ಭದ್ರತೆಯ ನೆಪ: ರಾವಲ್ಪಿಂಡಿಗೆ ಉಗ್ರ ಮಸೂದ್‌ ಸ್ಥಳಾಂತರಿಸಿದ ಪಾಕ್‌

Team Udayavani, Mar 9, 2020, 7:44 PM IST

ನವದೆಹಲಿ: ಜೈಶ್‌-ಎ-ಮೊಹಮ್ಮದ್‌ ಉಗ್ರ ಸಂಘಟನೆ ಮುಖ್ಯಸ್ಥ, ಉಗ್ರ ಮಸೂದ್‌ ಅಝರ್‌ನನ್ನು ರಾವಲ್ಪಿಂಡಿಗೆ ಸ್ಥಳಾಂತರಿಸಲಾಗಿದೆ. ಭದ್ರತೆಯ ಕಾರಣಗಳಿಗಾಗಿ ಪಾಕಿಸ್ತಾನ ಸರ್ಕಾರ ಈ ಕ್ರಮ ಕೈಗೊಂಡಿದೆ ಎಂದು ಹೇಳಲಾಗುತ್ತಿದೆಯಾದರೂ, ಸ್ಪಷ್ಟ ಕಾರಣಗಳು ಬಹಿರಂಗವಾಗಿಲ್ಲವೆಂದು ನವದೆಹಲಿಯಲ್ಲಿ ಮೂಲಗಳು ಖಚಿತಪಡಿಸಿವೆ. ಮಾ.3ರಂದೇ ಈ ಸ್ಥಳಾಂತರ ನಡೆದಿದೆ. ಅದಕ್ಕೆ ಪೂರಕವಾಗಿ ಸದ್ಯ ಅನಾರೋಗ್ಯದಿಂದ ಬಳಲುತ್ತಿದ್ದಾನೆ ಎಂದು ಹೇಳಲಾಗಿರುವ ಮಸೂದ್‌, ಆತನ ಇಬ್ಬರು ಸಹೋದರರಾಗಿರುವ ಮೌಲಾನಾ ರೌಫ್ ಅಸYರ್‌, ಮೌಲಾನಾ ಅಮ್ಮಾರ್‌ರನ್ನು ರಾವಲ್ಪಿಂಡಿಯ ಕೋರ್ಟ್‌ಗೆ ವಿಚಾರಣೆಗೆ ಮಾ.2ರಂದು ಹಾಜರಾಗುವಂತೆ ಸಮನ್ಸ್‌ ನೀಡಿರುವ ಬೆನ್ನಲ್ಲಿಯೇ ಈ ಕ್ರಮ ಕೈಗೊಳ್ಳಲಾಗಿದೆ.

ಇತ್ತೀಚೆಗೆ ಪ್ಯಾರಿಸ್‌ನಲ್ಲಿ ಮುಕ್ತಾಯಗೊಂಡ ಉಗ್ರ ಸಂಘಟನೆಗಳಿಗೆ ವಿತ್ತೀಯ ನೆರವಿನ ಮೇಲೆ ನಿಗಾ ಇರಿಸುವ ಕಾರ್ಯಪಡೆ- ಎಫ್ಎಟಿಎಫ್ ಸಭೆಯ ಸಂದರ್ಭದಲ್ಲಿ ಉಗ್ರ ಮಸೂದ್‌ ನಾಪತ್ತೆಯಾಗಿದ್ದಾನೆಂದು ಪಾಕಿಸ್ತಾನ ನಾಟಕವಾಡಿತ್ತು. ತಾಲಿಬಾನ್‌ ಉಗ್ರ ಸಂಘಟನೆ ಅಮೆರಿಕದ ಜತೆಗೆ ಒಪ್ಪಂದ ಮಾಡಿಕೊಂಡದ್ದರ ಬಗ್ಗೆ ಮೆಚ್ಚುಗೆಯ ಮಾತಾಡಿದ್ದು ಪಾಕ್‌ ಸರ್ಕಾರಕ್ಕೆ ಇರಿಸುಮುರಿಸು ಉಂಟಾಗಿತ್ತು.