ಇಂದಿರಾ ವೃತ್ತದಲ್ಲಿರುವ ಕೆರೆಗಳ ಆವರಣ ಸ್ವಚ್ಛತಾ ಕಾರ್ಯ ಯಶಸ್ವಿ

Team Udayavani, Mar 14, 2020, 1:50 PM IST

ಮುದ್ದೇಬಿಹಾಳ: ಪಟ್ಟಣದ ಇಂದಿರಾ ವೃತ್ತದಲ್ಲಿರುವ ಕೆರೆಗಳ ಆವರಣ ಸ್ವತ್ಛತಾ ಅಭಿಯಾನ ಶುಕ್ರವಾರ ಸಂಘ ಸಂಸ್ಥೆಗಳ ಸದಸ್ಯರು, ಪುರಸಭೆ ಸದಸ್ಯರು, ಅಧಿಕಾರಿಗಳು, ಸಿಬ್ಬಂದಿ ಮತ್ತು ಸಾರ್ವಜನಿಕರ ಸಹಕಾರದೊಂದಿಗೆ ಯಶಸ್ವಿಯಾಗಿ ನಡೆಯಿತು.

ಬೆಳಗ್ಗೆ ಸ್ಥಳಕ್ಕೆ ಆಗಮಿಸಿದ ಪುರಸಭೆ ಮುಖ್ಯಾಧಿಕಾರಿ ಗೋಪಾಲ ಕಾಸೆ ಅವರು ಅಲ್ಲಿನ ಪರಿಸರ ಗಮನಿಸಿ, ಕೆರೆಯಂಗಳ ಬಹಳ ಗಲೀಜಾಗಿದ್ದು ಕೂಡಲಾಗದಷ್ಟು ಕಸಕಡ್ಡಿ, ಮುಳ್ಳುಕಂಟಿಗಳಿಂದ ತುಂಬಿದೆ. ಇದೇ ಕಾರಣಕ್ಕೆ ಇಲ್ಲಿ ಕುಳಿತುಕೊಳ್ಳಲು ಅಸಹ್ಯಕರ ವಾತಾವರಣ ಇದೆ. ನಾವೆಲ್ಲ ಸೇರಿ ಕೆಲಸ ಮಾಡಿದಲ್ಲಿ ತಿಂಗಳ ಅವ ಧಿಯಲ್ಲಿ ಸ್ವತ್ಛಗೊಳಿಸುವುದು ಸಾಧ್ಯವಿದೆ.

ಕೆರೆಯಂಗಳ ಸ್ವಚ್ಛಗೊಳಿಸುವ ಅಭಿಯಾನಕ್ಕೆ ಎಲ್ಲರೂ ಕೈಜೋಡಿಸಿದ್ದು ಸಂತಸ ತಂದಿದೆ. ಇದೇ ಆವರಣದಲ್ಲಿ ಎಲ್ಲರೂ ಕುಳಿತುಕೊಳ್ಳುವಂತೆ ಆಸನಗಳನ್ನು ಹಾಕುವ, ಅರಣ್ಯ ಇಲಾಖೆಯವರ ಸಹಾಯದಿಂದ ಗಿಡಗಳನ್ನು ನೆಡುವ ಕೆಲಸ ಮಾಡೋಣ. ಇಡಿ ಆವರಣದಲ್ಲಿ ಬೆಳಕು ಇರುವಂತೆ ಸುತ್ತಲೂ ಬೀದಿ ದೀಪಗಳನ್ನೂ ಅಳವಡಿಸೋಣ ಎಂದರು.

ಅಭಿಯಾನದಲ್ಲಿ ಪಾಲ್ಗೊಂಡಿದ್ದ ಲಯನ್ಸ್‌ ಕ್ಲಬ್‌ ಮಾಜಿ ಅಧ್ಯಕ್ಷ ಸಂಜು ಓಸ್ವಾಲ ಅವರು ಗಿಡಗಂಟಿ ಕತ್ತರಿಸಲು ಪೆಟ್ರೋಲ್‌ ಚಾಲಿತ ಚೈನ್‌ ಸಾ ಯಂತ್ರ ತರಿಸಿಕೊಟ್ಟು ಸಹಕರಿಸಿದರು. ಪುರಸಭೆ ಸದಸ್ಯ ಮಹಿಬೂಬ ಗೊಳಸಂಗಿ ಅವರು ಮುಳ್ಳುಕಂಟಿಗಳನ್ನು ಸ್ವತಃ ಕಡಿದು ಪ್ರೇರಣೆ ನೀಡಿದರು. ಉದಯಸಿಂಗ್‌ ರಾಯಚೂರ ಅವರು ಇಲ್ಲಿ ಬೆಳೆದಿರುವ ಜಾಲಿಗಡಿಗಳನ್ನು ಕಡಿಯುವಂತೆ ಇದ್ದಿಲು ಬಟ್ಟಿಯವರಿಗೆ ಹೇಳಿದರೆ ಅವರು ತಾವೇ ಅವುಗಳನ್ನು ಕಡಿದು ಸ್ವತ್ಛಗೊಳಿಸುತ್ತಾರೆ ಎಂದು ಸಲಹೆ ನೀಡಿದರು.

ಪುರಸಭೆ ಸದಸ್ಯೆಯರಾದ ಸಂಗಮ್ಮ ದೇವರಳ್ಳಿ, ಸಹನಾ ಬಡಿಗೇರ, ಪುರಸಭೆ ಕಂದಾಯ ನಿರೀಕ್ಷಕಿ ಭಾರತಿ ಮಾಡಗಿ, ಪುರಸಭೆ ಸಿಬ್ಬಂದಿ ರಮೇಶ ಮಾಡಬಾಳ ಮತ್ತಿತರರು ಪೌರ ಕಾರ್ಮಿಕರು ಕಡಿದಿದ್ದ ಮುಳ್ಳುಕಂಟಿಗಳನ್ನು ಎತ್ತಿ ಒಂದೆಡೆ ಹಾಕಿ ಶ್ರಮದಾನ ಮಾಡಿದರು.

ಕೆರೆಯನ್ನು ಸುತ್ತು ಹಾಕಿದ ಸಂಘ ಸಂಸ್ಥೆಗಳ ಮುಖಂಡರು ಕೆರೆ ದಂಡೆಗುಂಟ ಇಟ್ಟಿದ್ದ ಉರುವಲು ಕಟ್ಟಿಗೆಗಳನ್ನು ತೆಗೆಯುವಂತೆ, ಕೆರೆಯಂಗಳದಲ್ಲಿ ಶೌಚ ಮಾಡಿ ಗಲೀಜು ಮಾಡದಂತೆ ಅಕ್ಕಪಕ್ಕದ ಸಾರ್ವಜನಿಕರಿಗೆ, ಅಂಗಡಿಕಾರರಿಗೆ, ನಿವಾಸಿಗಳಿಗೆ ಮನವಿ ಮಾಡಿದರು.

ಅಭಿಯಾನದಲ್ಲಿ ಹಸಿರು ತೋರಣ ಗೆಳೆಯರ ಬಳಗದ ಅಧ್ಯಕ್ಷ ಅಶೋಕ ರೇವಡಿ, ಸಂಚಾಲಕ ಮಹಾಬಲೇಶ ಗಡೇದ, ಕಾರ್ಯದರ್ಶಿ ರಾಜಶೇಖರ ಕಲ್ಯಾಣಮಠ, ನಿಕಟಪೂರ್ವ ಅಧ್ಯಕ್ಷ ನಾಗಭೂಷಣ ನಾವದಗಿ, ಕಸಾಪ ಅಧ್ಯಕ್ಷ ಎಂ.ಬಿ.ನಾವದಗಿ, ಶಸಾಪ ಅಧ್ಯಕ್ಷ ಬಸವರಾಜ ನಾಲತವಾಡ, ವಚನಸಾಹಿತ್ಯ ಮತ್ತು ಸಾಂಸ್ಕೃತಿಕ ಪರಿಷತ್‌ ಅಧ್ಯಕ್ಷ ಎಸ್‌.ಎಸ್‌. ಕರಡ್ಡಿ, ಜೆಸಿ ಸಂಸ್ಥೆ ಅಧ್ಯಕ್ಷ ರವಿ ಗೂಳಿ, ಕಾರ್ಯದರ್ಶಿ ಅಪ್ಪು ಪೂಜಾರಿ, ಲಯನ್ಸ್‌ ಕ್ಲಬ್‌ ಅಧ್ಯಕ್ಷ ರಾವಸಾಹೇಬ ದೇಸಾಯಿ, ರಂಗತರಂಗ ಸಂಸ್ಥೆ ಸಂಚಾಲಕ ನೇತಾಜಿ ನಲವಡೆ, ಸೈಕಲ್‌ ಬಳಕೆದಾರರ ಬಳಗದ ಅಧ್ಯಕ್ಷ ವಿಜಯಮಹಾಂತೇಶ ಬಂಗಾರಗುಂಡ, ವಕೀಲರ ಸಂಘದ ಅಧ್ಯಕ್ಷ ಎಂ.ಎಚ್‌. ಕ್ವಾರಿ, ವೈದ್ಯರ ಸಂಘದ ಡಾ| ವೀರೇಶ ಇಟಗಿ, ಹಿರಿಯರಾದ ಎಸ್‌.ಬಿ. ಬಂಗಾರಿ, ಬಾಪುಗೌಡ ಪಾಟೀಲ, ಕೆ.ಆರ್‌.ಕಾಮಟೆ, ಬಿ.ಎಸ್‌.ಮೇಟಿ, ಬಸವರಾಜ ಲಿಂಗದಳ್ಳಿ, ವಿಶ್ವನಾಥ ನಾಗಠಾಣ, ಪತ್ರಕರ್ತರಾದ ಲಾಡ್ಲೇಮಶ್ಯಾಕ್‌ ನದಾಫ, ಬಸವರಾಜ ಹುಲಗಣ್ಣಿ, ಅಮರೇಶ ಗೂಳಿ, ಸುರೇಶ ಕಲಾಲ, ಕಿರಣ ಕಡಿ, ಪ್ರಭುರಾಜ ಕಲಬುರ್ಗಿ, ವಿಕ್ರಮ ಓಸ್ವಾಲ, ಗೋವಿಂದರೆಡ್ಡಿ ಮೆದಿಕಿನಾಳ, ಶ್ರೀನಿವಾಸ ಇಲ್ಲೂರ, ಡಾ| ವಿಜಯಕುಮಾರ ಗೂಳಿ, ಚಂದ್ರಶೇಖರ ಶಿವಯೋಗಿಮಠ, ಮಹೇಂದ್ರ ಓಸ್ವಾಲ್‌, ವಿರೂಪಾಕ್ಷಿ ಪತ್ತಾರ, ಬಸವರಾಜ ರಾಮೋಡಗಿ, ಲೋಹಿತ್‌ ನಾಲತವಾಡ, ನಾರಾಯಣಿ, ಬಸು ಚಲವಾದಿ, ಮಹಾಂತೇಶ ಕಟ್ಟಿಮನಿ, ಜಾವೇದ ನಾಯ್ಕೋಡಿ, ಮಹಾಂತೇಶ ಬಸನಗೌಡ್ರ, ಆನಂದ ಮಾಳಜಿ, ಕ್ರಿಯೇಟಿವ್‌ ಫ್ರೆಂಡ್ಸ, ಮಹಾಮನೆ ಬಳಗದ ನೂರಾರು ಜನರು ಸ್ವಯಂಪ್ರೇರಿತರಾಗಿ ಪಾಲ್ಗೊಂಡಿದ್ದರು. ಎಲ್‌ಐಸಿ ಅಧಿಕಾರಿ ಶ್ರೀನಿವಾಸರಾವ್‌ ಕುಲಕರ್ಣಿ ಪರಿಸರಗೀತೆ ಹಾಡಿ ಎಲ್ಲರನ್ನೂ ಕ್ರಿಯಾಶೀಲಗೊಳಿಸಿದರು.