲಿ ಈಗಾಗಲೇ ಪ್ಲಾಸ್ಟಿಕ್‌ ಬಳಕೆ ನಿಷೇಧಿಸಲು ಜಿಲ್ಲಾಡಳಿತ ಅಗತ್ಯ ಕ್ರಮ ಕೈಗೊಳ್ಳುತ್ತಿದೆ. ಪ್ಲಾಸ್ಟಿಕ್‌ ಬಳಕೆ ನಿಯಂತ್ರಣಕ್ಕೆ ಜಿಲ್ಲಾ ಬಾಲಕಾರ್ಮಿಕ ಯೋಜನಾಧಿಕಾರಿಗಳ ನೇತೃತ್ವದ ಅಧಿಕಾರಿಗಳ ತಂಡ ನಿತ್ಯ ನಗರ ಮತ್ತು ಗ್ರಾಮೀಣ ಪ್ರದೇಶಗಳಲ್ಲಿ ದಾಳಿ ನಡೆಸಿ ಅಂಗಡಿ ಮಾಲೀಕರಿಗೆ ದಂಡ ವಿಧಿಸಿ ಪ್ಲಾಸ್ಟಿಕ್‌ ಬಳಸದಂತೆ ಎಚ್ಚರಿಕೆ ನೀಡುತ್ತಿದ್ದಾರೆ. ಸಾರ್ವಜನಿಕ ಸ್ಥಳಗಳಲ್ಲಿ ಕಸ ಹಾಕುವುದನ್ನು ನಿಷೇಧಿಸಲಾಗಿದೆ, ಉಲ್ಲಂಘಿಸಿದಲ್ಲಿ 25 ಸಾವಿರ ರೂ. ದಂಡ ವಿಧಿಸುವ ಎಚ್ಚರಿಕೆಯನ್ನೂ ಜಿಲ್ಲಾಡಳಿತ ನೀಡಿದೆ.

ಕಳೆದ 10 ದಿನಗಳಿಂದ ವಿನೂತನ ಪ್ರಯೋಗ ಆರಂಭಿಸಲಾಗಿದೆ. ನಿತ್ಯ 4ರಿಂದ 5 ಕೆಜಿ ಪ್ಲಾಸ್ಟಿಕ್‌ ಸಂಗ್ರಹವಾಗುತ್ತಿದೆ. ಒಂದು ಕೆಜಿ ಪ್ಲಾಸ್ಟಿಕ್‌ ಪಡೆದು ಕೆಜಿ ಅಕ್ಕಿ ನೀಡಲಾಗುತ್ತಿದೆ. ಪ್ಲಾಸ್ಟಿಕ್‌ ಸಂಗ್ರಹಕ್ಕೆ ತಾತ್ಕಾಲಿಕವಾಗಿ ಒಂದು ಕೊಠಡಿ ಬಳಕೆ ಮಾಡಿಕೊಳ್ಳಲಾಗುತ್ತಿದೆ. ಪರಿಸರ ಕಾಪಾಡಲು ಎಲ್ಲರೂ ಕಾಳಜಿ ವಹಿಸಿ ಸಹಕರಿಸಬೇಕು.
ಮಲ್ಲಿಕಾರ್ಜುನ ಸಂಗ್ವಾರ,
ಪಿಡಿಒ ಅನಪುರ

ಅನೀಲ ಬಸೂದೆ