ರಾಜವೀರ ಮದಕರಿಗೆ ಬರುತ್ತಾರಾ ನಯನಾತಾರಾ

Team Udayavani, Mar 8, 2020, 1:09 PM IST

ದರ್ಶನ್‌ ನಾಯಕರಾಗಿರುವ “ರಾಜವೀರ ಮದಕರಿನಾಯಕ’ ಚಿತ್ರದ ಚಿತ್ರೀಕರಣ ಮಾರ್ಚ್‌ 10 ರಿಂದ ಹೈದರಾಬಾದ್‌ನಲ್ಲಿ ನಡೆಯಲಿದೆ.

ಈಗಾಗಲೇ ಕೇರಳದಲ್ಲಿ ಕೆಲವು ದಿನಗಳ ಚಿತ್ರೀಕರಣ ನಡೆಸಿರುವ ಚಿತ್ರತಂಡ ಹೈದರಾಬಾದ್‌ನತ್ತ ಮುಖ ಮಾಡಿದೆ. ಈ ನಡುವೆಯೇ ಚಿತ್ರಕ್ಕೆ ನಾಯಕಿ ಯಾರಾಗುತ್ತಾರೆ, ದರ್ಶನ್‌ ಪಕ್ಕ ನಿಲ್ಲುವ ಅವಕಾಶ ಯಾವ ನಟಿಗೆ ಸಿಗುತ್ತದೆ ಎಂಬ ಕುತೂಹಲ ಮುಂದುವರೆದಿತ್ತು. ಈಗ ಸ್ಟಾರ್‌ ನಟಿಯೊಬ್ಬಳ ಹೆಸರು ಮದಕರಿ ಚಿತ್ರದ ನಾಯಕಿ ವಿಚಾರದಲ್ಲಿ ಕೇಳಿಬರುತ್ತಿದೆ. ಅದು ಬೇರಾರು ಅಲ್ಲ, ನಯನಾ ತಾರಾ.

ಹೌದು, “ರಾಜವೀರ ಮದಕರಿ ನಾಯಕ’ ಚಿತ್ರಕ್ಕೆ ನಯನಾ ತಾರಾ ನಾಯಕಿಯಾಗಲಿದ್ದಾರಂತೆ. ಈಗಾಗಲೇ ಮಾತುಕತೆ ನಡೆದಿದ್ದು, ಬಹುತೇಕ ಅಂತಿಮವಾಗಿದೆ ಎನ್ನಲಾಗಿದೆ. ಒಂದು ವೇಳೆ ನಯನಾ ತಾರಾ ಓಕೆಯಾದರೆ ಎರಡನೇ ಬಾರಿಗೆ ಕನ್ನಡ ಚಿತ್ರದಲ್ಲಿ ನಟಿಸಿದಂತಾಗುತ್ತದೆ. ಈಗಾಗಲೇ ನಯನಾ ತಾರಾ, ಉಪೇಂದ್ರ ಅವರ “ಸೂಪರ್‌’ ಚಿತ್ರದಲ್ಲಿ ನಟಿಸಿದ್ದಾರೆ. ಆ ನಂತರ ಕನ್ನಡದಿಂದ ಸಾಕಷ್ಟು ಅವಕಾಶಗಳು ಹುಡುಕಿ ಬಂದರೂ ನಯನಾ ತಾರಾ ಒಪ್ಪಿರಲಿಲ್ಲ. ಈಗ ಮತ್ತೆ “ರಾಜವೀರ ಮದಕರಿ ನಾಯಕ’ ವಿಚಾರದಲ್ಲಿ ನಯನಾ ತಾರಾ ಹೆಸರು ಕೇಳಿಬರುತ್ತಿದೆ.

ಇತ್ತೀಚೆಗಷ್ಟೇ ತೆರೆಕಂಡಿದ್ದ ಚಿರಂಜೀವಿ ಅಭಿನಯದ ಐತಿಹಾಸಿಕ ಚಿತ್ರ “ಸೈರಾ ನರಸಿಂಹ ರೆಡ್ಡಿ’ಯಲ್ಲಿ ನಯನಾ ತಾರಾ ನಾಯಕಿಯಾಗಿ ಕಾಣಿಸಿಕೊಂಡಿದ್ದರು. ಇನ್ನು, ಚಿತ್ರದಲ್ಲಿ ಹೈದರಾಲಿ ಪಾತ್ರದಲ್ಲಿ ಶರತ್‌ ಲೋಹಿತಾಶ್ವ ಅವರು ನಟಿಸಲಿದ್ದಾರಂತೆ. ಹೈದರಾಬಾದ್‌ ಚಿತ್ರೀಕರಣ ಮುಗಿಸಿಕೊಂಡು ಚಿತ್ರತಂಡ ರಾಜಸ್ತಾನಕ್ಕೆ ತೆರಳಲಿದೆ ಎನ್ನಲಾಗಿದೆ.

ದರ್ಶನ್‌ ಅವರು ಇಂಟ್ರೋಡಕ್ಷನ್‌ ದೃಶ್ಯವನ್ನು ವಿಶೇಷವಾಗಿ ಚಿತ್ರೀಕರಿಸಲು ಚಿತ್ರತಂಡ ಪ್ಲ್ರಾನ್‌ ಮಾಡಿಕೊಂಡಿದೆಯಂತೆ. ರಾಕ್‌ಲೈನ್‌ ವೆಂಕಟೇಶ್‌ ನಿರ್ಮಾಣದ ಈ ಚಿತ್ರವನ್ನು ರಾಜೇಂದ್ರ ಸಿಂಗ್‌ ಬಾಬು ನಿರ್ದೇಶಿಸುತ್ತಿದ್ದಾರೆ.