ಬೇಡಿಕೆಯ ನಿರ್ದೇಶಕ, ನಿರ್ಮಾಪಕ ರೋಹಿತ್ ಶೆಟ್ಟಿಗೆ 47ನೇ ಹುಟ್ಟು ಹಬ್ಬದ ಸಂಭ್ರಮ

Team Udayavani, Mar 14, 2020, 5:26 PM IST

ನಿರ್ಮಾಪಕ ರೋಹಿತ್ ಶೆಟ್ಟಿ

ಮುಂಬೈ: ಬಾಲಿವುಡ್ ಬಹುಬೇಡಿಕೆಯ ನಿರ್ದೇಶಕ, ನಿರ್ಮಾಪಕ ರೋಹಿತ್ ಶೆಟ್ಟಿ ಶನಿವಾರ (ಮಾ.14)ದಂದು 47ನೇ ಹುಟ್ಟುಹಬ್ಬ ಆಚರಿಸಿಕೊಂಡರು. ಮೆಚ್ಚಿನ ನಿರ್ಮಾಪಕ ರೋಹಿತ್ ಶೆಟ್ಟಿಗೆ ಬಾಲಿವುಡ್ ನ ದಿಗ್ಗಜರು ಸಾಮಾಜಿಕ ಜಾಲತಾಣಗಳಲ್ಲಿಯೂ ಶುಭ ಹಾರೈಸಿದ್ದಾರೆ.

ಮಂಗಳೂರು ಮೂಲದ ಖ್ಯಾತ ಸ್ಟಂಟ್ ಮಾಸ್ಟರ್ ದಿ.ಎಂಬಿ ಶೆಟ್ಟಿ ಅವರ ಪುತ್ರ ರೋಹಿತ್ ಶೆಟ್ಟಿ. ಇವರು ವಾಣಿಜ್ಯ ನಗರಿ ಮುಂಬೈನಲ್ಲಿ 1973ರ ಮಾರ್ಚ್ 14ರಂದು ಜನಿಸಿದ್ದರು. ತನ್ನ 17ನೇ ವಯಸ್ಸಿನಲ್ಲಿಯೇ ಫೂಲ್ ಔರ್ ಕಾಂಟೇ ಸಿನಿಮಾದ ನಿರ್ದೇಶಕ ಕೂಕು ಕೊಹ್ಲಿ ಸಹಾಯಕ ನಿರ್ದೇಶಕರಾಗಿ ರೋಹಿತ್ ಕಾರ್ಯ ನಿರ್ವಹಿಸಲು ಆರಂಭಿಸಿದ್ದರು. ನಂತರ ಸುಹಾಗ್, ಹಕೀಕತ್, ಝುಲ್ಮಿ ಸಿನಿಮಾದಲ್ಲಿಯೂ ಕೆಲಸ ಮಾಡಿದ್ದರು.

2003ರಲ್ಲಿ ಝಮೀನ್ ಸಿನಿಮಾ ಮೊತ್ತ ಮೊದಲ ಬಾರಿಗೆ ನಿರ್ದೇಶಿಸಲು ಆರಂಭಿಸಿದ್ದರು. ಈ ಸಿನಿಮಾದಲ್ಲಿ ಅಜಯ್ ದೇವಗನ್ ಹೀರೋ ಆಗಿದ್ದರು. ಬಳಿಕ ಗೋಲ್ ಮಾಲ್ ಸರಣಿ ಸಿನಿಮಾ, ಸಿಂಗಂ, ಚೆನ್ನೈ ಎಕ್ಸ್ ಪ್ರೆಸ್ ಸಿನಿಮಾಗಳು ರೋಹಿತ್ ಶೆಟ್ಟಿ ಜನಪ್ರಿಯತೆಯ ಉತ್ತುಂಗಕ್ಕೇರಲು ನೆರವಾದವು.

ಈ ವರ್ಷದ 24ರಂದು ಸೂರ್ಯವಂಶಿ ಸಿನಿಮಾ ಬಿಡುಗಡೆಯಾಗಬೇಕಿತ್ತು. ಆದರೆ ಕೊರೊನಾ ವೈರಸ್ ತೊಂದರೆಯಿಂದಾಗಿ ಸಿನಿಮಾ ಬಿಡುಗಡೆ ಮುಂದೂಡಿಕೆಯಾಗಿದೆ. ಬಾಲಿವುಡ್ ನಲ್ಲಿ ಹಲವು ಯಶಸ್ವಿ ಸಿನಿಮಾಗಳನ್ನು ನೀಡಿರುವ ರೋಹಿತ್ ಶೆಟ್ಟಿಗೆ ಹುಟ್ಟುಹಬ್ಬದ ಶುಭಹಾರೈಕೆಗಳು.