ಆಫ್ಘನ್‌ನಿಂದ ಅಮೆರಿಕಾ ಸೇನಾ ಪಡೆಗಳ ವಾಪಾಸಾತಿ ಪ್ರಾರಂಭ

Team Udayavani, Mar 11, 2020, 7:42 PM IST

ಕಾಬೂಲ್‌: ಉಗ್ರ ಸಂಘಟನೆ ತಾಲಿಬಾನ್‌ ಜತೆಗೆ ಮಾಡಿಕೊಂಡಿರುವ ಒಪ್ಪಂದ ದಂತೆ ಅಫ್ಘಾನಿಸ್ತಾನದಿಂದ ಸೇನೆ ಹಿಂಪಡೆಕೊಳ್ಳುವ ಕಾರ್ಯವನ್ನು ಮಂಗಳವಾರದಿಂದ ಅಮೆರಿಕ ಶುರು ಮಾಡಿದೆ. ಇದರ ಜತೆಗೆ ಸೂಕ್ತ ರೀತಿಯಲ್ಲಿ ಒಪ್ಪಂದ ಅನುಷ್ಠಾನವಾಗುವ ರೀತಿಯಲ್ಲಿ ಕಾರಾಗೃಹದಲ್ಲಿರುವ ತಾಲಿಬಾನ್‌ ಉಗ್ರರನ್ನು ಬಿಡುಗಡೆ ಮಾಡುವ ಬಗ್ಗೆಯೂ ಟ್ರಂಪ್‌ ಸರಕಾರ ಅಧ್ಯಕ್ಷ ಅಶ್ರಫ್ ಘನಿ ಮೇಲೆ ಒತ್ತಡ ಹೇರಲಾರಂಭಿಸಿದೆ. 18 ವರ್ಷಗಳ ಭಾರಿ ಸಂಘರ್ಷದ ಬಳಿಕ ಫೆ. 29ರಂದು ಅಮೆರಿಕ ಮತ್ತು ತಾಲಿಬಾನ್‌ ಒಪ್ಪಂದಕ್ಕೆ ಸಹಿ ಹಾಕಿದ್ದವು.

ಆದರೆ ತಾಲಿಬಾನ್‌, ಇತರ ಪ್ರತ್ಯೇಕತಾವಾದಿ ಗುಂಪುಗಳು ಮತ್ತು ಅಫ್ಘಾನಿಸ್ಥಾನ ಸರಕಾರದ ಜತೆಗೆ ನಡೆಯಲಿರುವ ಮಾತುಕತೆಗಳ ಫ‌ಲಿತಾಂಶ ಆ ದೇಶದ ಭವಿಷ್ಯತ್ತನ್ನು ನಿರ್ಧರಿಸಲಿವೆ.

ಈ ನಡುವೆ ಸೋಮವಾರ ಎರಡನೇ ಬಾರಿಗೆ ಚುನಾವಣೆ ಗೆದ್ದಿರುವ ಅಶ್ರಫ್ ಗುಂಡಿನ ಚಕಮಕಿ, ಗ್ರೆನೇಡ್‌ ದಾಳಿ ನಡುವೆಯೇ ಅಧ್ಯಕ್ಷರಾಗಿ ಪ್ರಮಾಣ ಸ್ವೀಕರಿಸಿದ್ದಾರೆ. ಇದಕ್ಕೆ ಪೂರಕವಾಗಿ ಅಶ್ರಫ್ ಪ್ರತಿಸ್ಪರ್ಧಿ ಡಾ| ಅಬ್ದುಲ್ಲಾ ಅಬ್ದುಲ್ಲಾ ಕೂಡ ತಾನೇ ಅಧ್ಯಕ್ಷ ಎಂದು ಪ್ರಮಾಣ ಸ್ವೀಕರಿಸಿದ್ದಾರೆ.