ಮಾ.18ರಿಂದ ಯೆಸ್‌ ಬ್ಯಾಂಕ್‌ ನಿರ್ಬಂಧ ಸಡಿಲಿಕೆ

Team Udayavani, Mar 15, 2020, 6:40 AM IST

ಹೊಸದಿಲ್ಲಿ: ನಷ್ಟದಲ್ಲಿರುವ ಯೆಸ್‌ ಬ್ಯಾಂಕ್‌ನ ಪುನಶ್ಚೇತನ ಪ್ರಕ್ರಿಯೆಗಳು ಅಂತಿಮ ಹಂತದಲ್ಲಿದ್ದು, ಬ್ಯಾಂಕಿನ ಗ್ರಾಹಕರ ಮೇಲೆ ವಿಧಿಸಲಾಗಿರುವ ವ್ಯವಹಾರಗಳ ಮೇಲಿನ ನಿರ್ಬಂಧವನ್ನು ಮಾ. 18ರಿಂದ ಹಿಂಪಡೆಯುವುದಾಗಿ ಕೇಂದ್ರ ಸರಕಾರ ತಿಳಿಸಿದೆ. ಇನ್ನು, ಬ್ಯಾಂಕಿನ ಹೊಸ ಆಡಳಿತಾಧಿಕಾರಿ, ವ್ಯವಸ್ಥಾಪಕ ನಿರ್ದೇಶಕರನ್ನಾಗಿ ಪ್ರಶಾಂತ್‌ ಕುಮಾರ್‌ರನ್ನು ನೇಮಿಸಲಾಗಿದ್ದು, ಅವರ ನೇತೃತ್ವದಲ್ಲಿ ಹೊಸ ಆಡಳಿತ ಮಂಡಳಿ ಅಸ್ತಿತ್ವಕ್ಕೆ ಬರಲಿದೆ ಎಂದು ಸರಕಾರ ತಿಳಿಸಿದೆ.

ಪುನಶ್ಚೇತನ ಪ್ರಕ್ರಿಯೆ ಬಗ್ಗೆ ಸರಕಾರ ಕೈಗೊಂಡಿರುವ ಕ್ರಮಗಳ ಕುರಿತಾಗಿ ಶುಕ್ರವಾರ ಅಧಿಕೃತ ಪ್ರಕಟನೆ ಹೊರಡಿಸಲಾಗಿದೆ. ಅದರಂತೆ, ಯೆಸ್‌ ಬ್ಯಾಂಕ್‌ನ ಶೇ.26 ಷೇರುಗಳನ್ನು ಖರೀದಿಸಲಿರುವ ಎಸ್‌ಬಿಐ 3 ವರ್ಷಗಳ ವರೆಗೆ ಅದನ್ನು ಮಾರಾಟ ಮಾಡುವಂತಿಲ್ಲ. ಯೆಸ್‌ ಬ್ಯಾಂಕ್‌ನ ಇನ್ನುಳಿದ ಷೇರುಗಳನ್ನು ಖರೀದಿಸುವ ಸಂಸ್ಥೆಗಳಿಗೆ ತಮ್ಮ ಹೂಡಿಕೆಯ ಶೇ. 75ರಷ್ಟು ಬಂಡವಾಳವನ್ನು ಮೂರು ವರ್ಷಗಳವರೆಗೆ ಕಾಯ್ದುಕೊಂಡಿರಬೇಕಿರುತ್ತದೆ ಎಂದು ಪ್ರಕಟನೆಯಲ್ಲಿ ತಿಳಿಸಲಾಗಿದೆ.